سلسلة تعرف - الغابة السوداء


مستمعينا مساء الفل عليكم و هابي ويك اند اكيد اتفرجت علي فيلم هانسل و جريتل في اي مرة من ال2750973 مرة اللي جابته فيها MBC2.

تعرف ان ديه اصلا اسطورة اصلها من مكان اسمه الغابة السوداء مش بس القصة ديه كمان قصة عدت علينا في المدرسة. اسمها الذئب الطيب و ذات الرداء الاحمر الشريرة او ليلي و الذئب ما علينا من التخلف ده المهم ايه هي الغابة السوداء مكان حقيقي يعني طب هي فين اركب ايه يوديني هناك طب هي سودا ليه مفيش منها الوان تانية ????
كل ده حتكلم عنه بعد الاغنيه ديه.....



ولاية بادن بادن في المانيا ايوة هما اتنين غالبا توكيد لفظي او زي ما كان مكتوب في صفحتهم اسموها بادن بادن من جمالها لان بادن واحدة لا تكفي هي حلوة فعلا و انا بحب المانيا عمتا زي اي مهندس ميكانيكا بس ده قلش ما علينا منهم 😂😂
هي بتقع بقي علي بعد 160 كم من الولاية القالشة ديه.
ايه بقي الغابة السوداء ديه و ليه سموها كده بالرغم ان المكان فعلا شكله مرعب في حتت معينة الا انه من اكبر و اجمل الغابات و المتنزهات الطبيعية في العالم 😍.

لما هي حلوة سموها سودا ليه ليه مش الغابة البينك?
لا الغابة البينك ديه في كوكب زمردة 😂. اما الغابة بتاعتنا ديه سوداء لانها بتمتاز باشجار الصنوبر الضخمة دائمة الخضرة واللي من كبرها و كثافة اوراقها مبتسمحش للشمس انها توصل للي واقف وسط الشجر و ده اللي خلاها قديما بيئة خصبة لحكايات و قصص مرعبة كتير زي الفارس اللي بدون راس مثلا اللي بيطارد اي حد يتوه في الغابة ديه 😨.

الغابة السوداء بتتميز بطبيعتها الخلابة بحيث انها بتضم عدد من البحيرات و الشلالات اللي منتشرة في انحاء الغابة كمان فيها حيوانات زي الدب الاسود و الايائل اللي بتخليها وجهة للسياح اللي حابين يستمتعوا بجمال الطبيعة و برغم ان اخشاب الغابة بتستخدم في انتاج الخشب و مشتقاته الا ان القانون بيلزم اللي يقطع شجرة يزرع مكانها للحفاظ علي البيئة الجميلة ديه.
سكان منطقة الغابة السوداء بيتقنوا عدة حرف ابرزها صناعة ساعات الكوكوا الخشبية و اللي تم ابتكارها في المكان ده ويعتبروا من اتقن ساعات الكوكوا بتتصنع الساعات ديه من الخشب و بتطلع شكل او عصفورة كده كل ساعة بميكانيزم معقد و مصنوع باتقان كبير.

كمان بينتشر في الغابة في التجمعات السكنية اماكن لصنع كعك الغابة السوداء و ده اختراع في حد ذاته لانه بيتم صنعه من التوت الاسود اللي بيتم جمعه من اشجار الغابة و اللي بتنمو بشكل طبيعي و علي الرغم من ان الكعكة بتحتوي علي شحرتلاف كيلو كالوري حتاكلها حتاكلها من جمال طعمها.

كمان عسل الغابة السوداء بقيمته الغذائية العالية و طعمه اللي بيميزه عن اي عسل لانه عسل جبلي طبيعي.
طيب انا كسائح او كحد عايز اتفسح اركب طيارة بادن بادن و انزل المطار اخد ميكروبصات الغابة السوداء يعني و اهيم علي وجهي في الغابة بقي و انا و نصيبي?!
لا لو انت رايح المانيا ممكن تحجز تور في الغابة السودء من شركات السياحة الكتير اللي بتوفر النوع ده من الرحلات بصحبة ناس متخصصة لافة الغابة علي كيعانها و حفظاها شجرة شجرة.
اما لو انت قاصد الغابة بالذات في رحلتك فممكن تحجز علي بوكينج اماكن للاقامة و اللي بتتنوع من الاكواخ و لحد الفنادق الضخمة و الفارهة اللي موجودة في ارجاء الغابة ده غير القلاع و المتاحف و المزارات التاريخية.

كمان متنساش الممشي اللي في الغابة و اللي بيعتبر اطول ممشي وسط الطبيعة في العالم بطول 23 كم ربنا يديكم الصحة لو قررتوا تمشوه ده فيه ناس بتفرهد من الممشي السياحي اللي في الغردقة.

و بكده تكون خلصت جولتنا و حقلتنا كان معكم #TRex_Magazine من الغابة السوداء و تصبحوا علي خير .
#تعرف

التعليقات
0 التعليقات