سلسلة تعرف - حصان البحر

اول مرة شوفت البتاع ده كان في توم&جيري و كنت فاكرهم بيهزروا لان شكله مسخرة الصراحة و مش حقيقي حتي لطفل لحد ما في مرة شوفته متحنط في المتحف الزراعي
تعرف ان الكائن ده مش بس شكله اللي غريب ده سبحان الخالق عنده لسته غرائب
نبدا بالمعلومات العادية فيه 20 نوع من الكائن ده متوزعين علي مستوي العالم بيبقي راشق عادتا جنب اي مكان فيه شعب مرجانية عشان كدا حاجة مبدايا لانه بالرغم انه شبه الحصان الا انه بطئ اجدا في السباحة و ده لانه بيستخدم زعنفه صغيره في اسفل ظهره للسباحة بيحركها بسرعة 35 مره في الثانيه بتديله سرعة تصل الي 1.5 في الساعة بالتربو 😂 بالسرعة و القدرة عالمناورة الفشيخة ديه بيفضل لازق جنب الشعب المرجانية و بيتعلق فيها بديله بصفة شبه مستمرة لانه لو دخل اي تيار بحري حيموت تقدر تقول عليه كده بيمشي جنب الحيط
احجامة بتتراوح من حجم عقلة الصباع و لحد 35 سم في انواع معينة

حصان البحر معندوش معدة و لا سنان ولا اي حاجة يخزن فيها اكله عشان كده باستخدام زلومته بيفضل يشفط باستمرار و يمتص المواد الغذائية من القشريات و العوالق و الطحالب و اللي مبيستفيدش منه في ساعتها بيخرج باستمرار للسبب ده مبيقدرش يبطل اكل طول حياته تقريبا
اللي بتستمر لحد 6سنين بيقترن فيها بانثي واحدة بيكمل معاها مشوار الكفاح بيلوغوا مع بعض
لا موضوع التزاوج ده ميعديش كده!!!
مبدايا لان اول مبيتقابلوا بيقعدوا يرقصوا حوالي 8 ساعات ربنا يديله الصحة معرفش بلايليست ايه اللي 8ساعات بس بيدوروا حولين بعض لحد ما يتم التزاوج 💏

الانثي تبيض و الذكر بيحمل في البيض لحد ما بيفقس 😱
اه اللي انت سمعته صح الذكر هو اللي بيحمل في البيض غالبا المدام فيمنيست بزيادة 💪 و بيلقحه في جيب مخصوص ربنا وهبهوله و بيحمل فيه 3اسابيع لحد ما بيفقس حوالي 2000 بيبي سيهورس 1% منهم بس اللي بيعيش و يكبر لانه كائن كيوت و هدف لاي كلب في البحر فبيتاكل معظمهم

غير انه معرض للانقراض بسبب الصيد الجائر خاصتا في اسيا لانه بيستخدم في تركيبات ادوية معينة
لازم تشوفوا فيديوهات الرقصة الرومانتك و الولادة سبحان الخالق مقدرش اقول غير خلق فابدع فعلا
كان معكم #TRex_Magazine من تحت الشمس الحارقة
#تعرف

Written by: Amr Khaled - T.Rex

#AK_TRex
#TRex_Magazine