اكتشاف نوع فريد من الضفادع

أكتشاف نوع فريد من الضفادع

رجعنالكوا مرة تانية وحشتونا قوي وأسفين لو كنا أتأخرنا عليكوا.
كلنا أكيد عارفين الضفادع كائن صغير مسخرة رجله الخلفية أطول من الامامية عشان كده مبيمشيش بينط من مكان للتاني. ولو طفولتك مشردة زي حلاتي فأكيد لعبت بيهم و أنت صغير و لو كنت شرير بما فيه الكفاية حتبقي شرحتهم كمان. بس احنا مش حنتكلم عن الضفادع كلها احنا حنتكلم عن ضفدع معاين تم اكتشافة حديثا و ده لاني كنت فاكره لما شوفت الصور  فوتوشوب و طلعت حقيقية. سبحان الله البني أدم كل يوم بيكتشف كائنات جديدة بس ايه الجديد في الضفادع يعني.

الضفدع القرمزي
ضفدع ما تمش اكتشافه ازاي لحد دلوقت ازاي و لونه قرمزي يعني ملفت للنظر محدش كان لاقيه لحد دلوقت. حنسافر مع بعض الهند تحديدا جبال غرب الجاتس بالهند. جبال الجاتس كان تم اعلانها من فترة قريبة كجزء من التراث العالمي عن طريق اليونسكو بسبب الحيوانات النادرة اللي فيها و انها بتحتوي علي جزء نادر من الطبيعة يستحق الحماية.
شكله ايه الضفدع الهندي ده بقي؟
بص يا سيدي زي ما قولنا هو قرمزي و بطوط في نفسه كده و مناخيره كبيرة قمر بسم الله ما شاء الله. بس مش ده الغريب في شكله بس علي عكس الضفادع العادية ايديه مش مصممة انه يعرف يعوم. اطرافه فيها حوافر عاملة زي الجاروف بتاع الحفر بالظبط.
الباشا محدش كان بيشوفه لانه معظم حياته بيقضيها في الانفاق اللي بيبقي حافرها تحت الارض مبيطلعش غير في موسم التزاوج بس يعمل الصح و يرجع حفرته تاني زي الكلب.



طب يعني هو مبيطلعش ياكل حتي؟؟!
لا بيقعد يحفر لحد ما يوصل لبيوت النمل و بلسانه زو زو بيقعد ياكل فيهم و ده مصدر غذاء بيمده بكل العناصر اللي جسمه محتاجها.
بس سؤال طب هي مش الضفادع بتتزاوج في الانهار عادتا و تقعد تعمل النقيق الصوت بتاعها ده بتعاكس بيه الأناث و عشان لما الصغار بتخرج بتعوم في اول حياتها?
صح و مش صح هما اه بيروحوا يشقطوا من علي ضفاف الانهار بس ولادهم مبيعوموش زي خلق ربنا من الضفادع ربنا بيبقي واهبهم فم زي ممصات الاخطبوط كده بس بيبقي فيه سنان كمان بيمسكوا في صخور الانهار و يفضلوا متعلقين لحد ما يكتمل نموهم بيتغذوا في الفتره ديه علي العوالق اللي ما الميه كمان ساعات الام بتبيض بيض غير مخصب عشان توفرلهم اكل اول ما البيض يفقس حنان الام يا اخوانا. و بمجرد ما ينضجوا و يبقوا ضفدع كامل يبدأ الحفر و يختفي عن الانظار ميطلعش غير في موسم التزاوج.
حاجة اخيرة الضفدع تم تسميته ضفدع بوباثي الارجواني و ده الاسم اللي اطلقه عليه الفريق اللي اكتشفه تخليدا لذكري زميلهم د.سوبرامنيم بوباثي و اللي لقي حتفه اثناء استكشافه للمنطقة ديه.
الله يرحمه و وصيتي ليكم لو حصلي حاجة محدش يسمي ضفدع علي اسمي ايا كان السبب.🐸🐸🐸
كان معكم #TRex_Magazine من الغابات الهندية المطيرة.

التعليقات
0 التعليقات