مستقبل الغذاء!

مستقبل الغذاء!

من امتلك طعامه امتلك حريته!
الجملة ديه كنت سمعتها من احد المدرسين غالبا كانت في درس تاريخ لشخصية ما. بس الفكرة مش في الشخص او المكان و الزمان اللي اتقالت فيه.
الفكرة ان الجملة ديه علي قد ما هي بسيطة و عدد كلماتها محدود الا انها وضعت شرط لحرية الشخص ده لانك فعلا لو فكرت حتلاقي معظم القرارات اللي خدتها باردتك او غصب عنك نابعة من سيطرة شخص ما طبعا الارزاق بايد ربنا مش ده القصد بس في قرارات كتير حتلاقي انك خدتها عشان خايف ان شخص يقطع عنك مرتب او يتقطع عنك مصروفك مثلا 😄
او دول تاخد قرار عشان خايفة ان الاكل يتمنع عنها او الدوا .....ألخ.
بس الاساسي هنا الاكل نظرا لانها ضرورة ملحة جسم الانسان ميقدرش يعيش من غيرها من هنا كان التفكير في ازاي نقدر نكفي نفسنا من الاكل وسط تحديات ازدياد معدل السكان نقص المياه العذبة نقص الاراضي الخصبة تغير المناخ .من هنا اتجه العلماء و المهندسين لمحاولة التغلب علي المعوقات ديه.
بالنسبة لتغير المناخ بدأت الزراعة في البيئات المحكمة بتعرف عند البعض باسم الصوب بس الموضوع اتطور عن الشكل التقليدي اللي اتذكره من سر الارض المشمع اللي بيغطي الزرع عشان يحميه من عوامل الجو الموضوع.

 وصلوا بفضل ابحاث الفضاء اننا نقدر نخلق بيئة مثالية لنمو محاصيل معينة بمعني ان اقدر اتحكم في درجة الحرارة شدة الاضائة نسبة الرطوبة الغذي اللي بيحتاجلة النبات و ده حنتكلم عنه بالتفصيل في نقطة تانية بس الفكرة ان المناخ هنا خرج من المعادلة لان قدرت اعمل محاكاة للمناخ المناسب لنمو المحاصيل اللي انا عايزها.
                                     

اما عن الارض الخصبة بصراحة الناس مقصرتش اكتشفوا من فترة ان التربة في حج ذاتها ما هي الا وسط لتثبيت النبات و مخزن للمغذيات اللي بيحتاجها النبات و بمجرد ما بسقي النبات المغذيات ديه بتدوب مع المياه و يقدر النبات يتغذي عليهاز طب ما نوفرلها المغذيات ديه و ندوبها في الميه و مش عايز تربة خالص. و ده حيوصلنا لتقنيه في الزراعة اسمها الزراعة بدون تربة او الهيدروبونيك (الجزور عايمة في ميه بتحتوي علي المغذيات اللي بيحتاجها النبات و متثبت بطرق مختلفة) الفكرة ديه بتطوراتها ساهمت مش بس في مشكلة التربة لا ديه حليتلي مشكلة المية.
ازاي يا عم بس يعني انا بزرع في مية و بوفر في المية؟؟؟؟

اه ثبت عمليا ان الطريقة ديه بتوفر لحد 95% من المياة(في الطرق المتقدمة) لان طرق الري في الزراعة التقليدية بتهدر كمية مياه كبيرة مبيستفيدش منها النبات.
طب لما هو حلو كده ليه مش موجود؟
مين قالك كده في توجه عالمي لتنمية النوع ده من الزراعة لانهم فعلا ادركوا اهميتة بالذات الدول ذات المناخ القاسي و اللي معندهاش اماكن و مساحات متاحة للزراعة زي دبي مثلا اللي افتتحت مؤخرا متحف المستقبل و هو مختص بدراسة تغيير المناخ و الجزء ده بالذات انشاء مدن مستقبلية تقدر تمد سكانها بالغذاء و الماء و ده لان الغذاء بس حسب تقاريرهم بيستهلك 15% من الدخل القومي.

الجميل كمان ان الموضوع ده وصل مصر بس علي مقياس صغير بس حملات زراعة الاسطح بالطرق ديه بدأت تنتشر و فيه ناس بدأت مشاريع تجارية منها بس محتاجين نتةسع اكتر لاننا بنعاني من كل المشاكل في توفير غذائنا.في وسط التهام الاراضي الزاعية و نقص المياه و تغير المناخ اللي ادي لظهور افات جديدة انتشار النوع ده من الزراعات علي نطاق واسع ة تجاري اصبح حتمي و اسرع طريقة من وجهة نظري لتعمير الصحراء بدون تكاليف الاستصلاح العالية.
موضوع الهيدرو بونيك سهل و ممتع جدا للي عايز يدوس فيه حتي و لو بهدف الهواية زي حلاتي كده و ممكن نتكلم فيه باستفاضة في طرقة وتطوراته بس كفاية رغي كده عشان  جعت 😄 الغذاء يا جدع 😂
و عذرا للاخطاء في الكتابة عشان محمد خالد بيتقمص 😝

Written by: Amr Khaled - T.Rex

#AK_TRex

#TRex_Magazine