كل ما تريد معرفته عن الفيب - Vape

كل ما تريد معرفته عن الفيب - Vape

تلاقي واحد ماسك MP3  بيشد منه نفس و يطلع دخان كتيييييير. و مبقاش واحد ولا اتنين عدد الاشباح بيزيد منهم اللي بياخدها موضة اللي بيقول انها بتساعده علي تبطيل السجاير العادية و اللي عاجبة الفليفور خاصتا ان فيه منها نكهات فعلا مغرية فراولة و كريز  و تشيزكيك... الموضوع قلب ترند الناس حبيته و بينتشر بشكل كبير.
مبدأيا ده مش MP3 ديه فيب Vape او سيجارة الكترونية. بتشتغل ازاي البتاعه ديه؟ - عشان تفهم بتشتغل ازاي لازم تعرف مكوناتها الاول 🙋
نبدأ من البطارية و وحدة التحكم بطارية عادية جدا بدايرة كهربة بتتحكم في شدة التيار اللي هتروح للسخان
بعدين عندنا الجزء اللي فيه المبسم اللي هو البوز اللي بتشد منه تحتيه التنك اللي فيه السائل (الليكويد) و القطنة( الفتيل) و الكويل (السخان) بيختلف ترتيب القطع ديه حسب التصميم بس نظرية العمل واحدة.
ايه هي نظرية العمل بقي عارف فكرة عمل المبخرة نفس الفكرة سائل بيتعرض لحرارة يتبخر و انت بتستنشق البخار ده.
القطنة بتمتص السائل - الكويل (السخان) بيسخن القطنة (الفتيل) لما بتدوس علي زرار التشغيل حسب درجة التسخين اللي انت ظابطها - و انت بتشد بيدخل الهوا من فتحة التهوية يشد السائل اللي اتبخر من القطنة - السائل يدخل الرئة و تخرج الشبورة ولا اجدعها نينجا من قرية الضباب.

ثواني يا رانيا نسأل الاسئلة المهمة ايه السائل (الليكويد) اللي انا هستنشقه ده بقي؟!
بص حضرتك السائل ده بيتركب من اربع سوائل
- جليسرين ايوه اللي بينعم البشرة و ده السبب في الشبورة اللي انت بتشوفها☁
- فليفور او مكسب الطعم زي اللي بتتحط عالعصاير الايس كريم ....
-سائل نيكوتين و ده اختياري و الناس اللي بتبطل سجاير بتقلله تتدريجيا
-بروبلين جليكول - ماء مقطر او كحول ايثيلي و ده تقدر تقول وسط مذيب عشان السائل و الفيلفور و النيكوتين يدوبوا في بعض و بيدي احساس الدخان في الحلق.

كده حضرتك ممكن تحضر الليكويد في البيت لان الحاجات ديه تقدر تشتريها من الصيدلية او من عند اي بتاع كيماويات. او تشتريه جاهز بس تبقي عارف مكوناته لان لسه مفيش مصنعين اقوية براند يعن تقدر تعتمد عليها في الشرا الا حاجات قليلة و اللي هتلاقي اصلها محض اجتهادات اشخاص استهوا الموضوع و ابدعوا فيه مش اكتر لكن معظم الناس اللي اعرفهم بيخلطوا بنفسهم لان تمن المخلط اقل بكتر من تمن الجاهز الحمد لله اصحابي كلهم شحاتين 😂😂😂.
كده انا عرفت انا هشرب ايه و هشربه في ايه و ازاي. انت بقي بتقولي ان البخار ده مواد عادية مش مضرة و اني احسنلي ابطل سجاير او شيشة او لو عايز انحرف و ادخن اشتري واحدة؟
اقسم بالله ما قولت كده و غلاوة البنزين جوة التنك ما حصل انا بعرض قدامك حقايق و انت في الاخر صاحب القرار!!!
-الحقيقة الاولي التدخين ضار جدا بالصحة و يسبب الوفاة.
-اي ابخرة بتدخل الجسم عن طريق التنفس مضرة للجهاز التنفسي بدرجة معينة بتختلف من مادة للتانية حتي البخور.
-الفيب بتشرب منها بخار الليكويد السائل مبيتحرقش يعني لا في ثاني اكسيد كربون ولا قطران ولا دي دي تي  وديه من المواد الخطيرة جدا في السجاير و ده بيديها افضلية علي السجاير
-النيكوتين اللي بتحطة في الليكويد زيه زي اللي في السجاير بالظبط بيسبب الادمان و بتبقي محتاجه علطول والا هيبقي تاثير غيابه زي تاثير غياب السيجارة بالظبط كل اللي بتعمله ان انت بتقلله بمزاجك لو عايز و فيه ناس بتوصل انها تبطله خالص و ده حصل مع بعض الاصدقاء.
-لما بتسخن مواد زي الجلسرين و البروبيلين بتتصاعد ابخرة ثنائي الاسيتيل و ديه مادة مسرطنة بيظهر اثارها علي المدي البعيد.
-النيكوتين مادة سامة و اي تعرض لبلعها او بلمسها للجلد ممكن يؤدي لتسمم سرطانات او الوفاة وفقا لبحث من مركز السموم و اللي حذر ان تصنيع الليكويد الجاهز غير خاضع لاي جهة رقابية فبالتالي مفيش كنترول علي النسب بتاعة النيكوتين في الليكويد الجاهز.
-مكسبات الطعم اللي بتتحط مش مضرة في حالتها السائلة بس الابخرة بتاعتها بتطلق مواد مسرطنة لم يتم دراسة تاثيرها علي المدي البعيد حتي الان.
- التدخين السلبي للشخص اللي قاعد جنب اللي بيشرب الفيب بيعتمد علي كمية البخار اللي بيستنشقها يعني درجة الضرر بتعتمد علي تعرضك للبخار اعرف ناس بتلزق في اللي بيستخدمها و لا كانه بياخد حمام بخار.
-الفيب ممكن تنفجر لا البطارية هي اللي ممكن تنفجر بسبب السخونية لو جبت واحدة رخيصة مش معزولة كويس او الكويل لازق في البطارية فبوووم
- الفيب بيوفرلي ثمن السجاير ان لو فرضنا انك بتشرب علبة في اليوم فانت بتصرف حوالي 900 جنيه في الشهر سجاير في المتوسط و ثمن الفيب بيوصل دلوقت لالفين و 3 الاف جنيه لسه واحد شاريها قدامي مستعمله ب1300 جنيه طب مهي كده اوفر
لا يا ناصح الكويل و الفتيل بيتحرقوا كل اسبوع تقريبا حسب استخدامك الليكويد المتخلط تمنه 50 جنيه و البراند بيدأ من 120 و انت طالع البطارية بتستهلك و بتتغير بعد فترة زجاج التنك بيتكسر منك و انت مبتدئ مرة علي الاقل لحد متعرف الربطة بتاعتها 😁.
-البطارية بتقعد قد ايه انا مش همشي بشاحن فيب كفاية شاحن الموبايل و اللاب حسب قوة التسخين اللي انت ظابطها بس في المتوسط و البطارية في صحتها ممكن توصل ل6 ساعات و بتتشحن بشاحن زي بتاع الموبايل و ليها وصلة باوربانك.
-السجاير الاكترونية اختراع صيني ظهر للنور من 2003 و بدأ تصديرة لامريكا في 2006 الاان حتي يومنا هذا الفيب محظور استيرادها في اغلب الدول و في كل الدول العربية تقريبا ما عدا الكويت كل الفيب اللي انت شايفه ده جي عن طريق ناس مفيش وكيل او مستورد اللي بيعرف يسلكله كام حته و هو جي من بره بيجيبها معاه.

في النهاية بعد اما استعرضت قدامك كل المعلومات اللي قدرت اوصلها و كتبت منها اللي شايفة ان لو انا نفسي قررت اشتري واحدة في يوم من الايام لازم اقرا الكلام ده و في النهاية اسيبلك القرار.
كان معكم  #Trex_Magazine من داخل احدي شبورات الفيب اسمه مذرميلك مش فاهم ليه بس ريحته حلوة و الله 😍

Written by: Amr Khaled - T.Rex
#AK_TRex
#TRex_Magazine
التعليقات
3 التعليقات

3 التعليقات

انت دمك ذي العسل
شكرا علي المعلومات القيمه

معرفش ليه يا رانيا فكرتيني بشخصية برايز في فيلم ثقافي 😂😂 😂 لأ والله بهزر انتي مبسطة الدنيا و مفصلاها في كلمتين و فهمت منك الليلة المشبرة دي 👍🏼