أردوينو- اعرف أكتر

أردوينو- اعرف أكتر

السلام عليكم ورحمة الله وبركاته 😁😁 رجعنالكم مره تانيه. المره اللى فاتت اتعرفنا على ايه هو الأردوينو (بص على المقالة اللى فاتت اردوينو - Arduino - البداية) 

تعالا النهارده نبص عن كثب (ايه كثب دى 😖😖!!) على الأردوينو.

الأردوينو مبنى على حاجه اسمها ميكرو كنترولر (Microcontroller) او اختصارا uC ، الشئ ده هو المسئول الأول والأخير عن اللى بيحصل يعنى هو اللى بيتعامل مع الinputs والoutputs بناء على البرنامج اللى مكتوب.الناس اللى بتتعامل مع الuC عارفه ان فى بعض الحاجات الأساسية لازم تتوصل عشان نبدأ نقول بسم الله كده هنعمل حاجه بالuC وبعد ما نوصل الحاجات اللى هنستخدمها (سينسوراتك، سويتشاتك، مواتيرك،الفيشه لامؤاخذه،سلطاتك بابا غنوجك 😂😂) بنبدأ نكتب الكود 😞😞 الكود بيتكتب بلغة C language  (ودى مش حاجه سهلة) وعشان تحط الكود على ال chip محتاج جهاز كده بتوصل عليه ال chip وتحرق البرنامج عليه (حاجه كده زى الCD زمان كنت عشان تحط حاجه عليها بتحتاج حد عنده Write CD ROOM وبرنامج عشان تحرق على ال CD).

- العظيم بقى فى الأردوينو انو وفر علي كل العك ده ووجع الدماغ وجهزلك التوصيلات الأساسية اللى أنت محتاجها وحطهالك على بورده.

= ومش بس كده يا أستاذ خميس ده كمان سهل عليك البرمجة وعملك Arduino C وفى حاجه كمان أنت نسيت تقولها يا أستاذ خميس.

- لا انا منسيتش انا بس سبتها مفاجئة فى الأخر المفاجئة انك ممكن تحرق عليها البرنامج بكابل USB 

= بكابل USB !! 😲😲

- بكابل USB النهارده الشركة السعودية هتوفرلك كل ده فى الأردوينو بكل مميزاته  بأفضل الخامات.

احم احم سورى اندمجت شوية 😂😂

• الأردوينو (Hardware)

البورده الأشهر للأردوينو هى (UNO)  ودى غالبا اللى هنتعامل معاها. (UNO) مبنيه على chip اسمها (AVR Atmega328)

الuC ده من تصنيع شركة (ATMEL) شركة أمريكيه رائده فى مجال تصميم وتصنيع ال uC واشباه الموصلات

 (semi-condutors) او IC المستخدمة فى الelectronics عموما.

(UNO) فيها 14 رجل ديجيتال(Input/Output) منهم 6(PWM) و 6 انالوج (Input). 

كلام كبير!! 😒😒 تعالا نبسط الموضوع خالص. خلينا نبدأ بال Digital I/O ديجيتال يعنى احتمالين 0 او 1 ، true or false

وبتترجم على الهاردوير لفولت 1 يعنى 5 فولت و0 يعنى 0 فولت 

ودى اللغة اللى بيفهمها الكمبيوتر (زى نيو فى فيلم ماتركس لما بدأ يشوف اللى حواليه

  0 و1 😎😎)  اما بقى I/O يعنى ممكن تستخدمها دخل او خرج ممكن تطلع  منها اشاره او تقرا من عليها اشاره ودى بتحددها فى الكود بتاعك 

نيجى بقى لل Analog اكيد مش كل حاجه هتبقى 1و0 الدنيا مش ابيض واسود بس فى حاجات ف النص هو ده بقى Analog هو بيقدر يقرا قيم بين 0 و1 (او بمعنى اصح بين 5 فولت و 0 فولت). 

مش فاهم لسه 😒😒 تعالا نقولها بشكل مختلف دلوقتى انا ممكن انور اللمبة او اطفيها ده Digital و كمان output  اما الinput ف ممكن نشبهه بالزرار اما مفتوح او مقفول، 0 او 1 ملهوش احتمال تالت.اما بقى لو جينا نتكلم  على درجة الحرارة ، دى بقى منقدرش نقول احتمالين بس لانها ممكن تكون 10 او 30 او 40 ف نتشوى كلنا 😓😓 فى الحالة دى احنا بنحاول نقرا حاجه ليها قيمه جوا rang اما بقى لو عايز اخرج اشاره بالمنظر ده(لو عايز اتحكم فى سرعات موتور مثلا مش مجرد on وoff) فى الحاله دى بنلجأ لل PWM 

الراجل هنا بيتحكم فى سرعة المروحه على حسب درجة الحراره 

ده لينك الكود اللى هو كاتبه Download

وده التوصيل 

متنسوش تتابعونا وتبعتولنا أسئلتكم فى الكومنتات 😄😄

Written by: Ahmed Ezz
#AEMA
#TRex_Magazine

اردوينو - البداية -Arduino

اردوينو - البداية -Arduino

أعزائى المشاهدين السلام عليكم ورحمة الله وبركاته اهلا وسهلا بكم فى أولى حلقات اصنع بنفسك 😁😁

الدراسة رجعت وكلنا ملطوطين (اللهم لا اعتراض😢😢) عشان كده قررنا نلعب شويه ونعمل عقد نور صغير ونعمل هيصه ونفرفش شويه.

بس تفتكر هنعمل كده ازاى ؟؟!! 

اقولك انا 😄 احنا هنلعب بالاردوينو ..هتقولى ايه اللى انت بتقوله ده هقولك اصبر على رزقك ومتستعجلش الاردوينو ده عباره عن بورده صغيرة كده بتخليك تقدر تتحكم فى اى حاجه تقريبا بتشتغل بالكهربا 💪 عن طريق برنامج (code) انت بتكتبه .

Arduino UNO

بردو مش فاهم !!  أبسطهالك 😂😂

ارجع معايا كده بالزمن لحصة الحاسب الالى 😒 لما كانو بيقولولنا المدخلات والمخرجات اهو الكمبيوتر اللى انت قاعد بتلعب عليه medal of honor او call of duty 💗💗

انت بتتحرك بالكيبورد ف بتلاقى الشخصية بتتحرك وتقوم منشن بالماوس وانت معاك سنايبر وتجيب headshot 😎😎

اهو الماوس والكيبورد دول inputs مدخلات لامؤاخذه والصورة  والصوت اللى بتسمعهم دول outputs ايوه بالضبط هى المخرجات . على حسب تحركاتك بالماوس والكيبورد بتتغير الصورة  والصوت او بمعنى اخر كل ماتغير الinputs بيحصل تغير فى الoutputs على حسب البرنامج اللى انت كاتبه .

الاردوينو كده بالضبط عندك inputs وoutputs وهو بيتحكم فيهم على حسب البرنامج (code) اللى انت كاتبه .

رغى كتير تعالو نشوف الراجل ده بينور LED بمجرد ما يدوس على الزرار

 

الراجل هنا كل اللى عمله انو وصل LED (البتاعه الصغيرة اللى بتنور دى) على output والswitch على input 

وكتب برنامج يخلى الLED تنور لما يدوس على الswitch 

تعالا بقى نشوف هو عمل ايه ...تعالا بس ماتخافش 😀😀 مبدئيا كده لازم نسطب البرنامج اللى هنكتب عليه الكود اللى هو 

 Arduino IDE  (أضغط علي  Arduino IDE للتحميل).

Download Code

ده الكود اللى هنكتبه والتوصيل برده 

كل اللى هتعمله انك توصل الاردوينو بكابل الUSB وتكتب الكود وانقر upload 😂😂

المره الجايه هنتكلم اكتر عن الاردوينو والبرنامج بتاعه 😊

متنسوش تتابعونا وتبعتولنا اسئلتكم فى الكومنتات 😉😉

Written by: Ahmed Ezz
#AEMA
#TRex_Magazine

ازاي تغيير حياتك ب150 جنيه?! أردوينو

ازاي تغيير حياتك ب150 جنيه?! أردوينو

انا ال150 جنيه دول معرفش اغير بيهم من علي قناة الاطفال علي التلفزيون  😂 و متقوليش مشاريع وهمية و كيونت و شغل الفشلة ده و انا بتكلم عالواقع المادي مليش دعوة باللاوعي و قوة عقلك الباطل و انت الحد الجميل اللي في حياتك انا مش تيريكس الفقي مع احترامي للدكتور الله يرحمه

انت فعلا ممكن بدلا ما تنزل تدفع المبلغ ده منيمم تشارج في اي كافيه اينعم نفس الفاخر بيجدد الحياة و بيصفيلك دماغك بس تاثيره مؤقت و حترجع تتعامل مع الاشكال الضالة و تتحول زومبي تاني.

الواقع المادي اللي بتكلم عنه هو اوضتك مكتبك عربيتك اللي انت بتقضي فيهم 99% من حياتك تقريبا. طب ما تنجزي يا ست شريهان بفوازيرك ديه.

ايه اللي حعمله في اوضتي يعني حسقف اخلي النور يطفي مثلا ولا الستاير تقفل لما الشمس تطلع مثلا

ولا يمكن اشغل انوار الشقة قبل ما اطلع و اسيب الزرع يتسقي لوحده او الكلب ينزله اكله كل يوم و انا مسافر من غير ما اضطر اسيبه لحد او اشغل التكييف من الموبايل من غير ما اجيب تكييف زي بتاع مني او تعمل بيها مشروع يجيبلك فلوس!!!!

كل ماسبق و اكثر و علي فكرة انت ممكن تكلم التكييف تقوله افتح يا تكييف انا جي 💪

بداية الدلع كانت لما عملوا لكل حاجة ريموت كونترول. التحكم هو مفتاح الدلع هو اللي بيسهل الدنيا و بيوفر الوقت و المجهود.

و احنا حنشتري التحكم بال150 جنيه دول 👌

ده البطل بتاعنا و كان ليه دور كبير جدا في حياتي من اول التسلية لحد ما ساعدني ماديا بعد كده اني اقترن  بحبيبتي و رفيقة كفاحي و اللي مستحملة الشخص السايكو اللي عايشة معاه كفاية انها مستحملة كمية الخردة اللي عندي ديه و مطفشتش😘.

طب ممكن قبل ما اروح لعمو و اقوله انا عايز البتاعة ديه تقولي ايه ده

ديه بوردة اردوينو 

تقدر تعتبرها العقل مسبق البرمجة اللي انت حتعمل بيه كل مشاريعك و افكارك الشريرة اللي في دماغك ديه و حرفيا كفيلة انك من انها تخليها تنورلك شوية لمض ليد باشكال حلوه و لحد ما تقدر تطير بيها صاروخ

صاروخ انت بتبالغ لا مش مبالغ انا عن نفسي شاركت في صنع طيارة بدون طيار بحجم عربية كانت معتمدة كليا علي اردوينو في مشروع تخرجي 

عامل تصميم قيد التنفيذ ان اخلي الزرع بتاعي كله يتسقي ذاتيا بدون تدخلي. تصميم تاني لتانك بينزل الدراي فوود بتاع الكلب في مواعيد محددة.عامل اكتر من ماكنة شغالة في خطوط انتاج بتعتمد كليا علي اردوينو.

ملحوظة انا مهندس ميكانيكا معرفتي بالكهربا و البرمجة تعتبر قشور و برغم كده و بفضل الله نجحت في كل ده.

طب انت حمستني اعمل ايه عشان ابتدي??!

عندك حلين واحد ببلاش وواحد بفلوس عشان تبدأ و انا بفضل ابو فلوس لاول مرة حقولك ليه

البداية اللي ببلاش انك تدخل علي موقع..... و تبدأ تعمل مشاريع في الواقع الافتراضي الموقع ده بيتحلك بوردة وهمية و فيه مكتبه مواتير و حساس حرارة و ضغط و اضاءة و كل حاجة ممكن تحتاجها في البداية

الحل التاني ب150 جنيه زي ما قولنا انزل باب اللوق اشتري بوردة اردوينو اونو بالسلطات اسلاك بقي و شوية مقومات و اللذي منه. او اشتريها اونلاين من موقع من اللي حنكتبهم في اخر الموضوع.

انا بفضل الحل التاني عشان مفيش امتع في الدنيا من انك تمسك المكونات ديه تركبها مع بعض و بشوية لعب تلاقي نفسك عملت عربية اخوك الصغير بروموت 😁 حدث بالفعل بس خلي بالك للموضوع يتطور معاك و تلاقي نفسك عملت ذكاء اصطناعي شرير و نتشقلط كلنا

جبت الحاجة حتنزل الكتيب ده لمؤلفة جزاه الله خيرا اسمه اردوينو ببساطة ده عربي سهل بسيط بيشرح بدايتك بمنتهي البساطة و السلاسة 

لان فعلا البوردة بتتركب في الUSB بتنزل السوفت وير المجاني من هنا و تسمي الله و تبدأ تشتغل في الامثلة الموجودة في الكتاب اللي زي ما قلنا شارح كل حاجة بالتفصيل الممل للمبتدئين و كتاب صغير مش مجلد.

بس خلاص كده 😸

ايه اللي خلاص انت حتسبنا كده مع نفسنا

اه ولا مع بعض انا عرفتك بالمفتاح بس مش حسيبكم كده انا اشتريت بوردة جديدة و حرجع العب تاني حبدأ انكش في مشاريع اردوينو اللي علي النت و افهمها كويس و انزلكم كل شوية واحد منهم نتناقش فيه كمان حقولكم علي سر لما توصل لجزء التحكم في المواتير حتلاقي نفسك وقفت عشان المواتير غالية و كمان فيه مكونات الكترونية حتلاقي نفسك محتاج تشتريها كلمة السر اللعب القديمة البرنتر القديم و الكيسة القديمة و اتك عالبرنتر القديم عشان حتتبسط من اللي حتلاقيه لما تفكه لو معندكش حتلاقيهم بيتباعوا خردة سلكلك واحد و عن تجربة اللي جواه اغلي بكتييييير كفاية التروس و العمود الستانلس 😍

حنبدأ اللعب في القريب العاجل بمجرد ترتيب الخردة اللي عندي عشان متطردش من البيت
كله بياكل عيش 😂😂😂

Written by: Amr Khaled - T.Rex

#AK_TRex

#TRex_Magazine

ا أصنعها بنفسك - DIY Arduino