سلسلة تعرف - جوراسيك بارك حقيقية

سلسلة تعرف - جوراسيك بارك حقيقية

الفكرة المجنونة اللي اتعرضت في فيلم جوراسيك بارك و اللي قامت عليها السلسلة كلها بعد كده هي ان العلماء نجحوا في انهم يستخلصوا الحمض النووي للديناصور من ناموسة قرصت ديناصور و طارت من الخوف تقريبا لبست في عسل شجرة صنوبر اللي هو عبارة عن المواد الصمغية اللي بتفرزها اشجار الصنوبر  عشان تدافع عن  نفسها من الفطريات و الحشرات و مع مرور ملايين السنين اتحجرت الغابات ديه و اتحولت المواد الصمغية ديه للكهرمان و فضل محافظ علي الناموس زي ما بيحافظ علي اي حاجة بتقع جواه و كأن الزمن تجمد داخل المادة ديه.


ده حجر سحري يعني?
انت شايفني الشيخ تيريكس المغربي من غير فطريات و بغياب الاكسجين المحبوس داخل الكهرمان لا حيحصله اكسدة ولا البكتيريا و الفطريات حتحلله و بالتالي حيحافظ علي الموجود جواه بنسبة 100% و كأن الزمن قد توقف داخل البلورة.
طيب انا عجبني موضوع الكهرمان ده عشان كده حعمله موضوع لوحده ما علينا منه دلوقت.
بس الفكرة اللي كانت في الفيلم الخيالي و لجوئهم للناموسة اللي قرصت ديناصور معرفش عرفوا منين انها قرصت ديناصور نبطل الاسئلة المحرجة ديه كانت لانهم ملاقوش حفرية يقدروا يستخرجوا الحمض النووي للديناصور انا عندي خبرين واحد حلو و التاني احلي تعرف انهم لقوا ديل ديناصور محفوظ في الكهرمان و فيه الحمض النووي كامل غير مشوه للديناصور ده اقولك علي حاجة اجمل تعرف انهم لقوا ماموث كامل محفوظ في التلج في سيبريا.

مش ده الفيل ابو قوصة اللي في ايس ايدج?!
مممم اه هو يا جهبز 😏 تقدر تقول الفيل ابو قوصة اللي مش عاجبك ده حيكون اول كائن حي حنقدر نسترجعة من الحيوانات المنقرضة لان ليه قريب عايش و هو الفيل زي ما قولنا و اللي الابحاث اثبتت خلاياه بتتقبل الجينوم بتاع الماموث و بتعامله اكنه الجينوم بتاع فيل عادي و بالتالي حيكون بداية مشروع تطوير الحمض النووي لاستعادة الكائنات المنقرضة 😱😨😱😨😱.

الماموث!
قبل ما نتكلم حنرجعة ازاي و هل الموضوع اخلاقي اصلا اننا نلعب دور مش بتاعنا و نرجع مخلوق سقط في اختبارات الانتخاب الطبيعي للكوكب لازم نشوف حنرجع ايه مش ناقصة بلاوي اصلها.
اللي شجع العلماء علي البدأ استنساخ الماموث عن المحاولة مع الديناصورات مش بس الحفريات الكاملة بتاعت الماموث. علي عكس الديناصورات الانسان عاصر وجود الماموث و مشكلش خطورة علي بقائه مش حياكولنا يعني بالعكس حتعرف ان احنا اللي حطينا عليهم 😔.
بالرغم من حجمه الكبير و اللي بيفوق الفيل الافريقي اضخم الثدييات البرية اللي عايشة في وقتنا هذا و  اثبتت الحفريات ان طول الماموث الدكر بيوصل تقريبا ل5 متر و وزن 12 طن بسم الله ما شاء الله.😨

نيجي للشكل اللي بالرغم من انه يبان شبه الفيل بس بفروة الا ان الفروة ديه  مخبية تفاصيل.  بتخلي الماموث مختلف عن الفيل في الهيكل العظمي و شكل الجمجمة المدبب مع نابين اطول بكتير من ناب الفيل و معقوفين يعني منحنيين لفوق كده كمان. ورا جمجمة الماموث فيه جزء عضمي شبه سنم الجمل كده  الاذن اصغر و متغطية بالفروة برضة الفروة اللي كانت سبب في نجاته في العصر الجليدي و مكنته من الانتشار في كل بقاع الارض تقريبا لانها خليته يتحمل ظروف البرد القاسي و مكنته من الهجرة لمسافات طويلة بحيث انه وصل سيبريا و عدي من علي كوبري الجليدي بتاع ايس ايدج ووصل امريكا بحثا عن الاكل الرحلة الطويلة ديه كانت سبب توفر حفرياته عن اي حيوان منقرض تاني.
الماموث بياكل ايه?
من العينات اللي لقوها في معدة الحفريات لقوه فيجتريان زي الفيل بياكل اوراق و لحاء الشجر
مش عارف حنكفيه منين شجر ده لو رجعناه تاني بس معروفة الماموث بيتولد برزقه.😂

الانسان القديم ازاي اتعامل مع الماموث?
زي اي كائن متحضر كان بيقتله و بياكله 😓 لانه طبعا بيحتوي علي كمية لحم تكفي قبيلة في الوقت ده بس مش بس كده من الرسومات اللي لقوها في الكهوف صيد الماموث كان بيعتبره الانسان القديم من الشجاعة و كانوا بيعملوا عليه مسابقات لان عشان تصطاد حاجة بالحجم ده محتاجة قوة و ذكاء و مجموعة محترفة صيد مش بقولكوا كائن متحضر من يومه.😠

يعني هو في الاخر فيل كبير بقوصة كدبتش انا عليك?
لا مش مجرد فيل كبير لابس باروكة ربنا رزق الكائن ده بميزة غير الفروة مكنته انه يعيش في العصر الجليدي دمه بيحتوي علي مواد مانعة للتجلط بيفرزها الجسم بخيث ان الدورة الدموية تبقي شغالة في اصعب درجات الحرارة سبحان الله😨😨
طب لما هو شبح كده انقرض ليه?
سؤال وجيه زنقتني و اجباته كلها مجرد تكهنات من العلماء بعضها رجح السبب لانتهاء العصر الجليدي و انه متحملش درجات الحرارة العالية بالنسبة لجسمه و ان بسبب الصيد الجائر حتي الاعداد اللي نجحت في البقاء اتاكلت سبب تاني قلة الاكل زي ما قولت حنكفيه شجر منين ده كمان سبب اخير لسه مكتشفينه قريب انه حصل للماموث في اخر عهده من 12000 سنة طفرة جينية اضعفت حاسة الشم الخاص بيه و اللي كانت طريقته لايجاد الطعام و ايجاد شريك حياته انقرض مزكوم يا حبة عيني.😅
هما حيرجعوه ازاي طيب?
سنة 2013 عثر العلماء الروس في سيبريا علي ماموث عاش من 40الف سنة يكاد يكون كامل حتي لقوا في الجليد اثار سائل احمر بالتجارب لقوا انه دم الماموث و ده كان مصدر الجينوم اللي بدأوا عليه سلسلة التجارب الواعدة علي حد قولهم انهم قربوا جدا من ايجاد الطريقة المثلي لولادة اول ماموث يتم اعادته للانقراض و نمو الجنين في رحم صناعي الخبر ده كان من شهر تقريبا فلسا  مفيش تفاصيل كتير عنه.


بس اللي يمشي علي الفيل يمشي عالدرفيل قصدي الديناصور يعني و قريب حنلاقي كائنات مشوفنهاش غير في الكتب في جنينة الحيوانات لان اشك انهم حيطلقوها في البرية و يتحملوا عواقب الاخلال بالتوازن البيئي و ربنا يستر.
السؤال الاخير بقي
هل فعلا من حقنا اننا نرجع حيوان كنا من اسباب هلاكة في المقام الاول هل ده اخلاقي بالذات ان النتيجة اللي حنوصلها حتمكنا من استرجاع حيوانات تانية هل من حقنا العبث في الكوكب بالمنظر ده?
حسيبكوا انتوا تجاوبوا علي السؤال!
كان معكم #TRex_Magazine من القطب الشمالي بجوار احد البطاريق.
#تعرف

التعليقات
0 التعليقات