كارثة تشيرنوبل - التفاعل النووي

كارثة تشيرنوبل - التفاعل النووي

في سلسة المقالات ديه هنحاول نفهم اكثر عن واحدة من أكثر الحوادث المدمرة اللي عرفتها البشرية و هي كارثة تشيرنوبل. حنبدا الأبحار بسلاسة بشرح مبسط عن المفاعلات النووية نظرية العمل و متطلبات أنتاج النوع ده من الطاقة و ازاي بقدر أستغلها ديه سواء للخير أو الشر كل ده حنتعرض له في رحلتنا لأستكشاف كارثة تشيرنوبل و توابعها كوباية شاي بالنعناع بقي و شدوا الحزام..

التفاعل النووي

هو تفاعل بيحدث نتيجة انشطار عنصر أو اندماج عنصرين بينتج عن التفاعل ده قدر مهول من الطاقة مصدرها الطاقة اللي بتربط مكونات الذرة نفسها ببعض بمعني اخر انت بتطلق جزء من الطاقة المسؤلة عن تشكيل الكون بالشكل اللي أحنا نعرفه. كده أحنا عندنا أنشطار و أندماج أبسط مثال للأندماج و الطاقة المتولدة عنه هي الشمس أو النجوم بشكل عام. الشمس منذ تكونها و الي أن يشاء الرحمن بيتم فيها تفعلات أندماجيه بشكل مستمر هيدروجين بيندمج بيكون هيليوم و كمية طاقة كفيلة لأنارة و تدفئة المجموعة الشمسية بتاعتناز التفاعلات الأندماجية بتتم تحت ظروف معينة و بيلزمها كمية طاقة كبيرة جدا و كل محاولتنا علي الأرض لأنتاج طاقة أندماجية في درجة حرارة منخفضة نسبيا باءت بالفشل حتي الأن.


الأنشطار النووي

 بالنسبة للأنشطار أحنا كنا أشطر فيه و الطبيعة خدمتنا بشكل أكبر بوجود العناصر الغير مستقرة أو ما يعرف بالعناصر المشعة و هي عناصر عدد البرتوتونات و النيترونات في نواتها كبير بحيث أن الطاقة الكهرومغناطيسية الناتجة من تنافر الربوتونات بتكون أكبر من الطاقة النووية اللي بتمسك مكونات الذرة مع بعضها. مشعة لأنها بتحاول بشكل مستمر زي أي حاجة في الطبيعة أنها توصل للأستقرار حتي لو علي حساب أنها تخرج الطاقة الغير مستقرة جواها بصورة أشعاع عشان توصل لعنصر أصغر في عدد البروتونات و النيوترونات و يكون مستقر فيما يعرف بالأضمحلال الأشعاعي.

ده لو حنسيب العنصر في حالة مش حنحط التتش بتاعتنا كبني أدمين تصويب نيترونات علي اليورانيوم اللي هو أصلا مش مستقر سلسلة من الأبحاث 1934 بدأها انريكو فيرمي/ أوتو هان  و ليزي مايتنر وفيرتز ستراسمان ألا انهم مقدروش يفسروا نتيجة أبحاثهم في البداية. توالت الأبحاث و بدأ المجتمع العلمي يوصل لنتائج مشابهة و بدأت الأمور توضح أن ذرات اليورايوم بتنقسم و بتتحول لعنصر الباريوم و مخلفات أخري ناتج للأنقسام مع كمية مهولة من الطاقة وصلت النتائج ديه لأينشتاين و اللي بدأ تخوفه من أستخدام ألمانيا للطاقة ديه لعمل قنبلة و كسب الحرب العالمية التانية اللي كانت بدأت بالفعل 1939. وجه أينشتين و ليو زيلارد خطاب للرئيس الأمريكي وقتها فرانكلين روزفلت لتحذيره من مصدر جديد للدمار ممكن يرجح كفة ألمانيا.

بدأت أمريكا الأهتمام أكتر بالأبحاث النووية عشان تكسب السبق. 1942 أنريكو فيرمي اللي بدأ الليلة ديه كلها نجح أنها ينشئ كومة ذرية من اليورانيوم و الجرافيت و بوصل بيها لما يعرف بالكتلة الحرجة و هي أقل كتلة تقدر تبدأ بيها التفاعل المتسلسل يعني اليورانيوم أو البلوتونيوم ينحل لربيديوم و سيزيوم يطلق طاقة و نيوترونات تضرب بقية الذرات تنحل بدورها و تطلق طاقة و نيوترونات لحد ما كل اليورانيوم ينشطر و يوصل لمرحلة الأستقرار بعد ما يكون أطلق كل الطاقة النووية المختزنة داخل الذرة في صورة طاقة حرارية حركية و أشعاع.أبحاث أمريكا عرفت بمشروع منهاتن وقتها قدرت أمريكا فيها انها تنتج اليورانيوم 235 بصورة نقية بجانب أستخدام البلوتونيوم 239 اللي تم بناء مفاعل مخصوص ليه لضمان الأسبقيه بأي ثمن.
 1945 تم تتويج الطاقة النووية بالدم كملك للأسلحة الفتاكة بأسقاط القنبلتين علي هيروشيما و نغازاكي قتلت ما يقرب من 220000 أنسان غير اللي ماتوا بسرطانات بعدها أستسلمت اليابان و كسبت أمريكا الحرب بقيادة الرئيس هاري ترومان و خسرت الأنسانية.

متطلبات أنتاج الوقود النووي

الوقود النووي أو الوقود المخصب عشان منعقدش المواضيع أكتر حكتفي بذكر أن اليوراينيوم في صورته النقية بيكون يورانيوم 238 و نسبة قليلة من يورانيوم 235 عملية تخصيب اليورانيوم بتتم بأجهزة معينة (أجهزة الطرد المركزي) بيتم فيها رفع نسبة يورانيوم 235 في الوقود و هو الصالح لعملية الأنشطار في حين ان يورانيوم 238  بيتم أستخدامه في الدروع و الحواجز الواقية من الأشعاع.
يورانيوم 235 و البلوتونيوم بيكونوا هم الوقود النووي للحرب أو للسلم كمفاعل نووي لانتاج الطاقة.

المفاعل النووي.... يتبع


Written by:Amr Khaled -T.Rex
#TRex_Magazine
#AK_TRex

تعلم اللغات الأجنبية

تعلم اللغات الأجنبية

تعلم اللغات الجديدة ليه منافع كتيرة و بيفيد الفرد علي المستوي الشخصي و العملي. علي المستوي الشخصي تعلم لغات جديدة بيخلي دماغك دايما شغالة و كاي عضلة تمرينها بيقويها و يخليها ميحصلهاش خمول. تعلم اللغة بيخليك منفتح علي الثقافات الأخري لأنك بتلاقي نفسك في رحلة تعلمك للغة بتتطلع علي ثقافات و عادات أجتماعية لاصحاب اللغة ممكن متكونش تعرفها أو عندك مفاهيم خاطئة عنها. علي المستوي العملي بقي لغتك دايما سلاحك عملا بحديث الرسول عليه الصلاة و السلام ( من عرف لغة قوم أمن مكرهم) و بالرغم من انه حديث ضعيف و ملهوش سند الا انها نصيحة غالية. لأن فعلا عن تجربة وجودك وسط أشخاص متعرفش لغتهم بيخليك عامل زي الطفل وسط الكبار مش فاهم حاجة ده لو فرضنا انك وسط أشخاص كويسين. عملي في شركات من جنسيات متعددة سمحلي ان أشوف البشر ممكن يتعاملوا أزاي مع أشخاص مبيتقنوش لغتهم بدأ بالمصريين اللي مبيحلوش حد و ممكن توصل لمرحلة قلة الأدب و التريقة الي الاشخاص الي بيعاملوك بتعالي أو بيهمشوك و يتناقشوا بلغتهم و مصنفين كخبراء أجانب لمجرد أنهم بيتكلموا لغة الشركة الأم  و اللي حتكتشف بعدها انهم بيقلشوا عليك برضو ظنا منهم أنك مش فاهمهم.

الخلاصة اللغة مهمة جدا و بتحمي صاحبها و بتديله الأفضلية في المواقف المختلفة تعلم اللغة بيجيبلك شغل. طب السؤال هنا هو أنا حتعلم كل اللغات يعني؟
الأجابة لا طبعا مش مطلوب منك تتعلم كل اللغات كل مجال و مكان ليه اللغات اللي ممكن يحتك بيها و أنت اللي بتحدد اللغات اللي ممكن تفيدك.
كمهندسين كمثال اللغة الأجليزية اساسية مهندسين ميكانيكا مثلا بيحبوا الألماني و أي حاجة بتيجي من ألمانيا عمتا. نص القارة بتاعتنا تقريبا بيتكلم فرنساوي. تعلم التركي و الياباني بقي هواية عند ناس بدون قصد لمجرد انهم بيتفرجوا علي مسلسلات تركي أو أنميشين. و في لغة ممكن تتفرض عليك بحكم شغل معين بالنسبالي كل اللغات اللي ذكرتها قبل كده كانت أختياري لحد ما أضطريت أبدأ أتعلم ايطالي ده بقي لا عمره جه في دماغي ولا أهتميت ان أعرف حاجة عنه أصلا بس أكل العيش بقي.
مش شرط انك تبقي تكتب أو تنطق ببلاغة انت مش حتألف كتب ولا حتدي محاضرات ألا في ظروف معينة طبعا بتفرض أنك توصل للمستوي ده بس علي الأقل تعرف تتعامل كلنا بنشوف و بننبهر بالناس بتوع الأماكن السياحية اللي بيكتسبوا اللغة بالممارسة و تلاقيه بيتكلم 6 7 لغات و مبيعرفش يقرا و يكتب عربي.



الممارسة كلمة السر لتعلم أي حاجة في الدنيا اللممارسة ليها أدوات لازم تمتلكها اللغة بتقوم علي شقين رئيسين مفردات و قواعد. زي الطفل الصغير بيبدأ يتعلم الكلمات و المصطلحات اللي بتسهل عليه حياته زي ماما بابا ميا مم بيبي .... و بعد كده بيقدر يكون جمل من صنعه بطريقه التجربة و الخطأ الموضوع أسهل من كده ليك كشخص كبير لو عرفت القواعد اللي تقدر تكون منها الجمل و بكده تقدر تتعلم اللغة اللي انت عايزها و كل ما تمارس اللي أنت بتتعلمه حيتحسن مستواك بشكل أسرع. ذاكر أحفظ أسمع أفلام انت عارفها مدبلجة باللغة اللي انت بتتعلمها أشترك في مجموعات فيها ناس بتتعلم اللغة خليك جرئ متتحرجش تستخدم اللي اتعلمته غالبا احنا الوحيدين اللي بنتريق علي موضوع الأكسنت فميهمكش حتي التريقة بتعرفك الغلط فين و تقدر تصلحه.
المقالة ديه أنا كنت بفكر فيها بصوت عالي و أنا بذاكر بس لقيت أجابتي و انا بكتبها الممارسة!
                                                                           يتبع...
Written by:Amr Khaled -T.Rex
#TRex_Magazine
#AK_TRex

نهاية العالم 2 - الاحتباس الحراري Global Warming 2

 نهاية العالم- 2
 الاحتباس الحراري Global Warming
Part 2

الصيف اصبح اكثر حراا, والشتاء زاد برودة, فيضانات واعاصير في كل مكان, جفاف الانهار والبحيرات, انقراض وموت جماعي لكثير من الكائنات ….. اصبحت النهاية وشيكة, وكما يقول العلماء اصبحت الأرض علي الحافة …لقد اقتربت النهاية , أم أن نكون علي استعداد ونواجه الواقع,   أو لا نعطي اي اهتمام….. و دعونا نموت في صمت....

اتكلمنا قبل كده عن بعض الأسباب  التي تؤدي الى دمار البشرية وكثير من الأحياء…. وان المشكلة الأكبر هي عدم الاعتراف بهذه الكوارث وانكارها للحفاظ علي بعض المصالح الاقتصادية. ومن احدث هذه المواقف عام 2017, وهو خروج امريكا من اتفاقية باريس لتغير المناخ, بانسحاب الولايات المتحدة يعني  رفضها او عدم مشاركتها في تنفيذ او ايجاد حلول لمشاكل المناخ والتي من اهمها الاحتباس الحراري, والتي تؤثر علي العملية بأكملها بالسلب.,...لماذا خرجت الولايات المتحدة من الاتفاقية .؟؟...لا نعلم الاجابة بالظبط, ولكن المصالح الاقتصادية هي عامل اساسي في هذا القرار.
الكلام ده مش افتراضات تكهنات, دي حقيقة وواقع, من كام يوم مدينة كيب تاون في جنوب افريقيا اعلنت ان المياه هتقطع نهائيا في المدينة بسبب جفاف مصادر المياه…..


سنتحدث بتفاصيل علمية مبسطة عن اخطر الكوارث التي تواجه الانسان وتؤرق العلماء,  و هي  الاحتباس الحراري والذي اصبح حديث البشرية آخر 10 سنوات….ما هو الاحتباس الحراري وكيفية التغلب عليه….!!!!

هذا المقال هو الجزء الثاني من مقال سابق تحدث عن الاحتباس الحراري , سنعيد نفس المعلومات و سنضيف المزيد, يمكنك قراءة المقال الاول (نهاية العالم).


نهاية العالم التي نتحدث عنها في هذه السلسة لا تعني بالقريب والبعيد  قيام يوم الساعة ( يوم القيام), فهذا شئ مختلف تماما..وكما ذكرنا من قبل ان الوضع المناخي والبيئي الحالي لكوكب الارض لن يدمر الكوكب نفسه , بل سيقضي على كثير من الكائنات الحية والبشر, ليس من الضروري انقراض الجنس البشري بالكامل, بل سيموت الكثير منهم وستكون كارثة كبيرة ولن يتعافى منها البشر بسهولة. وهذا حدث من قبل مع كثير من الكائنات الحية.

ما هو الاحتباس الحراري: 

الاحتباس الحراري يعني استمرار ارتفاع درجة حرارة الكرة الأرضية, بمعنى آخر أصبحت الأرض  غير قادرة على التخلص من الحرارة الزائدة.
الكرة الارضية تمتص حرارة من الشمس, وتستغل جزء من هذه الحرارة ثم تطرد الحرارة خارج الارض مرة اخري, لكن ما يحدث الان هو ان الارض تمتص الحرارة ولا يمكنها طرد الحرارة مرة اخرى. وهذا بسبب بعض الغازات التي تعمل على حبس الحرارة داخل الارض, فهي تسمح بحرارة الشمس بالوصول إلى سطح الأرض وتمنع خروجها مرة أخرى.

خلال القرن 21 تم تسجيل زيادة درجة حرارة سطح الأرض بمقدار 1.5-1.7 درجة مئوية, أي أن درجة الحرارة اليوم هي تقريباً أكثر من ضعف الدرجة قبل 200 عاماً. والي يومنا هذا تزداد درجة الحرارة بمعدل اكبر.

1.5 درجة مئوية زيادة !!!!!! ..لا تستهين بهذه الزيادة…. نحن نتحدث عن درجة حرارة الكوكب وليس درجة حرارة الجو, انها تختلف… زيادة بسيطة لا تزيد عن 0.1 درجة لها تاثير كبير جدا علي كوكب الارض والكائنات الحية.

كيف تم قياس معدلات زيادة درجات حرارة الكوكب قبل مئات السنين ؟ : 

يتم تحديد الاحوال والظروف المناخية عن طريق دراسة الصفائح الجليدية والاشجار, حيث من خلالها يمكن تحديد الظروف المناخية خلال فترات طويلة جدا, ومنها معرفة درجة حرارة الارض منذ مئات او آلاف السنين.
على سبيل المثال، فإن الصفائح الجليدية في المناطق القطبية تساعدنا على تحديد درجات الحرارة التاريخية. مع سقوط الثلوج كل عام، فإن طبقة جديدة تتراكم فوق بعضها، وكل واحدة من هذه الطبقات  تشكلت في درجات حرارة وظروف مختلفة، وبالتالي يكون لها خصائص كيميائية مختلفة، وهكذا فكل طبقة تُعلمنا بظروف الحرارة في ذلك الوقت.أما حلقات الأشجار فتكون إما أوسع أو أضيق تبعاً للظروف المناخية خلال فترة نمو الشجرة.



ما هو سبب الاحتباس الحراري  : 

بعض الغازات تعمل كغطاء (بطانية) فهي تسمح بمرور الحرارة الى الأرض وتمنع خروجها مرة اخرى, وتزيد من حرارة الكوكب. هذه الغازات موجودة بالأصل في الغلاف الجوي وتعمل على حفظ درجة حرارة الأرض, ولكن بزيادة نسبة هذه الغازات في الغلاف الجوي تؤدي الى عدم الاتزان وتزيد من عملية الاحتباس الحراري, وللأسف حتى هذه اللحظة تزداد نسب هذه الغازات باستمرار ولا يمكن ايقافها. منذ الثورة الصناعية نسبة هذه الغازات في ازدياد مستمر
بخار الماء،
غاز ثنائي أكسيد الكربون (CO2)،
الميثان (CH4)،
و الأوزون في طبقة التروبوسفير (الطبقة الملاصقة للأرض )
مركبات أكاسيد النيتروجين

هذه الغازات تنتج بنسبة كبيرة خلال عملية احتراق الوقود الحفري (البنزين والسولار والغاز الطبيعي …) فهي المصدر الأساسي للاحتباس الحراري.

بالاضافة الى قلة المساحة الخضراء: بسبب التوسع العمراني وزيادة عدد البشر, تم التوغل داخل الغابات وقطع الاشجار بغرض البناء او التدفئة أو قطعها لاستخدام الأرض للزراعة…. هذا يؤدى الى قلة المساحات الخضراء التي تعمل علي تدوير غاز CO2 و انتاج الاكسيجين. بودن هذا الغطاء الاخضر, سوف يزداد معدل غاز CO2  في الجو. للاسف لاعادة الاتزان مرة أخرى  نحتاج إلى مساحات كبيرة جدا من الغابات….وهذا ليس متوفر الان, حيث ان اكبر غابة في العالم , هي الامازون, ومساحتها تتناقص بمعدل كبير كل عام بسبب البشر و بسبب الحرائق بسبب الاحتباس الحراري.

ما هو تأثير زيادة درجات الحرارة : 

حاليا  درجة حرارة الارض ارتفعت بمقدار حوالي 1.5 درجة مئوية, و يأمل العالم بعدم ارتفاع درجة الحرارة إلى 2 درجة, خلال العشر سنوات القادمة سيتوقف او يقل استخدام الوقود الحفري, و سنتجه للطاقة المتجددة مثل الطاقة الشمسية وطاقة الرياح… كثير من دول اوربا الان  نجحت في ذلك واصبح استخدام الطاقة النظيفة يمثل جزء كبير من إنتاج الطاقة, ولكن ما زال استخدام الوقود الحفري هو المسيطر. وتم سن القوانين لمنع التوغل في الغابات والحفاظ علي المساحات الخضراء, ولكن اكبر مساحات خضراء هي في امريكا الجنوبية وافريقيا, وبسبب فقر هذه المناطق لا يمكن التحكم و السيطرة علي الغابات بسبب التوغل المستمر من اجل الغذاء والمأوى.

الآن وبسبب ارتفاع درجة حرارة الارض ب 1 درجة مئوية :
اختفي الكثير من الأنهار الجليدية الصغيرة، التي كانت تمد 50 مليون شخص بالمياه العذبة, و التصحر و الجفاف
تغير المناخ الصيفي و الشتوي, يذكر ان ما لا يقل عن 30 الف شخص يموتون سنويا بسبب الأمراض المتعلقة بالمناخ
الاماكن الباردة جدا, اصبحت اقل برودة, ويمن الزراعة فيها (جانب مشرق)
تدمير وموت 80٪ من الشعب المرجانية، بما في ذلك الحاجز المرجاني العظيم
كثير من النباتات والكائنات اصبحت مهددة بالانقراض.
ارتفاع مستوى البحار مما يؤدي الي فيضانات , واعاصير


يتوقع بعض العلماء سيناريو اذا ارتفعت درجة الحرارة الي 5 درجات مئوية, هذا ليس الا توقع  فقط .
اذا ارتفعت درجة الحرارة ب 2 درجة مئوية :
نقص مياه العذبة بسبب الجفاف وخاصة في افريقيا واسيا,
تنخفض غلة المحاصيل في أفريقيا بنسبة 5٪ الى 10٪
40 - 60 مليون شخص أكثر عرضة للملاريا في أفريقيا
زيادة الفيضانات بشكل كبير
الاعاصير تزداد وتصبح أكثر خطورة
وتتعرض الكائنات  القطبية الشمالية، لخطر الانقراض


اذا ارتفعت درجة الحرارة ب 3 درجات مئوية :
الجفاف وقلة المياه العذبة يصل الى أوروبا، بصاحبه قلة المحاصيل الزراعية
ويعاني 1 إلى 4 بلايين شخص آخرين من نقص المياه
يموت الملايين من البشر والحيوانات من سوء التغذية
الاعاصير تصل إلى الفئة 4و 5 , وهي اخطر درجة من الاعاصير
وهناك خطر أكبر بأن تنهار الصفائح الجليدية الغربية في أنتاركتيكا،وزيادة منسوب المحيطات

اذا ارتفعت درجة الحرارة ب 4 درجات مئوية :
يرتفع نسبة الجفاف والمجاعات بصورة كبيرة
ظهور أمراض جديدة و انتشار الأمراض بصورة كبيرة مثل الملاريا
الفيضانات والحرائق تصبح اشد وتحدث باستمرار
ذوبان الثلوج من المناطق الشمالية,


اذا ارتفعت درجة الحرارة ب 5 درجات مئوية..وهو أقصى ما توصل الي العلماء من تنبؤات حيث تعتبر النهاية , وموت الملايين من البشر والكائنات. 
ارتفاع مستوي سطح البحر بشكل كبير, يسبب غرق المدن الساحلية , (وفي احد برامج national geographic يتوقع العلماء أن القاهرة يمكن ان تكون مدينة ساحلية في المستقبل)
ارتفاع حموضة البحار , مما يصعب تحلية المياه للمياه عزبة.
انقراض الكثير من المخلوقات البحرية و البرية.
بالإضافة إلى زيادة خطورة كل ما سبق ..



كيف نقلل من الاحتباس الحراري :  

 لا يوجد حل لتقليل الكارثة, الحل المتاح هو إيقاف الكارثة ومحاولة عدم التسبب في زيادة درجة الحرارة بمعدل 2 درجة.
1- التوقف عن استخدام المحروقات,(الوقود الحفري او الاخشاب)
2- المحروقات تشمل الاسلحة ومعدات الحروب, يجب التوقف في استخدامها - إيقاف التجارب النووية تجارب الاسلحة
3- زيادة المساحات الخضراء , والحفاظ علي ما تبقي من الغابات , (حيث ان لم يتبقي غير غابتين فقط علي مستوي العالم, والتي تشكل حوالي نسبة 30% من امتصاص غاز CO2 من الجو)
4- أبحاث جديدة في كيفية امتصاص  غازات الاحتباس الحراري من الجو


 واخيرا يجب علينا ان نعي ونفهم مقدار الخطر الذي يواجهنا, ويجب ان نبدأ بالعمل كأفراد, نحافظ على المياه والأشجار, زراعة ما نتمكن منه من نباتات, توفير الطاقة بكل صورها, واستخدام اجهزة موفرة للطاقة.


Written by: Mohamed Elmously
#M_Elmously
#TRex_Magazine

كارثة تغيير المناخ - Climate Change disaster

كارثة تغيير المناخ - Climate Change disaster

أطلقت ناسا فى عام 1997 ثلاثة أقمار صناعية لتدور حول الأرض بهدف واحد فقط ألا وهو دراسة تأثير تغير المناخ على حياة الكائنات الدقيقة فى البحار والمحيطات واستخدامها فى سلسلة من السيناريوهات ونظم المحاكاة الخاصة بالطقس لتعطينا صورة أدق عن المناخ فى كوكبنا والطبيعة فى ظل تغير مناخ الأرض وبعد نحو عشرين عاما من جمع الصور والمعلومات قامت ناسا باعلان نتائج البحث فى فيديو قصير يحمل كل ما تم ايجاده فى تلك الفترة بشكل موجز وملخص. بالعودة للبدايات نجد أن عدة دراسات متفرقة لطبقات الجليد، خشب الأشجار، عينات الصخور وطحالب المحيطات قد أزاحت الستار عن مدي تغير مناخ الأرض منذ التاريخ القديم وتم استخدام المعلومات الناتجة عن تلك الدراسات فى نماذج محاكاة خاصة بالمناخ لتوقع مدي التغير المتوقع حتي العام 2100 وخلصت تلك النماذج والمعلومات الي حقيقة واحدة؛ مناخ الأرض يزداد دفئا ودرجة حرارة الأرض ترتفع بشكل غير مسبوق. 

للتحدث بصورة رقمية أوضح فان خلال خمسة آلاف عام ارتفعت فيهم درجة الحرارة بمعدل سنوي يقدر ب 0.008 درجة سيلزية فان المئة عام الأخيرة ارتفعت فيها الحرارة بأضعاف هذا المعدل لتزيد ب 0.7 درجة سيلزية بينما تتوقع الدراسات المناخية أن تزيد درجة حرارة الأرض ما بين 2-6 درجات مئوية بحلول 2100. دراسات عديدة تقوم بدراسة درجة حرارة الأرض من عدة نواحي منها ما يدرس ارتفاع حرارة سطح مياه البحار والمحيطات، ارتفاع درجة حرارة الكتل الصلبة للكرة الأرضية، ارتفاع مستوي مياه البحار والمحيطات نتيجة لذوبان الجليد وخليط من تلك الدراسات مجتمعة وبعض منها معروض فى الأشكال التالية:






يعرض الشكل الأول تدريجا رأسيا لدرجة الحرارة منذ 1890 وحتي 2000 ميلاديا لعدة منحنيات لقياس درجة الحرارة مثل GISS الخاص بمعهد جودارد التابع لناسا باللون السماوي والنتائج الخاصة بمعهد هادلي HADCRUT فى المملكة المتحدة الخاص بدرجات حرارة سطح البحر مجتمعة مع درجات حرارة سطح الأرض والغلاف الجوي ومقاييس أخري مستخدمة لنفس الرسم البياني، بينما تعرض الرسومات التالية عدة مقاييس مختلفة لدرجة حرارة سطح البحار وارتفاع منسوب المياه فى المستوي العالمي علي عدة سنوات وكل منها يتنهي الي أن ارتفاع درجة حرارة الأرض واقع ملموس ويمكن الاستدلال عليه من خلال تلك المقاييس مجتمعة أو متفرقة. 
لكن هل هناك ما يقلقنا كآدميين يحتلون سطح الأرض بسبب ارتفاع درجة الحرارة؟ نعم، هناك مصادر عديدة للقلق لكن مصدر القلق الأساسي ليس ارتفاع الحرارة فى حد ذاته بل معدل الارتفاع علي المدة الزمنية التي يحدث فيها ذلك الارتفاع فبينما تعطينا المعلومات التاريخية القديمة لطبقات الأرض والنباتات أدلة على حدوث فترات من ارتفاع درجات الحرارة والاحتباس الحراري من قبل فى تاريخ الأرض فان المعدل الحالي المرتبط بوجود الانسان كعامل رئيسي فى تلك المنظومة هو مصدر القلق. قدرة البيئة الأرضية على تعديل أوضاعها واستعادة اتزانها الحيوي بدون أي تدخل بشري فان سلوك الانسان نحو التدخل بشكل أو بأخر قد يؤثر على ذلك الاتزان الطبيعي، ويبدو ذلك واضحا فى مدي محاولة الانسان استعادة الاتزان البيئي أو تجاهله بكل بساطة حيث يخضع التقييم البشري لمثل تلك المشكلة لعدة عوامل أهمها الربح المادي الحالي الذي يتحقق من حرق الوقود واستهلاك المصادر الطبيعية فى العصر الحديث. لتوضيح الصورة بشكل أعمق فقد تم دراسة مدي قلق الشعب الأمريكي من ارتفاع حرارة الأرض وظاهرة الاحتباس الحراري خلال الفترة من 1990 وحتي 2016 لتجد تفاوتا واضحا فى اختلاف نسبة القلق مع مرور الوقت كما بالشكل التالي مما يدل على اختلاف الأراء الخاصة بظاهرة تبدو فى أرقامها أنها واقعا وليست محل نظريات علمية أو بحث علمي، فبحلول عام 2016 فان نحو ثلثي الشعب الأمريكي قد أبدي قلقه من ظاهرة الاحتباس الحراري بينما ظهر فى ألمانيا تمثالا لعدة سياسيين غارقين فى المياه حتي الرقاب وهم يتناقشون فى واقعية الاحتباس الحراري كما يظهر فى الصورة التي تلي الرسم البياني. 



بالعودة لبداية المقالة فان الفيديو الذي نشرته ناسا والذي تلاه عدة تقديمات فى مختلف وسائل الاعلام فان الدلائل السابق ذكرها قد ظهرت بشكل مماثل فى التلخيص الأخير والذي يشير الى ارتفاع منسوب مياه البحار والمحيطات بشكل جلي وزيادة نشاط الكائنات الدقيقة فى المحيطات المسئولة عن استهلاك ثاني أكسيد الكربون من الجو للغذاء والمرتبط بارتفاع معدلاث ثاني أكسيد الكربون فى الجو وكذلك ارتفاع متوسط درجات حرارة المياه. 
نشرت ناسا كذلك خريطة حرارية لسطح الكرة الأرضية لتظهر فيها متوسط الحرارة التي تتعرض لها المناطق المختلفة على سطح الأرض والتي تظهر فيها المنطقة العربية باللون الأحمر الداكن الذي يشير الي وجود المعدل الأعلي من درجات الحرارة فى تلك المنطقة والذي يظهر خلال مواسم الصيف الذي ارتفعت فيه درجات الحرارة بشكل غير مسبوق فى السنوات السابقة والذي نتج عنه عدة حالات من الوفيات والاصابات نتيجة التعرض لحرارة الشمس المباشرة.


وبينما ترتفع درجة حرارة الأرض فان انخفاض مستوي الجليد القطبي والذي يتسبب فى ارتفاع منسوب مياه المحيطات يبدو جليا ومقلقا للبيئة الطبيعية للأرض وهو أحد الظواهر الأبرز فى السنوات السابقة بينما تختلف التأثيرات المختلفة على الأنظمة الطبيعية للنباتات والحيوانات وبالتالي على الانسان من ازدياد معدل التصحرواختلاف معدل سقوط الأمطاروالجفاف فى مناطق عدة والتي تتطلب الاستجابة البشرية كما حدث فى مقال سابق منشور عن استخدام كرات الظل فى الولايات المتحدة الأمريكية.



ارتفاع درجة حرارة الأرض يتم نسبه بشكل رئيسي للانسان بسبب استهلاكه للموارد الطبيعية فى الصناعة منذ الثورة الصناعية وحتي الآن مما تسبب فى ارتفاع معدل ثاني أكسيد الكربون فى الغلاف الجوي وبالتالي تحول الأرض لصوبة زجاجية تحتفظ بالحرارة ولا تعيد بثها للفضاء الخارجي وهو ما يسمي بالاحتباس الحراري والذي تم عمل فيلم (The Day After Tomorrow) لعرض أحد السيناريوهات المحتملة الناتجة من ذوبان القطب الشمالي والذي يعد المشهد التالي هو أحد مشاهده الشهيرة والفيلم من انتاج أحد مرشحي الرئاسة السابقين للولايات المتحدة (آل جور) المهتم بالقضايا البيئية. 



تستمر الدراسات المناخية فى اعطاء المزيد من التفاصيل والبيانات التي يتم تحويلها لمعلومات تصب كلها فى مصلحة الواقع السابق نقاشه فان البيئة تتطلب الاهتمام من المسبب الرئيسي للاضطراب وهو (الانسان).........

Written by : Mohamed Khaled
#Mohamedkh5
#TRex_Magazine

غوريلة رامز جلال Gorilla

غوريلة رامز جلال Gorilla

مستمعينا مساء اخير و هابي ويك أند عليكوا خلص تاني أسبوع من رمضان ربنا يعيد عليكوا الأيام بكل خير زي ما عودناكم كل رمضان لازم نجيب حيوان رامز جلال من قفاه و نعمل معاه أنترفيو زي تنين الكومودو و النمر فلازم تعرفوا أن أحنا ميزانيتنا متقلش عن ميزانية MBC حاجة كبيرة يعني
أحنا بنصرف مبيهمناش أحنا جايبين غوريلا و بجد و في خلال الأنترفيو الجي حنعرف كل حاجة عنها معكوا و معانا المدموذيل أشجان الغوريلا.

- أزيك يا أشجان أخبارك أيه؟!
-- كله تمام يا تيري و تقدر تقولي يا شوشو عادي أحنا بقينا أصحاب خلاص.
- يا سلام عالتواضع يا نجمة, تواضع و جمال ما شاء الله حاجة محملة.
-- ميرسي لزوقك حنبتدي الأنترفيو ولا حنفضل نعاكس ثم أنا عريض بس الشاسية بس يعني.
- 300 كليو شاسيه ماشي هنعديها و حنبدأ يا ستي, شوشو بما أنا دايما بحب أدي الضيف بتاعي مساحة يقول أنترو عن نفسه أنطلقي.
-- بص يا سيدي انا اسمي الغوريلا مواطنة افريكانوا اصلي بنتمي لطائفة الرئيسيات زي الشامبنزي كده و برغم اني عارفة انك ملكش في نظرية التطور الا ال الDNA بتاعنا بيتطابق مع الإنسان بنسبة ٩٥٪ و ده بيفسر تصرفاتنا المشابهة لتصرفات الانسان لحد ما حتي فيه غوريلا أسمه كوكو قدرت تتعلم لغة الأشارة الله يرحمها.
-و يحسن أليكي يا ستي, حنروح لموضوع التصرفات ده بعدين بس واحدة واحدة كده انت بتقوليلي انك من افريقيا يعني مش موجودة في اسيا أو أمريكا ولا أستراليا؟!
-- لا انا موطني افريقيا يمين و شماال
- لا معلش يعني ايه عشان دماغي بتروح بعيد بس؟
-- شمال و يمين شرق و غرب يعني متبقاش كومبلكس
- كومبلكس معلش اصلا حضرتك حركتي وسطك في يمين و شمال كده و ركنتي شوية في الشمال ما علينا يعني كملي.
-- الغوريلات بتتقسم يا سيدي لأربع اقسام تقريبا الغوريلا الشرقية و ديه لتعيش في شرق افريقيا و الغوريلا الغربية
- و ديه بتعيش في الغرب
-- أسمله عليك مش محتاجة فقاقة المهم النوعين دول بقي فيه منهم بيعيش في السهول و فيه جزء بيعيش في الجبال و الاختلافات بينهم بسيطة مش كبيرة
- أنتوا بتعيشوا في قبائل علي كده بقي ولا كل واحد لحاله
-- متفرجتش علي طرزان؟! شكلك مش مثقف مش كان فيه زعيم راجل كبير كده مبيحبش طرزان ده زعيم القبيلة و بتتكون من حوالي 35 و لحد 50 غوريلا منهم واحد راجل كبير بيبقي ده الزعيم و بيكون Silver back
- ديه شتيمة ولا مدح ولا ده مركزه في القبيلة زي بارك رايت كده؟
-- لا حتخف في دمك حمشي أنا تليفوني الزباين عمالة ترن وانت بتحرق وقتي في تفاهات
- زباين! أنا أسف و مقدر مشاغلك المريبة اللي مش عارف هي أيه بس ماشي أيه حوار الSilver back ده؟
-- الغوريلا الدكر لما بتكبر و تبلغ أسمالله علي مقامك بتاع 15 سنة كدهون بيبقي شعر دهره لونه سيلفر
- كيدهون و سلفر ماله طيب عم سلفر ده؟
-- بيبقي جاهز انه يأسس القبيلة الخاصة بيه و يستقل بحياته المادية و ميبقاش عويل
- لا ثواني هو بيقعد معاكوا النبي حرسه 15 سنة؟
-- اه ولا يعني ححكيلك الغوريلا مننا لما بتولد لمؤاخذة يعني و ده بيحصل بعد سن البلوغ 12 سنة للأناث بتقدر بعد ما ربنا يكرمها بأبن الحلال تخلف مرة واحدة كل 4 سنين و ده لأن العيال بتاعتنا خيخة زي عيالكوا بيفضلوا يعتمدوا علينا بالتدريج لحد ما بيكبروا و يكونوا أول بيت بس علي نفس الشجرة أو في شجرة جنبنا بعد 3 سنين و يفضل متلقح فيها لحد ما يبلغ لو دكر علي سن 13 سنة

- خلال الفترة ديه بيبقي عايش مقضيها يعني
-- لا بيجيب اكله و لو بلغ و مبقاش لسه silverback بيعط عادي مع نسوان القبيلة و الكبير بيبقي عارف و بيطنش
- نشاط ترفيهي يعني عشان شباب بقي و عندهم طاقة و كده
-- ايوه نشاط ترفيهي اينعم الكبير ليه الاولوية في اختيار الستات بس كل واحدة بتبقي بتميل لذكر معين كده عشان يحميها مصالح يعني و لو ملقتش واحد معين بتدورها مع شباب القبيلة بقي علي حل شعرها و ساعات بيبقي أجبار و الله بس أنا نيفر
-- أنت مرتبط؟؟؟!
- لا صادقة مهو واضح من العينة هو أنت بتفخي شفايفك كده ليه ... ليه يا ستي بتمرمغي نفسك في الارض كده
-- بغريك سألت سؤال أنت مرتبط؟؟!
- ايه الأغراء في كده ما أنت طول ما أنت بتعملي الهبل ده مش حتربطي و أه يا ستي أنا متجوز شكرا.
-- ملكش في الطيب نصيب و هو الأغراء عندنا كده نفخ شفايف مع التسبيل و الدرمغة.
- طب ممكن تتمرمغي قصدي تقعدي علي كرسيكي كفاية درمغة بقي؟
-- قفل قوي بس اي ليك ات .
- كتر خيرك بتطفحوا ايه قصدي بتاكلوا ايه؟  قلبتي نفسي بالدرمغة بتاعتك ديه.
-- احنا فيشيتريان.
- ده يعني ايه بتاكلو سمك يعني ولا اوعي يكون قصدك فيجيتريان نباتيين يعني؟
-- ايوه هي ديه مش بقولك فقيق أعشاب بقي فاكهة ورق شجر شوية حشرات أو نمل نو بروبليم.
- ده لزوم التحلية أكيد خلاص كفاية طب ده أنتوا بتاكلوا ايه مين بياكلكوا بقي؟!
-- محدش يستجرأ يجي جنبنا و أحنا في حما الSilverback طول معدي ال180 سم بعرض و عضلات و بنشات و باي سبس و حاجة ايه تومي كولمان بس يعني ونس ايفري وييل كده الفهد بيغفله و يهاجم الشباب اللي بيبعدوا بعششهم شوية خاصتا أنه قوي و سريع وبيعرف يتسلق الأشجار عيل سو بيبهدلنا يوم ما بينويها مش بقولك شكلك مشفتش طرزان مش مثقف و الله




- يا ستي و الله شوفته بس يعني الSilverback بيعمل برضه زي الفيلم كده ؟
-- أيوه طبعا يقف علي رجله بس و يزعق بصوته ويخبط علي بنشاته كده ربنا يحرسه و عليه منشت يهد جبل غير ان أنيابه ممكن تقطع الفهد لو عكشة.
- بس هو حيعرف منين ما انت بتقولي هو بيروح علي الصغيرين.
-- أول ما اي فرد بيحس بخطر يزئر أو يصوت واتيفر و كل بيجري يتجمع حوالين السيلفرباك.




- عاش و الله أسرة مترابطة مريبة بس مترابطة بس علي كده أنتوا مهددين بالانقراض أزاي؟!
-- ربنا يكفيك شر البني ادميين من ساعة ما اكتشفونا و احنا بقينا للرياضة وهواة جمع الفرو و الجماجم منهم لله يا شيخ.
- فعلا و الله ربنا يكفيك شر البني أدميين طب احنا وصلنا كده لنهاية حوارنا مع الفنانة شوشو نجمة أعلان فريسكا
-- لا ثواني التانية ديه كانت أنسان غابة مش غوريلا أصلا
- ايه ده امال انت ايه؟
-- انا شوشو اعمال حرة
- أنا قولت كده و الله من الأول أطلبلي بوليس الأداب يا ابني يلم المتمرمغة ديه و هاتلي المعد عالشجرة عالمكتب
Written by:Amr Khaled -T.Rex
#TRex_Magazine
#AK_TRex


سلسلة تعرف - حوار مع صديقي الخنفس

حوار مع صديقي الخنفس

(اي قلبي... يا اوفي جزء في كياني. لا تقف شاهدا ضدي في المحكمة لأنك الآله الموجود في جسمي و المحافظ علي اعضائي) كتاب الموتي, الفقرة 30


مستمعينا هابي ويك ايند و يا رب تكونوا دايما بصحة و سعادة وحد الله في قلبك بس مبدأيا و متوديناش في داهية بشوية الكفر اللي فوق دول.
تعرف ايه هو الجعران المصري اللي مفيش مقبرة او اكتشاف اثري مبيلاقوش فيه صورة او تمثال او حتي تمائم صغيرة للمخلوق ده؟ - هو شكله عامل زي الخنفسة لا هو هو خنفسة بس ايه اللي يخلي حشرة زي الخنفسة تمثل الاهمية و القدسية ديه للمصريين زمان يعني احنا حاليا بنديها بالشبشب.

عشان تعرف الاول اهمية الجعران عند المصريين القدماء يكفي اقولك انها في لغة المصريين القدماء كانت بترمز لجملة يكون او يأتي للوجود كمان كانت بترمز للاله رع اله الشمس واحد من اهم الالهه اللي عبدها المصريين القدماء. المصرين القدماءكانوا بيعملولها تماثيل من مادة سراميكية مخصوص اسمها الفاينس و كانوا بيستخدموها في الحلي و الازرار و بيعملوا بيها تمائم و تعاويذ للحماية من السحر. كمان كانت بتستخدم كأختام و نياشين و كانوا بوثقوا عليها الاحداث الهامة في تاريخ الدولة او في تاريخ او انجازات الشخص اللي بيشيلها او بتدفن معاه حتي ان البعض بيقول ان يكفي انك تقرا الداتا اللي موجودة علي الجعران الموجود في اي مقبرة عشان تعرف المدفون فيها مين و موجود في اي فترة و اسرة بالظبط تقدر تقول كده مفتاح المقبرة.


و بغض النظر عن المشهد اللي فيلم The Mummy مش فاكر انهي جزء لما بارتيتة خنافس هاجمت لصوص المقبرة بس اهمية الخنفسة للمتوفي كانت اهم من حماية المقبرة من اللصوص كانت حمايته هو من شرور السحر كمان زي ما قرينا فوق كانت بتكتب عليها الفقرة 30 من كتاب الموتي و بتوضع في كفن المومياء عشان تساعده في مرحلة الحساب و تحنن قلبه عليه عشان يجتاز طقوس وزن القلب و يخش الجنة.
بغض النظر ان الله يرحمهم حيتشووا في نار جهنم و  ربنا برضه اعلم بمصيرهم  ملناش دعوة بالخرف ده هاتلي بقي الخنفسة اللي كانوا عاملينلها الهيلمان ده كله و حنرجع للفراعنة تاني بعد ما نعرف هي مين.

اسمك ايه يا خنفسة؟
 - ده عبيط ده ولا ايه خنفساء الروث و تقدر تقولي يا جعران او ابو جعل.
- عاشت الاسامي سعيدين بمعرفتك القذرة 😂
-ممكن اكون حشرة مقرفة و مليش لازمة بالنسبالك بس انا حاجة مهمة جدا و متفردة و اسأل جدودك الله يرحمهم كانوا عارفين اهميتي و لو اختفيت ايه اللي ممكن يحصل.
- طيب انا اسف انا بهزر معاكي متبقيش كومبليكس كده احكيلنا اكتر عن نفسك و من غير افورة الله يباركلك خليكي فريش يعني 😁.
- ماشي زي ما قولتلك انا اسمي خنفساء الروث ده لان ده اكل عيشي و مصدر رزقي انا بتغذي كليا علي روث الحيوانات
فيه مني 3 انواع
نوع بيكور الروث بفضل تصميم رجله سبحان الخالق و بيقغد يدألج فيه و يكبر الكورة لحد ما يسحبها بعيد عن منطقة تواجد الماشية حقولك ليه بعدين.
النوع التاني و ده بيعمل نفس الموضوع بس بيحفر انفاق و يحط كورة الروث فيه .
النوع التالت ده بيعيش تحت الماشية اصلا و بيخلص عالروث اول بأول.
في نوع رابع بس مش موجود كتير  و ده بياكل الديدان من التربة و بعتبر النوع الوحيد الاكل للحوم و موجود في وسط امريكا بس

- ترجمت اهميتي ولا لسه؟؟

-يعني بس قوليها انت للمستمعين و انا اسف يا ست الناس 🙍
-دوري في الحفاظ علي البيئة هو النظافة تقدر تقول ان انا من اهم جنود النظافة اللي ربنا خلقهم و اللي من غيرهم حتنتشر مخلفات الحيوانات في كل حته. مخلفات يعني دبان يعني ميكروبات يعني امراض و بلاوي متلتلة حتصيب كل الحيوانات اللي خلقها ربنا
يعني انا بعمل 3 حاجات بخلص الحيوانات من قاذوراتها و بدألجها بعيد عنها و بتغذي عليها
بحد من تواجد الدبان و بحافظ علي التوازن البيئي و بحد من انتشار الامراض
الدور الاخير و الاهم الروث اللي انا بتخلص منه برجعه للتربه تاني بدفنه فبترجع العناصر الغذائية للتربة تاني بالبلدي بسمد التربة
و بزود خصوبتها
-كل ده يطلع منك بس ثواني هو انت بتستفادي ايه من كرة الروث اللي بتعمليها ديه اللي فهمته انها بتبقي كبيرة جدا بتفوق وزنك بمئات المرات و بتعملي كور كتير اوي في اليوم انت بتستفادي ايه متاكليهم في مكانهم وخلاص 😫
-لا منا حفهمك انا بدفن فيهم البيوض بتاعتي عشان اوفر الغذاء للبيبي خنافس اول ما يتولدوا انا او شريك حياتي بنوفرلهم الكورة ديه عشان ميتبهدلوش من بعدنا بنسبلهم حاجة يتسندوا عليها للزمن.
-حنينة و الله يا ريت كل الاهالي زيكوا بس سؤال اللي فهمته انك وانت بتكوري الروث بتبقي مدية ضهرك للطريق ازاي بتبقي عارفة انك ماشية في خط مستقيم بتعرفي طريقك ازاي يعني
- بص انا و بلا فخر من ضمن الحيوانات القلائل لو مكنتش الوحيدة يعني اللي بستخدم الشمس و القمر و النجوم في تحديد الاتجاهات
انا اه باستخدم حاسة الشم القوية بتاعتي عشان القي اكل اللي ريحته بتبقي ايبة اخر الدنيا بس و انا راجعة بيتي بقي ببص لفوق لو الشمس او القمر موجودين بعرف اتجاهي فين لو مش موجودين و الدنيا ليل بتتبع النجوم زي الدليل في الصحرا بالظبط.
- يعني انت عايزة تفهيني انك معلمة طريقك بالنجوم؟؟؟!  عشان كده بقي المصريين القدماء قدسوكي و شبهوا الاله رع بيكي 😨
- بالظبط كده هما شافوا في كورة الروث نفس فكرة قرص الشمس و لاحظوا فكرة اني باتتبعه ففكروا ان زي رع بالظبط بحرك قرص الشمس عشان الشمس تختفي و الليل يجي.


 -مستمعينا نحب نشكر ضيفة حلقتنا النهاردة اللي شرفتنا و فهمتنا دورها في حياتنا و احب اقولكوا شوية حجات كده اختم بيها حلقة الويك ايند
فيه حوالي 5000 نوع من الخنافس منتشر علي وجه الكرة الارضية كلهم شغالين علي نضافة الكوكب.
بدون الخنافس حتنتشر الامراض و الأوبئة بين الحيوانات و قطعان الماشية و ديه كانت دراسة في الولايات المتحدة ان بسبب دفن الخنفسة للروث بيتم توفير 380 مليون دولار ثانويا.
تقديس الفراعنة للخنفسة كان من منطلق انها بتحميهم و بتنضفلهم بيئتهم لانهم كانوا مزارعين و كمان لانها كانت بتمثل الوجود في حد ذاته و لانها كانت علي دراية فلكية بمواقع النجوم و بتسترشد بمجرة درب التبانه في حركتها.
خنفثاء الروث مبتاكلش او بتشرب اي حاجة تانية هي بتعتمد كليا علي الروث يكي.
محدش يضحك عليك و يقولك انا معايا جعران اصلي فرعوني تشتريه لانه كان بيتضرب في عهد الفراعنة نفسهم حتي التست بتاعه خرف بيقولك ايه بقي تعصر عليه نص لمونة علي اساس انه طبق فول يعني لو حرك جناحه يبقي اصلي ده عيل غبي براس كلبة و بيعبد الاصنام فملكش دعوة بيه.
اي حيوان ربنا خلقه علي وجه الارض ربنا خلقه لسبب و سبب قوي و مش معني انك مش عارف السبب ده ان الكائن ده مش مهم او وجوده ملهوش لزمة.
كنا معكم من اذاعة #TRex_Magazine انجوي يور ويك اند
#تعرف