سلسلة تعرف - الناجي الاخير

سلسلة تعرف - الناجي الاخير

الحياة علي كوكب الارض هشة محمية بفضل ربنا عز و جل و مصممة بعناية لاحتواء الحياة بكافة الاشكال اللي نعرفها و اللي منعرفهاش و مبنقدرش ندركها بحواسنا حتي.
بس اسرح بخيالك كده ايه لو في غمضة عين كده الكوكب اتطربق فوق دماغنا ايا كان السبب بقي نيزك تايه كيم يونج خسر في البليستيشن فاتنرفز و ضرب نووي. سيول عاصفة شمسية براكين زلازل ...... مين بقي الكائن اللي حيفضل صاحي بعد المعجنة دية?

اول اجابة جت في دماغي كانت التمساح لانه عايش تقريبا علي وضعه كده من ايام الديناصورات بس احنا بنتكلم عن حاجة اقوي مثلا ان الكوكب يتطبق زي كان البيبسي كده او فاجيتا يشوطه علي جوكو ضربة حرة مباشرة (دراجون بول)  ممممم فلا مش التمساح.
قبل ما اقولك الكائن ده مين ححكيلك شوية عنه و احكم انت بنفسك هل يستحق انه يعيش فعلا هو مش قرارك مبدايا لانك حتكون بسطرمة فمتتنفخش قوي و انت بتحكم يعني احنا اول كائن حيروح بخ.
الكائن اللي بنتكلم عنه النهاردة بسم الله الرحمن الرحيم كدة يقدر يتحمل درجات حرارة من فوق الصفر المطلق حوالي قريب من -272.9999 درجة مئوية و لحد 151 درجة يعني من ابرد درجة حرارة نعرفها في الكون و لحد درجة حرارة تفوق غليان المية.😱
الكائن ده مع انه بيعيش في المياه العزبة و المالحة الا انه يقدر يعيش بدونهم في حالة جفاف لفترة كبيرة عن طريق اعتماده علي الميه اللي في جسمه.
يقدر يتحمل الاشعة الكونية و اشعة جاما الناتجة عن الشمس و اللي مفيش مخلوق يقدر يتحملهم و يتعايش معاهم لفترة و ديه كانت نتيجة تجربة روسية بعتوا فيها الكائن ده للفضاء بدون حماية من الاشعاع و المفاجئ انه عاش عادي جدا و كمل دورة حياته و كائن شئ لم يكن لا و كمان وضع بيوض و قست كمان في البيئة العدائية ديه خد راحته عالاخر و بيرجع الفضل لقدرته علي ترميم الحمض النووي الخاص بيه.😱
اللطيف بقي انه بيعيش في غياب الاكسجين عادي جدا اقولك عالاغرب بقي سبحان الخالق بيدخل في حالة ثبات تكاد توصل للموت لمدة تصل ل30 سنة و ديه كانت تجربة تمت فيها تجميدة لمدة ال30 سنة دول و بمجرد ما تم نقلة لدرجة حرارة عادية خرج من حالة الموت المؤقت اللي كان فيها و كأن شئ لم يكن و بتهيالي الفترة ديه كان العالم زهق و عايز يعرف هو حيصحي تاني ولا لا فخلص التجربة زهق مش اكتر يعني متسرع اوي.😂
و بجانب ان عمره ممكن يوصل ل200 سنة بيقدر يتحمل ضغط 6000 ضغط جوي عشان اقربهالك لو فرضنا انك غطست في اعمق نقطة علي سطح الارض (خندق ماريانا) الضغط ده اعلي منها 6 اضعاف.
اه نسيت حاجة السموم مبتأثرش فيه.
كل ده بقي بسبب قدرته الكبيرة علي التكييف و قدرته علي التحكم الكامل في العمليات الحيوية في جسمه بحيث انه يشتغل باقل اقل مقومات الحياة لدرجة تصل للانعدام تقدر كده تقول بيحط نفسه في السيف موود.
الكائن ده اسمه دب الماء.
ده الابيض ولا الاسود? ولا ده ولا ده
اه من عيلة البندا? بندة ايه يا ابني ما تهدي حقول اهو.😡

هو اسمه كده بس مش دبه من بتاعه جنينة الحيوانات ده كائن مجهري بيتشاف تحت الميكروسكوب بس.
انت احبطتني 😔 علي فكرة يعني هو مش دبدوب
لا هو دبدوب في نفسه بس علي صغير طوله مبيتعداش ال1.5 مل بالكتير قوي و عنده 8 رجول و فيه منه اكتر من 1000 نوع بيعيش في المية زي ما قلنا ايا كانت مصدرها.

سبحان الله الغريب في الموضوع كمان انه بيتكاثر بطريقتين زي اي حيوان الانثي بتبيض و الذكر يلقح البيض و في بعض انواع الانثي بتضع البيض و بيفقس بعد فترة لوحدة بدون ذكر ملهوش لازمة في الليلة ديه من الاخر.😂
اقدر الاقيه فين عم الدبدوب ده?
لو خدت اي عينة مية في مكان بتنمو فيه طحالب حتلاقيه بنسبة كبيرة لو كبرت العينة تحت الميكروسكوب و متستناش دباديب من حد في الفلانتين 😊.
اه نسيت اقولكوا ان الدبدوب الصغنن ده من الشوك اللي يتطعن في ضهر نظرية التطور لانه ببساطة ملهوش مكان في شجرة التطور وصلت لاعترافهم انه هو فريد من نوعه و كأنه جي من الفضاء او اتخلق من العدم ( سبحانه يخلق ما لا تعلمون ).

كان معكم #TRex_Magazine من بوتيك ناشيونال جيوجرافيك.
تصدقوا نسيت اكتب #تعرف في اول الموضوع بوظت الانترو بتاعتي يلا مش مهم 😂😂.