أنقاذ أطفال الكهف - Thai Cave Rescue

أنقاذ أطفال الكهف - Thai Cave Rescue

بينما نحن نلهو مهندسين Elon musk بيبتكروا طريقة عشان يخرجوا فريق كرة قدم من الأطفال و مدربهم من كهف اتحبسوا فيه بعد ما السيول ضربت تايلند و غرقت مدخل الكهف اللي هم محبوسين فيه دلوقت محدش عارف يخرجهم وواحد من الغواصين اللي وصلهم أكل و دوا مات أثناء تأدية واجبة لأن الجزء اللي أتغمر من الكهف مش مستقيم زي أخدود ضيق كده الموضوع صعب و الخيارات محدودة بس لما يكون مهندسين sapceX , Boring مشاركين في عملية الأنقاذ ده يطمنا شوية حنشوف حيوصلوا ازاي انهم يقدروا يخرجوهم بسلام هم طرحوا أفكار كتير و حنشوف انهي واحدة اللي حتتنفذ و تنجح

-----------------------------------------------------------
تحديث 1
الفكرة اللي رسي عليها فريق Elon musk هي تصميم غواصة صغيرة بحجم طفل و مزودة بتانك اكسجين سائل مشابه للمستخدم في صواريخ SpaceX الغواصة ديه يقدر يشدها اتنين غواصين و صغيرة بما يكفي للمناورة في الأماكن الضيقة في الكهف اثناء الخروج الغواصة بدأ بنائها و حتخلص في خلال 8 ساعات و حتتشحن طيران في 17 ساعة في سباق مع الوقت و تخوف من سقوط سيول تانية الامر اللي حيؤدي لغمر أجزاء اخري من طريق خروجهم من الكهف.

____________________________
تحديث 2 عملية الأنقاذ بدأت بالفعل لان واضح ان في أمطار بدأت و متوقع انها تحدث سيول تاني في اي وقت لسه مفيش اخبار عن الغواصة بس في فريق من 5 غواصين دخل الكهف من حوالي 4 ساعات و حيبدأ في خروج الأطفال الاقوي و الأمهر في السباحة 😓😞 أولا و تم منع الصحافة من البث او التصوير عشان متعوقش عملية الانقاذ اللي ممكن تستمر اكتر من يومين 🙏 

____________________________

تحديث 3
تعليق عملية الانقاذ لليوم و ده بعد أنقاذ 4 أطفال بمساعدة 13 غواص ده غير انه تم امداد باقي الفريق بالمؤن و الأكسجين لحين أستكمال عملية الانقاذ غدا

___________________________
تحديث4
علي الجانب الأخر من الكوكب غواصة أيلون ماسك تم الأنتهاء منها و أختبارها بنجاح و التاكد من جاهزيتها للأرسال لأتمام مهمة الأنقاذ 

_________________________
تحديث5
 انقاذ الطفل الخامس وفقا لمراسل CNN بعد أستئناف عمليات الأنقاذ بنفس طريقة امبارح ارتداء مسك غوص يغطي وجهه بالكامل و مستلقي علي حاجة زي سرير أنقاذ مطاط  بيغطي جسمه بالكامل اكنه محطوط في كيس بلاستيك بس مزود بانبوب أكسجين بينما غواصين الانقاذ بيسحبوه

____________________________

تحديث 6 

انقاذ 3 اطفال اخرين و بكده يكون مجموع من تم انقاذهم 8 اطفال باقي 5 أفراد 4 أطفال و المدرب تقرير مراسل CNN حتلاقيه في الفيديو ده

___________________________
تحديث 7

ال8 أطفال اللي تم أنقذهم فحوصات المستشفي أكدت انهم بصحة جيدة ألا أنهم حيفضلوا محجوزين في المستشفي لمدة أسبوع تاني في الحجر الصحي اللي هم فيه لضمان ان محدش فيهم حصلوا عدوي حتي أن أهاليهم حتي الأن بيزوروهم عن طريق نافذة زجاجية عشان يتطمنوا عليهم. تم شحن غواصة ايلون ماسك أمبارح ألا ان ممكن بنسبة كبيرة ميحتاجوهاش بس أتبعتت أحتياطي حتي أن ايلون كان في زيارة للكهف أمبارح وفقا لحسابه علي تويتر

__________________________

تحديث 8

تم استئناف عملية الانقاذ صباح اليوم و أنقاذ 3 أطفال حتي الأن كده باقي طفل واحد و المدرب ربنا يستر بقي أنا شفت الفيلم ده قبل كده
__________________________
تحديث 9 و الأخير
تم بحمد الله أنقاذ الفريق بالكامل و المدرب و بكده تكون عملية الانقاذ تمت بنجاح بدون اي خسائر بشرية ألا
Saman Guana الغواص اللي لقي حتفه أثناء تاديه واجبه 
تحية واجبة لأي واحد بيعمل شغله علي اكمل وجه حتي لو ده حيكلفه حياته

الصورة ديه تم نشرها من احد غواصي الانقاذ و بيوضح طريقة مختلفة عن الصور اللي تم تسريبها قبل كده و هي انهم كانوا لابسين ماسك بس و الغواصين شايلينهم انابيب الاكسجين و بيساعدوهم اكيد حيبقي فيه معلومات أكتر الأيام الجاية

Written by: Amr Khaled - T.Rex

#AK_TRex

#TRex_Magazine
#Thailand #Thailandcave #ThaiCaveRescue#thaicave #CaveRescue
#Elonmusk

Stephen Hawking - ستيفن هوكينغ

Stephen Hawking - ستيفن هوكينغ

عالم الفيزياء النظرية الأشهر خلال النصف قرن الماضي و اللي نال شهرة تعادل شهرة ألبرت أينشتين و اللي يصادف وفاته اليوم  ذكري ميلاد أينشتين بالصدفة. بس قصة ستيفين هوكينغ مهمة مش بس بسبب أسهاماته في مجال الفيزياء لا كمان لأنها قصة بتعبر عن اللي ممكن تحققه قوة الأرادة و أزاي انك ممكن تغلب أي ظروف و تحديات تقابلك في حياتك لو عندك قوة أرادة و أصرار علي الحاجة اللي انت عايزها.
ستيفن هوكينغ كان عالم فيزياء نظرية و هو علم لولا انه بيعتمد علي الرياضيات كان ممكن نسميه سحر لانه بيبحث في عالم انت متقدرش تتفاعل معاه بكل مباشر بس في نفس الوقت هو الزتونة بتاعة كل العالم المادي اللي انت شايفه قدامك ده. نقدر نعتبر ستيفن هوكينغ ساحر بل واحد من السحرة المهرة في العلم ده لأنه قدر يطور نظريات مكنتنا من فهم الكون بتاعنا بشكل أوضح بداية من نشأة الكون و الثقوب السوداء و حاجات بيعتبرها البعض خيال علمي و ممكن ميكونش مصدق أنها موجودة فعلا كان الفضل للعقل الجميل ده في توضيحها و العمل علي تطوير نظريات تساعدنا علي فهم هندسة الكون المعجز اللي أحنا جزء متناهي الصغر منه.

لمحات من حياته

ولد ستيفن هوكينغ في يناير عام1942 و كان أبويه من خريجي هارفارد الجامعة العريقة المعروفة و اللي بتخرج النوابغ في مختلف المجالات و كان ليه أخ و أخت تانيين كانت العائلة كلها محبة للقراءة و التعلم مدفوعين بذكائهم الوراثي و سلوك والديهم.
درس هوكينغ في جامعة أكسفورد و هناك قابل حبيبته و زوجته اللي كانت رفيقة كفاحه و سبب من اسباب تشبثه بالحياة و اللي ساعدته كتير في أصعب فترات حياته و اللي لولاها مكنش حيقدر يكمل مسيرته خاصتا في بداية مرضه اللي بدأ يظهر عليه و هو عنده 21 سنة في صورة نوبات من التشنجات اثناء رياضة التجديف اللي كان بيمارسها بأنتظام او حتي اثناء طلوع السلم اللي وقع من عليه اكتر من مره و هنا كان دور أسرته اللي وقفوا جنبه و عرضوه علي المختصين اللي شخصوا حالته بمرض أسمه "مرض العصبون الحركي" و اللي بيسبب شلل للشخص المصاب تدريجيا لحد وفاته و اللي قدرها الأطباء بسنتين بالكتير لو كان محظوظ.
و هنا بدأت مرحلة من حياة هوكينغ كانت كفيلة انها تكون أخر فصل في حياته.

بس زي ما قولنا بفضل الارادة و التصميم و الحب و مساندة الناس اللي حواليه ليه قدر ستيفن هوكينغ أنه يطور من طرق تساعده في القيام بأبحاثه مع تطور مرضه و مع تطور المرض عرضت عليه زوجته أنه يستعين يكون المساعد الشخصي ليه و يساعده في حساباته و كتاباته و كان شرف عظيم و فرصة لكل اللي أشتغلوا مع عقلية لامعة حتي مع مرضه و اللي بفضل مقاومته كان بيتطور أبطامن اللي تنبأ بيه الاطباء بس للأسف وصل لمرحلة انه بقي مشلول بالكامل حتي القدرة علي النطق فقدها تدريجيا لك ان تتخيل ايه اللي بحصل جوه عقل بالشكل ده و هو مش عارف يعبر عن أفكاره و ينظمها و يعمل الحاجة الوحيدة اللي مصمم لعملها بس ستيفن كان أقوي من كده كان كل حاجة بتتم في دماغه كمثال تخيل انك بتحل مسأله تفاضل أو تكامل من غير ما تكتبها جنان رسمي بس هوكينج زي ما يكون ربنا عوضه بنشاط هائل في دماغه يعوض شلل حركته كانت مشكلته التانيه طب هو حيوصل للعالم اللي هو بيفكر بيه أزاي هنا كان دور العلم و التكنولوجيا أنهم يردوا الجميل لواحد كرس حياته للعلم. صممت شركة انتل كرسي ثوري ليه يمكن هوكينج من استخدام حركة عينه باختيار كلمات و تكوين جمل يقدر هوكينج يتواصل بيها مع الناس نقدر نقول العلم و الهندسة أدوله فرصه انه يكون سايبورغ حرفيا.

أسهاماته العلمية

الSingularity أو حالة التفرد كانت واحدة من أكتشافات هوكينج او نقدر نقول ان ليه النصيب الاكبر في أكتشاف انها حالة نشاة الكون و علاقتها بالثقوب السوداء و ان ازاي كل قوانين الفيزياء مبتطبقش داخل الثقب الأسود بسبب الجاذبيه اللامتناهية اللي في مركزه. تقدر تقول أن فيلم Interstellar قائم علي نظريات بدأها ستيفن هوكينج
الBig Bang Theory و اللي علي الرغم من ان ستيفن هوكينغ كان شخص بينكر وجود ربنا استغفر الله يعني ألا ان النظرية ديه بتثبت أن الكون فعلا أتخلق من العدم  و انه بدأ من ولا حاجة و انه في توسع مستمر و حيجي يوم يفقد الزخم بتاع الأنفجار و كل حاجة حتتلم و ترجه لنقطة الأصل تاني و وواضح ان ذكائه مقدرش يجيب ان الكلام مش ممكن يحصل لوحده بدون خالق سبحانه و تعالي قدرته و  عظمته بتتعدي كل شئ.
أكتشاف اشعة Hawking و اللي بتصدر من قلب الثقوب السوداء علي عكس كل النظريات ان الثقوب السوداء بتمتص كل حاجة بس. ده غير مؤلفاته اللي كان بيحاول يبسط فيها العلم لعامة الناس و اللي بيشرح فيه نظرياته عن نشأة الكون و تطوره ما بعد الأنفجار الكبير و من أبرز مؤلفاته و اللي متنفعش متكونش عدت عليك لو كنت مهتم بمجال الفيزياء متكونش عدت عليك
تاريخ موجز للزمن, الكون الوليد و الثقوب السوداء, الكون في قشرة جوز, التصميم الكبير.
سنة 2014 أتعمل فيلم أكثر من رائع عن قصة حياة ستيفن أسمه Theory of Every Thing بطولة الرائع Eddie Redmayne و اللي نال عنه جايزة الأوسكار أحسن ممثل.

Stephen Hawking رحل النهاردة 14 مارس 2018 بعد ما ضرب لنا مثل في الكفاح و الأرادة و كرس عقلة طول حياته لفك غموض و أحجية الكون و يورينا قد ايه اننا ممكن نعمل اي حاجة و نتغلب علي ظروفنا مهما كانت عشان نوصل للأحنا عايزينه.

Written by: Amr Khaled - T.Rex

#AK_TRex
#TRex_Magazine

Nobel prizes 2017 - جوائز نوبل

Nobel prizes 2017 - جوائز نوبل

طيب بما أن ال3 جوايز نوبل Nobel Prize ل2017 اللي تخصنا كعلماء او مهتمين بالعلوم تم اعلانهم خلاص نحب بكل فخر نعلنهم أحنا كمان كأحد أرفع الجوايز العلمية علي مستوي العالم:

جائزة نوبل عن فئة الفيزيولوجي أو الطب: مايكل يونج Michael W. Young و مايكل يوزباش Michael Rosbash و جوفري سي هول Jeffrey C. Hall عن أبحاثهم المتعلقة الأليات الجزيئية التي تتحكم بأيقاع الساعة البيولوجية.

The Nobel Prize in Physiology or Medicine 2017 was awarded jointly to Jeffrey C. Hall, Michael Rosbash and Michael W. Young "for their discoveries of molecular mechanisms controlling the circadian rhythm

جائزة نوبل عن فئة الفيزياء لكل من العلماء: كيب ثورن Kip S. Thorne، باري باريش Barry C. Barish وراينر ويس Rainer Weiss، لإسهاماتهم في رصد أمواج الجاذبية اللتي تنبأت بها النسبية العامة و تم أثبات و جودها عن طريق تجاربهم.

The Nobel Prize in Physics 2017 was divided, one half awarded to Rainer Weiss, the other half jointly to Barry C. Barish and Kip S. Thorne "for decisive contributions to the LIGO detector and the observation of gravitational waves".

جائزة نوبل عن فئة الكيمياء لـ "جاك ديبوشيه Jacques Dubochet ويواكيم فرانك Joachim Frank وريتشارد هاندرسون Richard Henderson" عن تطويرهم آليّة لإظهار البنية الجزيئية للجزيئات الحيويّة المعقدة بدقة عالية عند درجات حرارة منخفضة تعتمد على المجهر الالكترونيّ.

The Nobel Prize in Chemistry 2017 was awarded to Jacques Dubochet, Joachim Frank and Richard Henderson "for developing cryo-electron microscopy for the high-resolution structure determination of biomolecules in solution".

مظنش أن فيه فخر و شرف و تخليد في التاريخ للناس ديه أكتر من الجايزة ديه بالنسبالهم.
حيتعمل حلقة منفصلة لكل أنجاز علمي في ال3 و حنوضح فيه كل فريق فيهم وصل لأيه و ايه أهمية اكتشافه او بحثه ده.

Written by: Amr Khaled - T.Rex

#AK_TRex
#TRex_Magazine

خلق البعض لتشكيل عالمنا - ألان تورنج

خلق البعض لتشكيل عالمنا - ألان تورنج

ألان تورنج Alan Turing هو مبتكر فكرة أختبار تورنج Turing Test و ......
أختبارات ايه بس أحنا فين و الأمتحانات فين ما تفتكرلنا سيرة عدلة و مين تورنغ ده أصلا اللي عامل أختبار ده كمان أنا بدأت اتشائم.
ثم منا ممكن اعمل اختبار و أسميه أختبار أشرف ايه الاسهام العلمي في كده.
طب أكمل كلامي... مبدأيا متخافش مش الأختبارات اللي بالك فيها ديه يكفينا الشر و تورنغ اللي مش عاجبك ده هو سبب من أسباب أنك بتقري الكلام ده دلوقت.

الان تورنج هو عالم أنجليزي ولد عام 1912 بسبب ظروف عائلية قضي معظم طفولته في دار رعاية برغم من أن عائلته علي قيد الحياة. درس الكيمياء العضوية و أنهاها بشكل كامل و هو عنده 13 سنة . برع في الكيمياء و الرياضيات و قدر انه يفصل الايودين عن الاعشاب البحرية و يثبت الدالة المثلثية المعكوسة قبل ما يتم 15 سنة.
درس ألان تورنج في جامعة بريستون و اتخرج 1938 مفيش سنة و بدأت الحرب العالمية الثانية 1939 اللي ساعد في أثنائها فك شفرة النازيين بفضل خبرته في الرياضيات و الحواسيب.
ثواني بس حواسيب ديه اللي هي كمبيوترات انت حتشتغلنا كمبيوتر ايه اللي موجود في الحرب العالمية الثانية ديه؟؟!
تقدر تقول ان الان تورنغ هو من الرواد في مجال الحواسب و بينسب ليه الفضل في أبتكار فكرة الكمبيوتر و تطوير أول أله تقدر تحل حوارزميات و عمليات حسابية معقدة كانت بتاخد من البشر شهور و سنين في حلها و قدم للحلفاء وقتها ما يعرف باله تورنج و اللي كانت من اسباب فوز الحلفاء بالحرب العالمية الثانية.
 تم تجسيد قصة الان تورنج و فك شفرة النازيين عن طريق  Enigma Machine تم انتشالها من احد غواصات النازيين
في فيلم" The Imitation Game" عام 2014.

اله تورنغ ظهرت للنور لأول مرة في ورقة بحثية نشرها الان تورنج 1936  بعنوان "on computable numbers" عرض وقتها فكرة الحسابات المميكنة تخيل ألان تورنغ انه بقدر يبقي عنده اله قادرة علي التعامل مع شريط مغناطيسي زي بتاع الكاسيت او الفيديو و انه يقدر يكتب عليها (0,1) لغة الأله او الBinary code و تقدر الاله ديه تكتب و تمسح البيانات ديه و الغرض منها كانت انك تديها عملية حسابية معينة وبعد اجرائها لسلسلة عمليات و تبديل بين الشرايط و التجربة انها تقولك العملية ديه قابلة للاجراء ولا لا. بس الجميل ان اله تورنج تقدر تعمل كل اللي بتعمله الكمبيوترات بتاعتنا دلوقت بس بشكل بدائي و مبسط.

 عام 1945 قدم اول نموذج للحاسب الالي بسعة تخزينية 4kb و ده كان انجاز علمي وقتها بمخبر الفيزياء بلندن.

و في عام 1948 قدملنا تورنغ اول جهاز كمبيوتر في العالم قابل للبرمجة اثناء عمله بمختبر الحاسوب بمانشستر.
عمل بعدها تورنج عدة ابحاث بأستخدام خبرته في الحواسيب و الكيمياء العضوية في اختبار صيغ الكيمياء الحيوية و محاكاة التركيبات المختلفة عن طريق الحواسيب بتاعته.
 في عام 1948- 1950 نشر الان تورنج كتاب بعنوان "Artificial intelligence -A philosophy Introduction " و ديه اول مرة يستخدم فيها المصطلح المرعب ده الذكاء الأصطناعي.
في كتابه حدد تورنج اليه عمل الاله و عرض ازاي بتفكر و بتتبع الخوارزميات بتاعتها و بتنفذها و هل فعلا ممكن توصل الاله لمستوي ذكاء الانسان و هنا بدأ يشرح أختبار تورنج.
أختبار تورنغ هو أختبار من تصور الان تورنغ عن كيفية التفريق بين الانسان و الاله بمعني اكتر وضوحا ازاي اعرف اني بكلم انسان مش ذكاء اصطناعي.

 اختبار تورنج Turing Test ببساطة في شكله اللي تخيله الان تورنج بيتكون من 3 حواسيب 2 بيتحكم فيهم بشر و شرط انهم يكون ملمين المام تام بالحواسيب  و التالت ذكاء أصطناعي, واحد من البشر هو اللي بيعمل الاختبار بأنه بيبدأيطرح أسئلة عن طريق الحاسوب بتاعه للحاسوبين التانين و بيدا الانسان التاني يرد عن طريق الحاسوب بتاعه و نفس الكلام الذكاء الاصطناعي و في أخر الاختبار بيحدد الحكم اللي بيستجوب الكيانين اللي قدامه انه يحدد اي الكيانين بشري و ايهم ذكاء اصطناعي.
الموضوع صعب لأنه بيعتمد علي العنصر البشر و خبرته  بس مظنش ان حد يقدر يحكم بصفة البشرية او الادراك الذاتي غير كائن مدرك.
بس الموضوع فيه ظلم اكيد الكمبيوتر حيبقي متفوق في اسئلة الارقام و المعلومات عن الانسان العادي بس الموضوع حيبقي معقد اكتر لما تتطور الاسئلة لحاسس بايه او بتفكر في ايه مثلا او حاجة زي عارف فيلم تيتانيك و اللي حيبقي بالنسبة للكمبيوتر مجرد داتا حيجيبها من علي الانترنت فحين الانسان حيقدر يوصل فهم اعمق للقصة الرومانسية و المشاعر المتناقضة و المأساويات و مشهد روز و مشهد الحنطور ده جزء من الادراك اللي بيخلينا بشر.
هل فيه ذكاء اصطناعي نجح انه يعدي أختبار تورنج قبل كده؟؟؟؟؟!
حصل برنامج "يوجين جوستمان Eugen Goostman" هو برنامج ذكاء اصطناعي تم تطويره بواسطة "فلاديمير فيلسيوف ويوجين ديشمينكو وسيرجي ألاسين"  و هو عبارة عن برنامج محادثة بيحاكي طفل أوكراني عنده 13 سنة و اللي قدر يقنع 33% من الحكام انهم بيكلموا طفل فعلأ و ديه نسبة كبيرة جدا محصلتش قبل كده مفيش ذكاء اصطناعي اجتاز الاختبار قبل كده اصلا ولو ب1%. حصل الكلام ده سنة 2014 في الجمعية الملكية البريطانية.
و ده بيخلينا نسأل هل فعلا أختبار تورنغ بقي عملي خاصتا بعد أنتشار الMachine Learning أو تعلم الاله انت نفسك أكيد اتعاملت مع Chat bot من بتوع الفيسبوك زي احكيلي حدوتة .....
الbots ديه مسبقة البرمجة انها ترد عليك ردود معينة بس الهدف منها للفيسبوك انها تتعلم منك الكلام و طريقة التفكير و المصطلحات و أحيانا بيحصل انها تتطرف و تطور لغتها الخاصة زي اللي حصل قبل كده مع أحد برامج و حكيناه في المقال ده"شد الكبس بسرعة - AI"
لو عايز تفهم أختبار تورنج بصورة درامية و مستقبلية اكتر أتفرج علي فيلم Ex Machina.

توفي ألان تورنج عام 1954 منتحرا بتفاحة مسممة بمادة السيانيد بسبب أتهامه بالشذوذ و اللي كان بيتعامل وقتها انه مرض نفسي و تم تخييره بين الحبس او العلاج الا انه فضل العلاج اللي سببله أكتئاب و قرر الانتحار.
الأسطورة بتقول ان سبب اختيار التفاحة كشعار لأبل يرجع لتفاحة ألان تورنج بس تم نفيها من مسئوليين أبل.
غريب أنك تلاقي شخص بيفكر في حاجة و بيتنبأ بالتطور اللي ممكن يوصل ليه أختراعه اللي لسه كان بيخطو خطواته الاولي بس ده مش غريب لما يكون الشخص عبقري و ربنا جعله من اسباب خلقه انه يشكل عالمنا.
كان معكم #AK_Trex من أمام احدي شاشات الحاسوب (فكر كده مش ممكن اكون AI).

Written by:Amr Khaled - T.Rex
#AK_TRex
#TRex_Magazine

خلق البعض لتشكيل عالمنا - الخوارزمي

خلق البعض لتشكيل عالمنا - الخوارزمي

يعني ايه خواريزمية؟!
ده كان سؤال أحد قراءنا في أحد مواضيعنا عن الذكاء الأصطناعي و الاجابة ان الخواريزمية أو الAlgorithm ديه عبارة عن خطوات رياضية و منطقية متسلسلة بطريقة مرتبة لحل مشكلة ما. وضربنا مثال ساعتها بالكود أو السوفت وير بتاع أي برنامج أو روبوت. كلمة خواريزمية نفسها بقي مشتقة من أسم العالم اللي حنتكلم عنه النهاردة و هو محمد بن موسي الخوارزمي الملقب بالخوارزمي أو المجوسي القرطبي عند بعض المؤرخين.

ايه الأضافة اللي عملتها الشخصية ديه عشان ينسب ليها مسمي حاجة جت بعده بقرون عديدة؟
نبدا من الأول خالص أختلفت الورايات عن تاريخ ميلاد الخواريزمي بس اللي متاكدين منه أنه عاصر الخليفة هارون الرشيد و من بعده أبنه المأمون.أسم الخوارزمي جي من أقليم خواريزم بوسط اسيا بس يقال ان ده أصله او أصل أجداده نفس الموضوع بالنسبه للقب الماجوسي القرطبلي و برضه اللي يقال انه لانه كان معتنق الماجوسية و أسلم أو اهله برضه المصادر التاريخية مش دقيقة في الموضوع ده بس هو قعد فترة في مدينة قرطبل بالعراق و من هنا جه أسم القرطبلي.
العراق تحديدا مدينة بغداد كانت مصدر أشعاع ثقافي في الفترة ديه بفضل أهتمام هارون الرشيد من بعده أبنه المأمون بأنشاء المكتبات و جمع المخطوطات من كل اللغات و أسنادها لعدلماء زي الخوارزمي لترجمتها و حفظها كمان بالأستناد للمعرفة القديمة بنوا المراصد الفلكية و كلفوا علماء كان من أبرزهم الخوارزمي برسم الخرائط و اللي بالفعل بأستخدام كتابات لبطليموس بقيادة 70 عالم أخر قاموا بأعادة رسم خريطة الأرض باللغة العربية بعد تصحيح و أضافات تمت عليها و الف كتاب في الموضوع ده بأسم صورة الأرض. ده غير كتابات تانية عن كيفية أستخدام الاسطرلاب. الاسطرلاب هو عبارة عن أله فلكية قديمة و هي بتحاكي عمل القبة السماوية في وقتنا هذا ووظيفتها تحديد اماكن الاجرام السماوية في اوقات معينة و اللي عن طريقها قدروا يعملوا حسابات فلكية معقدة في الوقت ده.

كمان من أشهر ترجماته في مجال الفلك كتاب بأسم زيج السند هند و هو ترجمة و تلخيص لكتاب هندي من الكتب الرائدة في مجال الفلك و اللي كان بيحتوي علي جداول بتوضح مواقع النجوم و الشمس و القمر في أوقات السنة المختلفة و بيعتبر أول الترجمات العربية في المجال ده و اللي اعتمد عليها علماء الفلك العرب فيما بعد.
بس مش هو ده اللي خلد أسم الخواريزمي. اللي خلد أسمه كتاب أسمه "الجبر و المقابلة" الكتاب ده ألفه الخوارزمي بأشارة من الخليفة المأمون و اللي أهداله الخوارزمي الكتاب عشان يحل مشكلات حسابية معقدة في الامور المالية و الورث و تحديد مساحات الأراضي و عمليات معقدة بتستخدم في التجارة و حسابات الميراث و مسح و تخصيص الاراضي و ديه حسابات كان بيصعب عملها في الوقت ده. عكف الخاورزمي في دار الحكمة و هي تعتبر بهيئة البحث العلمي في الوقت ده في تأليف الكتاب و بدون ما يشعر الخوارزمي كان بيأسس لعلم الجبر فوضع نماذج لحل المعادلات الخطية و المعادلات متعددة الحدود من الدرجة التانية. الخوارزمي بيذكر في كل المراجع علي أنه واحد من اتنين قام علي اكتافهم علم الجبر اللي نعرفه دلوقت مع العالم اللاتيني ديوفانتس السكندري.
مش الجبر بس الخوارزمي قام بنقل الأعداد الهندية للعالم كله بعد ما حط التاتش بتاعه الصفر. قبل الخوارزمي كنا بنتعامل مع الارقام بالحروف عادي 15 كنا بنكتبها خمسة عشر بس بعد ما دخل الأرقام و أضاف الصفر بحيث انه حسب زيادة عدد الاصفار قدر يوصل لارقام أكبر عن المتعارف عليها في الارقام الهندية قدر انه يوجد النظام العشري للأرقام.
أنجازاته في الجبر و الحساب و الجغرافيا غير كتالوجات استخدام الاسطرلاب و الساعة الشمسة و الاجهزة الفلكية القديمة كانت كفيلة انها تقوم حضارة بأكملها بل و يتم أستخدام الكلام ده كأساس متين يمهد لظهور أختراعات و تطبيقات عملية حتي الخوارزمي نفسه مكانش يتخيلها.

أحنا كنا رواد العالم وقتها في عصر كانت أوروبا بتتخبط في الظلمات عشان خدنا بأسباب التقدم و عرفنا في الوقت ده أهمية العلم و العلماء للنهوض بالدول و تطبيق الأكتشافات الحديثة و العلوم لأدراة الدولة و أستخدام مواردها بالصورة المثلي ناهيك عن حل مشاكل المجتمع و المعضلات اللي بتوجهه عشان يتقدم و يزدهر.
كان معكم #TRex_Magazine  من العصر العباسي.🚨🚨🚨🚨🚨

خلق البعض لتشكيل عالمنا - نيكولا تسلا

خلق البعض لتشكيل عالمنا - نيكولا تسلا

السلسلة ديه من اوائل الحاجات اللي بدأنا معاكوا بيها و الهدف منها اننا كنا نعمل سكوب علي شخصيات لعبوا دور كبير في تغيير نمط حياة البشرية و كان لأسهامتهم الآثر الأكبر علي حياتنا.
ازاي ابتدوا و ازاي نجحوا او فشلوا حيعلمنا دروس كتير حتفيدنا و حتكون مصدر الهام لينا.

نيكولا تسلا - Nikola Tesla

بالرغم من ان اسم توماس اديسون سمعناه كتير و احنا صغيرين و علق في دماغنا الا ان محدش ذكرلنا اسم تسلا الا في ثانوي تقريبا. نيكولا تسلا مبدأيا كده هو اللي اخترع التيار المتردد و تبسيطا للموضوع ديه الكهربا اللي بتجيلنا من الفيشة و معظم الكهربا اللي بتستخدمها في حياتك من يوم ما تتولد بيكون مصدرها التيار ده بصورة او بأخري.
ايه تاني غير الكهربا ابحاث رائدة في مجال موجات الراديو و اللي كانت السبب في خروج جهاز الراديو للنور عن طريق الايطالي ماركوني و اللي كان فيه مشكلة بينه و بين تسلا علي احقية نسب اختراع الراديو.كهربا و راديو دول تقريبا اللي قامت علي اكتافهم الحضارة الانسانية بالصورة اللي احنا شايفينها دلوقت جالنا منين تسلا ده عشان يغير شكل العالم و ينور الحضارة البشرية.
مولد نيكولا تسلا كان 10 يوليو 1856 و اللي الاسطورة بتقوله انه كان يوم فيه عاصفة رعدية اللي لما الداية قالت لوالدته ان ده نذير شؤم قالتلها بالعكس انه حيكون السبب في النور للبشرية 😂.

نيكولا تسلا اتولد في صربيا و نشأ هناك و درس الهندسة الميكانيكية و الكهربية و اكتسب خبرة في مجال خطوط الهاتف. حياته اتغيرت للكامل بعد ما حصل علي خطاب ترشيح للعمل عند توماس اديسون و اللي كانت معامله و شركاته بدأت توعد الطبقة الارستقراطية بالاضائة الدائمة و كانت عندها تمويل ضخم و كانت ذات صيت في كل ارجاء الولايات المتحدة.

وصل نيكولا تسلا نيويورك 1884 و اتقبل للعمل في مختبرات اديسون. و بفضل كفائته الكبيرة نجح انه يكون سمعه طيبه و شهد اديسون بنبوغه حتي انه شجعه علي تطوير مولدات اديسون بانه لو وصل بيها بالكفائه اللي شرحها لاديسون حيديله مكافئه كبيرة. نفذ تسلا ابتكاراته و طور مولدات تسلا بشكل كبير الا ان اديسون اداله بومبه و قاله ان وعده ليه كان مجرد مزاح امريكي عشان يحفزه مش اكتر و ان بسبب توسع مختبرات اديسون مش حيقدر يديله اي مكافئه. هنا الدنيا قفلت في وش تسلا اللي استقال من شركة اديسون لانه حس انه استغفله و انه عمال يرص طوب في ابراطورية حد تاني بس تسلا ما لمش شنطته و رجع بلدهم. تسلا فتح مختبراته الخاصة في نفس الشارع اللي فيه مختبرات اديسون بس خد طريق تاني في الوقت اللي اديسون كان شغال فيه علي التيار المستمر و ده تبسيطا الكهربا اللي بناخدها من البطاريات كمثال. تسلا اثناء عمله علي المولدات ادرك مزايا التيار المتردد و حاول يقنع بيه اديسون اللي كان رافضه رفض قاطع و بيصر بعدم جدواه.
التيار المتردد بمميزاته انه يقدر يمشي في الاسلاك لمسافات طويلة و نقدر نتلاعب فيه عن طريق المحولات كانت اول تحدي لتسلا كصاحب شركة مش مجرد موظف بيتقضي اجر و مستني مكافئة.
سنة 1888 كانت تسجيل برائة اختراع مولد التيار المتردد بمساعدة و تمويل مجموعة مستثمرين نجح تسلا انه يسجل اختراعه و بدأ يسوق لمميزات التيار المتردد اللي لفت انتباه مستثمر كبير زي ويستينج هاوس أليكتريك و ديه كانت شركة رائدة و اسم كبير في المجال ده . بس اديسون ادرك ان الوحش اللي سيبه من القفص ممكن يزلزل عرشه و بدأ الحرب عليه و بدأ ما يسمي بحرب التيارات بأنه يعمل حملات تحذر الناس من خطورة التيار المتردد لدرجة انه كان بيعمل معارض و يكهرب الحيوانات في الشارع و بيروج للتيار المتردد علي ان الاستخدام الامثل ليه هو الاعدام بالكرسي الكهربائي.

الحرب ديه نهاها تسلا بضربة قاضية بالتعاون مع ويستينج هاوس الكتريك لما نجح انه يعمل عرض ضوئي مبهر في معرض كولومبيا بشيكاغو حرفيا قلبها ظهر علي وصف الناس وقتها و اسر قلبهم ان الطاقة ممكن تنورلهم دنيتهم مش للتدمير.
و بكده تسلا كسب حرب الترددات و انتهي عصر تيار اديسون المستمر.
ترويض شلالات نياجرا كان التحدي التاني لتسلا و ويستنجهاوس ازاي يقدر يولد الطاقة من الشلالات ديه.عكف تسلا علي تصميم مولدات هيدروالكتريك بقدرة 5000 حصان و ده كان رقم قياسي وقتها و نجح انه يصنع 3 مولدات بالحجم ده و برغم من الرعب انهم ميشتغلوش بالكفائة المصممين عليها الا ان مع بداية التشغيل نجحت نجاح مبهر و بدأت الكهربا تدخل البيوت بيت ورا التاني و تم اضائه الشوارع و تم تصنيع مولدات اكتر بحيث ان تم اضائة نيويورك بالكامل.

موجات الراديو بالنسبة لتسلا كانت من اهتماماته الشديدة اللي عكف علي دارستها حتي انه عمل عرض في بركة بحديقة للتحكم بقارب صغير حتي ان الناس افتكروها خدعة لان فكرة التحكم عن بعد كانت زي السحر كده. التحكم عن بعد و ارسال و استقبال الموجات الي تسلا بنالها برجه الشهير بلونج ايلاند بتمويل من جي بي مورجان و اللي ادركت انه مش بس عايز يبث موجات راديو ده عايز يوصل كهربا للكوكب كله وايرلس.

الموضوع ده طبعا كان حيدمر استثمارتهم كهربة ايه اللي عايز تخليها مشاع و اي حد يستخدمها و بسبب الخلاف ده و تركيز ماركوني علي الراديو كوسيلة لنقل البيانات تم الانسحاب من تمويل تسلا و تمويل ابحاث ماركوني بعد نجاحه عمليا انه يبعت  اشارة مورس عبر المحيط الاطلسي و بكده زي ما تسلا عمل في اديسون كان الدور عليه ان ماركوني ياخد الريادة مكانه في المجال ده خاصتا بعد الاعتراف رسميا 1904 بيه كمخترع للراديو اينعم ان حقوق الاختراع رجعت لتسلا مؤخرا الا انه كان كفيل يطفي نجم نيكولا تسلا خاصتا انه كان سئ في البيزنس و محفظش حقه باي حصص في الشركات اللي قمت علي اختراعاته و مات تسلا فقير بمعاش كانت بتديهوله شركة ويستينجهاوس في الفندق اللي مكانش بيعرف يدبر ثمن اقامته فيه عام 1943.

أبرز أختراعات تسلا و رؤاه المستقبلية:
- التيار المتردد.
-لمبات الفلوروسنت.
- المحرك الكهربي.
- الريموت كنترول.
-الراديو.
- توليد الاشعة السينية
-نقل البيانات وايرلس .
-الروبوتات.
-الليزر.

-الطاقة اللاسلكية للكوكب بالكامل.

تسلا كان جموحه و عبقريته بتعدي الحدود التجارب السرية و الاساطير اللي اتحكت عنها زي تجربة فيلادلفيا كمثال كانت شاهدة علي ده غير تجارب سرية كتير مخفية الي وقتنا هذا. الا ان العبقرية في مجالك ممكن تخليك موظف شاطر بس من غير دراسة بيزنيس حيحصلك زي تسلا و حتي كتب التاريخ مش حتديلك حقك.
و أعرف ان العيشة في جنينة الحيوانات مريحة بس الحيوانات القوية في البرية هي اللي بتاخد كل حاجة.
كان معكم #TRex_Magazine من داخل احد اقفاص جنينة الحيوانات مؤقتا 😉.

Written by: Amr Khaled- T.Rex
#AK_TRex

خلق البعض لتشكيل عالمنا- ايلون ماسك-

خلق البعض لتشكيل عالمنا - ايلون ماسك (Iron Man)

كاريير ايلون ماسك كاريير ملهم جدا من 500$ الي 15B$  الراجل ده بيتنقل من نجاح لنجاح تقريبا مفيش شركة مكنش جزء منها مبقتش حاجة كبيرة جدا بس بالتاكيد ده مش وليد صدفة او حظ انه يقدر يعرف الفرصة فين او انه يلاقي النجاح و هو مبيصحاش بين يوم و ليلة بيلاقي الشركة اللي فكر في انشائها ناجحة.
تقدر تقول انه بيبذل اقصي مجهود عنده و بيدي شركته كامل طاقته حتي و هي لسه فكرة علي الورق عشان هو مؤمن بيها و ده بيخلي المستثمرين و اصحاب القرار يؤمنوا بيها برضه بس ده مكنش حليفة من البداية.
البداية كانت ان ايلون ماسك ولد عنده 12 سنة بدأ شغفه لتعلم البرمجة و عمل لعبة بسيطة اسمها بلاي ستار قدر يبيعها ب500$
و كونه ابن لمهندس نمي حبه للهندسة و ادراكه لمدي الدور بتقدمه للانسانية و لما عيلته قررت تهاجر و هو عنده 17 سنة من
جنوب افريقيا الي كندا ثم الي اميريكا بدأ في دراسة الفيزياء في جامعة بنسلفانيا.بعدها درس اقتصاد و ريادة اعمال في مدرسة وارتون ثم انتقل لكاليفورنيا عشان ياخد الدكتوراة بس ادرك انه تشبع اكاديميا خلاص وانه حان الوقت ان افكاره تسيب الورق و يبدأ تنفيذها علي ارض الواقع.
كام واحد مننا طلع المفكرة بتاعته قرر انه يخرج من دايرة روتين حياته و ينفذ الافكار المجنونة اللي فيها؟!

متأثر بأول فلوس كسبها في حياته من البرمجة أنشأ شركة متخصصة للبرمجيات مع اخوه اسمها ZIP2 و كانت متخصصة انها تبيع برمجيات دليل للصحف و المجلات و كانت بتستقطب صحف مشهورة زي نيويورك تايمز.
ايلون ماسك لحد المرحلة ديه متمسك بسكة البرمجة فشارك في تاسيس موقع X.COM و هي شركة بتوفر ميزة الدفع عبر الانترنت تم دمجها بعد كده مع شركة اسمها كونفينيتي و كان ثمرة اندماجهم هو موقع PAY PAL  و حتي وقتنا هذا بيمتلك منهااجمالي اسهم بنسبة 11.7% و ديه كانت بداية ثروته الحقيقية.
مفكرة ايلون ماسك مخلصتش و الافكار المجنونة اللي فيها مكانتش مقتصرة علي البرمجة بس ايلون ماسك كان عينه علي حاجة ابعد.
في الوقت اللي كانت ناسا بتعتمد فيه علي مكوكات الفضاء بتكلفتها الكبيرة و تكلفة الاطلاق المهولة غير ان معظم المركبات و الصواريخ مكنش بيعاد استخدامها الا في حالة المكوك.عرض ايلون ماسك علي مسئولي ناس تصاميم لصواريخ يمكن استخدامها اكتر من مرة الا ان الموضوع مدخلش دماغ ناسا و ده خلاه ياخد خطوة جريئة محدش عايز يمول مشروعي طب انا حرمي فيه كل الفلوس اللي كسبتها في حياتي و بالفعل اسس SPACEX  و من 2002 لحد 2010 كان شغال علي تطوير الصواريخ لحد ما اخر مكوك قام برحلته الاخيرة ساعتها قررت ناسا انها تتعاقد معاه ولاول مرة انها تتعاقد مع شركة اهلية (جابوا ورا 😄) عشان تحمل صواريخها المعدات بتاعتها للفضاء.كمان هو اعلن انه بصدد انه يبعت اول بعثة بشرية للمريخ قبل 2030و جري بالفعل اختيار الاشخاص و جاري تدريبهم و تطوير وسائل تحقيق الفكرة ديه.غير انه بيقول اننا لو في القرن اللي جاي مبقناش بنسكن كواكب وانظمة شمسية تانية الموضوع حيبقي محبط جدا وانه شغال علي ده لانه مبيحبش يخيب امله.

علي التوازي كان ايلون ماسك شغال في حاجة تانية كان معتبرها البعض مش وقتها بسبب تكلفتها العاليةجدا و التحديات اللي بتواجهها و هي السيارات الكهربية اتاسست شركة TESLA في 2003 و بعد 13 سنة من تاسيسها تخطت قيمتها السوقية قيمة جنرال موتورز العريقة اللي كملت 114 سنة في السوق الامريكي و ده لانها فعلا بتنتج عربيات منافسة حنتكلم عنها بالتفصيل في موضوع تاني بس الفكرة انه فعلا بيشتغل علي تطوير الحاجة لفترة كبيرة فبنا اكبر مصنع بيعمل بالطاقة الشمسية بعد استحوازه علي شركة اسمها SOLAR CITY المصنع يكاد يكون يدار كليا بروبوت من تصميم شركته.العربية بتواكب التطور لانها بتسوق نفسها بذكاء صناعي خاص مصنع GIGAFACTORY بيعمل علي انتاج سيارة تسلا بكميات كبيرة و ده حيقلل تمنها و ديه الاستراتيجية اللي هو معتمدها هو مش بيعمل سيارة تجريبة بيستعرض فيها التكنولوجيا زي كل مصنعي السيارات لا ده بيصنع سيارة بكمية عشان تطلع عالطريق دلوقت.Solarcity كمان بدأت في انتاج اسقف للبيوت مزودة بخلايا طاقة شمسية بشكل الاسقف التقليدي.

في بداية 2017 كتب ايلون ماسك علي تويتر انه في شركتين جداد بيفكر فيهم بعدها اعلن عن شركة NEURALINK وديه الشركة اللي هدفها هي اختراق دماغ الانسان و دمجه بالالة من وجهة نظرة ان ده التطور الجي اننا لو دمجنا الالة مخ مخ الانسان قدرات الشر حتضاعف التطبيقات للتقنية ديه غير محدودة زي كل افكارالون ماسك بس ديه مش اول ولا اخر فكرة مجنونةز
الفكرة التانية او الشركة التانية كانت BORING Company و ده الاسم اللي استقر عليه ايلون ماسك بعد ما طلب من متابعيه علي تويتر يسموله شركته الجديدة و اللي حتحفر انفاق تحت لوس انجلوس تنقل فيها مش مترو انفاق لا حتنقل عربيات بالناس اللي فيها وبضائع و حتكون بذرة بداية حتساعده للHYPERLOOP الفكرة اللي لاقت ترحيب كبير لانها بتحل مشكلة الوقت في النقل بشكل كلي.

و اخيرا انا كعمرو منبهر بالراجل ده و شايف ان فعلا لو الواحد ادي الحاجة اللي بيحبها وقته و اهتمامه و امن بيها حيجبر الناس كلها انها تؤمن بيها و حتبقي افكاره علي ارض الواقع مش حبر علي في ورق في النوته بتاعته.و انك ممكن تكسب فلوس بس و انت بتضيف قيمة كبيرة جدا للبشرية و تعمل تاثير كبير علي العالم.
المصادر:
https://www.forbes.com/profile/elon-musk/
قصة نجاح ايلون ماسك
https://www.tesla.com/
http://www.spacex.com/
https://www.neuralink.com/

Written by: Amr Khaled - T.Rex

#AK_TRex

#TRex_Magazine