سلسلة تعرف - الجراد - جنود آلهية و رحمة

سلسلة تعرف - الجراد - جنود آلهية و رحمة

ربنا سبحانه و تعالي استخدم الجراد اكتر من مرة لمعاقبة الشعوب اللي بتطغي و بتحارب دينه و الامثلة اتذكرت اكتر من مرة في القران الكريم و في كتب التاريخ عندنا في مصر كمثال اثناء حقبة فرعون موسي بس ربنا سبحانة و تعالي برحمته و عدلة دايما مبيقفلش في وش عبده الباب بصورة كاملة بيسيبله دايما فرج حتي مع الضيق
تعرف ان زي ما الجراد ليه اضرار و بيعتبر من الحاجات اللي ممكن تدمر اقتصاد دول و تنشر المجاعات الا ان برضه ليه فوايد كتير جدا كمصدر غذاء و كأن ربنا بحكمته و عظمته يود ما ابتلي الانسان بكائن ياكل الاخضر و اليابس حتي بنقول علي اصحابنا اللي مبتعتقش اكل انكوا عاملين زي الجرادة بغض النظر عن الجراد مبيشربش النسكافيه بتاعك لو سبته يبرد علي مكتبك و روحت عملت حاجة . الا ان الجراد نفسه بيعتبر مصدر غذاء مش بس غذاء قيمته الغذائية فاقت توقعاتي الحقيقة لدرجة اني بفكر اقوم اضربلي جرادتين و انزل الشغل 😂😂😂.
بس قبل ما نقول فوايد الجراد و قيمته الغذائية خلينا نتكلم في الاذي الاول الجراد رمز الابادة يعني الاكل حيخلص يعني حنجوع و المحاصيل حتدمر مبدأيا كده ده اول حاجة بتيجي في بالك لما تشوف جرادة لان ميس سوسن قالتلك كده في حصة العلوم. ححكيلكوا حدوته من حوالي 15 سنة تقريبا و تحديدا كنت مع الاسرة في وندرلند في العيد مستنين دورنا في احد الالعاب فجاة لقينا حاجة خبطت في اخويا الصغير اللي كان عمره ساعتها ميعديش 8 سنين تقريبا و وقعت عالارض و بفضول قعدنا ندور وسط الزحمة ايه اللي خبط فيه كنت فاكرها اللعبة ام استك اللي بتطير لفوق ديه بس لما لقيناها فضلنا متنحين مش بس احنا احنا و الناس اللي حوالينا لان المنظر كان مرعب حشرة حمرة طولها قد الايد جسمها قوي و اللي مش قادر انساه فكها اللي كان عبارة عن سنان بالطول و داخل عاشق و معشوق في بعض كده 😱. ثواني عدت و بدات تتكرر الحادثة مع الناس اللي حوالينا اللي خدله جرادة في وشه و اللي وقعت في حاجة كان بياكلها. الناس بدات تقلق لدرجة ان والدي خدنا و روحنا اليوم ده و مرضاش يخليني اخد الجردة لتشريحها و دراستها ماشي يا حج. و لأن الحج ربنا يديله الصحة و طولة العمر ايموشناته اوفر شوية حسيت ان فيه كارثة خاصتا بس المرة ديه كان معاه حق تاني يوم ولاني كنت ساكن في مكان مفتوح  ظهر اول سرب جراد اللي كبره و عدده كان  لدرجة انهم كانوا حاجبين الشمس 😨 ده و احنا في القاهرة المفروض ان الزراعة مش كتير للدرجة.

فيلم الرعب ده خلص لما النشرة جت ووضحت ان اسراب الجراد المنتشرة في مصر غير مكتملة النمو و مش خطرة للدرجة اللي تسبب الرعب و الهلع للناس وان الجراد ده عابر سبيل جي ترانزيت مش ناوي علي بيات و ان مصر محطة في طريقة لان الجو مش مناسب لاتمام عملية التزاوج حتي الجراد عنده مشاكل عشان يتجوز في مصر 😂😂😂 بس لان خطورة الجراد بتبدأ لما يوصل لطور النمو و يبدا يتكاثر و يتغذي هنا كانت حتبقي الكارثة.
خلصت رغي يا عم اللتات ايه بقي اطوار نمو الجراد و ايه اقصي خطورة ليه لما يوصل لمرحلة البلوغ و ليه مكنش الجو مناسب عايز شمع و جو رومانسي مثلا بس يا خفة حاضر.
دورة حياة الجرادة بتاخد حوالي من شهرين ونص و حتي خمس شهور بيعتمد الموضوع علي الوصول لمرحلة البلوغ اللي بيتاخر لو الجو برد و بيبقي اسرع في الجو الحر
دورة حياة الجرادة بتنقسم ل3 مراحل اساسية البيضة الحورية الحشرة الكاملة

الجرادة خلال حياتها بعد مرحلة البلوغ بتبيض 3 مرات المرة بيبقي فيها من 20 الي 200 بيضة بتدفنهم في حفرة و تغطيهم بطبقة بنفرزها بحيث ان الجحر ده يبقي رطب عشان يعزز من فرصة ان البيض يفقس يعني بنتكلم في حوالي 450 جرادة كل اربع شهور مثلا
حورية الجراد بتكون عبارة عن جرادة صغيرة بعد فترة بتتسلخ الجرادة دية من الهيكل اللي بيحاوط بيها و توصل انها تبقي جرادة غير مكتملة النمو
الجرادة الغير مكتملة النمو بيبقي لونها احمر و ديه اللي هاجمت مصر في الحادثة اللي ذكرتها فوق بتبقي جرادة غير مهيئة لوضع البيض او عملية التزاوج ككل.
بيبدأ لون الجرادة يتحول للون الاصفر تدريجيا و جسمها يكبر و الذكور بتبقي عادتا اكبر من الاناث و بمجرد ما بيلاقوا المكان المناسب للتزاوج من حيث درجة الحرارة توفر المياه و الغذاء و نسبة الرطوبة بتبدا الاعضاء مكتملة النمو من السرب تقدر تقول اللي كونوا نفسهم ينزلوا علي الارض بتجوزوا بينما باقي السرب يكمل طريقة عشان عيب حيقفوا يتفرجوا يعني عملية التزاوج بتستمر 4 ساعات و بتقدر الانثي تحتفظ بالمواد المخصبة من الذكر تكفيها ال3 مرات بتوع دورة البيض بتاعها ربنا يديهم الصحة.

سرب الجراد بيوصل عدده للملايين لدرجة انه بيتوصف بالكيلومتر المربع اللي بيغطيه و الرقم المفزع ان الكيلومتر المربع جراد يقدر يلتهم 100000 طن نبات اخضر و لحاء شجر لان الجرادة الواحدة بتاكل قد وزنها و السرب الواحد بيمتد لعدد من الكيلومترات يعني خراب مستعجل 😨😨😱

طب ده نموته ازاي ده مبدأيا ده مش دور فرد ولا دولة فية هيئات عالمية لمكافحة الجراد لانه كارثة بيئية بكل المقاييس و لانه تحركاته بتبقي وفقا لظروف الطقس و حركة الرياح و قدرته علي الطيران لمسافات كبيرة لدرجة انهم في مرة تم رصدهم بيعبروا المحيط الاطلسي من موريتانيا للكاريبي و ضحي جزء منهم بحياته بانهم يغرقوا عشان الباقي يريحوا علي ضهرهم و يكملوا رحلتهم بعد كده  ده بيخلي مفيش حد امن منه عشان كده الدول بتتكاتف مع بعض و بتساعد بعض في المكافحة لان لما يخلصوا عندي حيجوا عندك كده كده مش حبا في بعض يعني.
المكافحة بتبقي بطرق كتير كيميائيا زي الحشرات العادية بس ديه بتضر البيئة او انهم يهاجموا الحشرة في طول التبويض وهي ضعيفة و يحرقوا اماكن التفقيس و الطريقة الفعالة مؤخرا المكافحة البيولوجية بيرشوا السرب بفطر معين عن طريق الطيارات الفطر ده مميزاته انه معي يعني الجراد بيعدي بعضه بينتشر بسرعة و غير ضار بالبيئة زي الطرق التانية.

الجراد وحش اه بس مش عند كل الناس خاصتا شعوب اسيا و بعض دول الخليج لان الجراد عندهم بيبقي الجراد الاصفر و ده بيبقي صالح للاكل علي عكس الجراد في مصر و افريقيا عمتا بيبقي احمر و ده بيبقي غير صالح للاكل 😂
يا عم جراد ايه اللي بيتاكل ايه القرف ده -اصبر بس
الجرادة اللي مش عاجباك ديه 62% من وزنها بروتين و 17% دهون غير عناصر غذائية زي البوتاسيوم و الكالسيوم و الماغنسيوم... اللي بيحتاجهم جسم الانسان
ماشي انا معاك بس ده قرف -سيبني اكمل

تناول الجراد بيستخدم كمنشط عام للجسم و للدورة الدموية و منشط جنسي (لاحياء في العلم) لدرجة شبه البعض تناولة بتناول الفياجر - لا كمل يا اسطي 😂
و بعض المصادر بتذكر ان في ليبيا بيفصلوا الراس و الاجنحة و الارجل و بجففوا الجسم و بياكلوه مع الحليب بيعملوه كورنفليكس يعني 😁
علاج للروماتيزم علاج لتاخر النمو علاج لعسر البول و الجراد السمين تناوله بيعالج سموم كتير منها سم العقرب.
بيجفف و يستخدم في الخبز و بيعرف بدقيق الجراد فيه قيم غذائية عالية جدا اعلي من الدقيق العادي
بس برضة مقرف الصراحة انا بحاول اقتنع بس مش عارف - الاسطورة بتقول اي حاجة بكاتشب و مايونيز بيبقي طعمها حلو 😂

فسبحان الله بينما فيه ناس بتعتبره مصيبة في شعوب بتستنفع منه بل تكاد تكون بتستبشر بقدومه و بيحللهم مشاكل الغذاء عندهم
و زي ما قلنا ربنا مبيخلقش حاجة الا بتوازن معين مدروس بعناية و ادي الانسان العقل اللي يمكنه من استخدام الموارد ديه للخير بس بنلاقي ان الانسان بيستخدمها في الشر
العلماء لقوا طرق يقدروا يوجهوا بيها الجراد و يستخدموه كسلاح بيولوجي و مع سلاح زي ده انا من وجهة نظري انت متفرطش بجندي و انت عندك جيش حشرات يخلص موارد العدو بس مظنش انه بدا يستخدم خوفا من فقد السيطرة لان لو حصل مش حيخلوا حتة نجيلة في الارض
كان معكم #TRex_Magazine من بلكونة بيتنا مع الاعتذار للبشمهندس محمد جرادة اللي سيرته جت في الموضوع بالغلط لا قاصد الصراحة 👊 دمتم بحفظ الله و امنه و السلام عليكم و رحمة الله و بركاته
#تعرف 

التعليقات
0 التعليقات