العلوم الهامشية - السفر عبر الزمن - الحلقة 1
بسم الله الرحمن الرحيم أنتهي سيزون الفتة و كل سنة و انتوا طيبين و قادر ربنا يولع في الكالوريز و يعافيلنا جهازنا الهضمي بعد الآجازة ديه.نركز مع بعض شوية بقي!المفهوم الفلسفي للسفر هو الآنتقال من نقطة معينة لنقطة تانية و لو طبقنا الموضوع علي الزمن حيبقي الانتقال من نقطة في الزمن لنقطة تانية و الريفرنس او نقطة بداية القياس حيبقي نقطة البداية بتاعتك وقت ما قررت تسافر عبر الزمن.
انا مش فاهم حاجة!
غالبا ديه اعراض انسحاب الفته من جسمك بس متلومهاش بشكل كلي لأن فكرة السفر عبر الزمن فلسفيا حتي بيقابلها تساؤلات كتير جدا ناهيك عن قابليتها علميا سواء بشكل عملي او نظريا حتي.
و زي أي فرض او نظرية حتلاقي ناس بتنتقده و بتهدم الفرضية بشكل منطقي و ناس بتأيده و بتوجد حلول للمعوقات اللي بتقابله.
اهتمام الناس دايما في موضوع السفر بالزمن بيبقي السفر للماضي.فكرة التلاعب في الاحداث و منع حاجات سيئة انها تحصل او استغلال المعرفة المسقبلية و تغيير الأحداث لصالحك. كمثال انك تقتل هتلر مثلا او تعرف الارقام اللي حتكسب في اللوتري او تراهن عالحصان الكسبان.....الخ. كل الخيالات و الاحلام ديه بتيجي في دماغ اي حد فكر في الزمن قبل كده حتي اكيد جه في دماغك طالما مهتم تقرا المقال ده: ايه اللي حتغيره لو سافرت للماضي?!!
ايا كان خيالك تعالي نبص للزمان كده عشان نقدر نسافر بالزمن لازم نفترض مبدأيا ان الحدث اللي حصل مخلصش و انتهي خلاص لا حنفترض ان الزمن كله بكل مشاهده و احداثه بيحصل دلوقت بس انت عشان جزء من الاحداث ديه مش مدرك ده لكن بالنسبة لراصد خارج الاحداث او خارج نطاق الزمن حيقدر يشوف كل حاجة بتحصل في نفس الوقت و كانه بينتقل بين مشاهد فيلم متسجل.
طيب بفرض انك لقيت وسيلة ما عشان ترجع بالزمن هل ممكن تغير في الأحداث?!
اه ولا دي كانت اجابة العلماء و حتي كتاب الخيال العلمي. بعضهم قال ان اي تغيير طفيف في اي حاجة حيقلب المستقبل رأسا علي عقب حتي لو قتلت ناموسة بالغلط الناموسة ديه كانت جزء من سيناريو المستقبل اللي انت تعرفه و بموتها حتطلق سلسلة من الأحداث غير متوقعة مثلا الناموسة ديه كانت حياكلها عنكبوت كان حياكله ضفدعه و الضفدعة حياكلها تعبان لو الناموسة ماتت السيناريو ده مش حيحصل. و التعبان ممكن ميلاقيش الضفدعة عشان ياكلها و بدلا من كده يخرج يدور علي اكل فيصادف انسان و يلدغه و يموت.ناموسة شالت شخص بذريته باسهاماتهم من مسار الزمن انت مدرك التغيير اللي ممكن يحصل?! البعض بيقول ان الزمن قوي بما فيه الكفايه انه يرتب الأحداث عشان تمشي بنفس السياق.و الرآي التاني ان الاحداث ديه حتستوعب التغير و حيبقي فيه واقع موازي بالاحداث الجديدة و الاحداث القديمة ماشية زي ما هي.
يعني كده احنا وصلنا لفرض ان كل حاجة بتحصل في نفس الوقت و كمان بتحصل بطرق مختلفة كل طريقة بتخلق واقع موازي مع عدد لا نهائي من الاحتمالات بيتوقف علي كل قرار بتاخده كل واحد فينا مهما كان قدره او تآثيره في المجتمع.
الافتراض التاني ده يحللنا معضلة يعني انا لو رجعت بالزمن و ضربت نار عليا وانا صغير ..... انت حتموت وانت صغير في احد اصدارات الزمن بس الاصدار اللي انت جي منه زي ما هو. و ده بيخلي فكرة الاكوان الموازية و السفر عبر الزمن بيدعموا بعض.
السفر عبر الزمن بالرغم من تعقيده و كمية الفروض النظرية بيلاقي قبول نوعا ما في مجتمع الفيزياء لدرجة ان في ابحاث و رسائل دكتوراة بتناقش الفرضيات ديه بل ووصل الموضوع للتجارب العملية زي اللي بتتم في مختبرات سيرن.
بكده نكون خلصنا اول حلقة و اللي كانت بتناقش فلسفة السفر عبر الزمن الحلقة الجاية حنركز بشكل اكبر علي كيفية السفر عبر الزمن من وجهة نظر العلماء و مدي قابلية كل فرضية للتحقيق.
كان معكم #TRex_Magazine من خارج الزمكان و النقاش مفتوح كالعادة
Written by: Amr Khaled - T.Rex
#AK_TRex
#TRex_Magazine
#AK_TRex
#TRex_Magazine
#العلوم_الهامشية
0 التعليقات