زلزال تشيلي العظيم The Great Chilean Earthquake

زلزال تشيلي العظيم  The Great Chilean Earthquake


الساعة 3:11 عصرا بتوقيت تشيلي وعلى بعد 600 كيلومتر جنوب العاصمة سانتياجو حصل الزلزال الأقوي فى التاريخ يوم 22 مايو 1960. الهزة وصلت 9.5 ريختر واستمرت لمدة مابين 10 و 15 دقيقة وكان مركزها مدينة فالديفيا Valdivia على ساحل تشيلي وخلال 24 ساعة كان المحيط الهادي كله اتأثر بالهزة الأرضية وحصلت موجات تسونامي وفيضانات علي مسافات أبعد من 16000 كيلومتر فى اليابان وجزر الفلبين. الهزات الارتدادية التابعة للهزة الأصلية استمرت لمدة 30 يوم ووصلت قوة بعضها 7 ريختر وتم تقدير الوفيات الناتجة عن الهزة الأرضية وموجات الفيضانات بحوالي 6000 شخص. موجات التسونامي المتولدة سافرت بسرعة 320 كيلومتر فى الساعة ووصل ارتفاعها فى ساحل تشيلي وهاواي لحوالي 12 متر. موجات التسونامي وصلت اليابان بعد حوالي 22 ساعة من الزلزال وكان ارتفاعها 6 متر ووصل الدمار لساحل كاليفورنيا فى الولايات المتحدة، جزر هاواي والفلبين وتم تقدير خسائر الزلزال برقم يتراوح بين 400 و 800 مليون دولار أمريكي. 

الصور دي لجزء من الدمار الناتج عن زلزال فالديفيا العظيم بالترتيب فى شوارع تشيلي، ساحل اليابان وجزر هاواي




الزلزال هو حركة غير متوقعة لسطح الأرض وبتنتج نتيجة لتحرك طبقات سطح الأرض حركة نسبية علي بعض ونتيجة لكده بتتولد نقط تركيز عالي للاحتكاك تحت سطح الأرض Focus وبتنطلق الطاقة دي بشكل مفاجيء ف صورة موجات اهتزازية اللي بتبقي زلزال وبيتم تعريف النقطة اللي علي سطح الأرض مباشرة فوق نقطة الاحتكاك بانها مركز الزلزال Epicenter وبيتم قياس الزلزال بمقياس ريختر الظاهر فى الصورة اللي تحت وفى حالة فالديفيا كان المقياس وصل 9.5 ريختر وده التصنيف الأكثر دمارا على المقياس. فى المستقبل ان شاء الله هيبقي فيه مقالات بتركز على أنواع الزلازل وطبيعة حدوثها وكمان جزء عن جيولوجيا الأرض، لكن فى المقالة الحالية التركيز منصب على الزلزال الأعظم فى التاريخ. 


الزلزال نقطة تركيزه كانت على عمق 33 كيلومتر تحت سطح الأرض ونتج عن تحرك صفيحة نازكا الأرضية Nazca Plate للأسفل في حركة اسمها علميا الاندساس Subduction والحركة كانت على الصفيحة الأمريكية الجنوبية South American Plate اللي بتتحرك زي السهم الأحمر الموجود فى الصورة وده تسبب فى حدوث الهزة الأرضية الأكثر شدة على مدار التاريخ. 



الفيديو ده بيبين التأثير الناتج عن زلزال تشيلي فى الوقت ده فى المحيط الهادي والمناطق الساحلية  


والفيديو ده للدمار الناتج عن الزلزال 


تشيلي حصل فيها 3 من أعنف 20 زلزال على مدار التاريخ وزلزال فالديفيا هو المتصدر للقائمة بجدارة وبييجي بعده فى المراكز من الثاني للخامس زلازل كانت 9.2 ريختر فى ألاسكا سنة 1964، 9.1 ريختر فى جزيرة سومطرة سنة 2004، 9.1 ريختر فى اليابان سنة 2011 وسنة 1952 فى روسيا. المشترك بين كل الزلازل المدمرة اللى حصلت فى التاريخ انها مرتبطة بمنطقة المحيط الهادي وبيتم تعريفها كمنطقة طوق النار أو الحزام الناري Ring of Fire ودي المناطق الساحلية للمحيط الهادي وفيها حوالي 450 بركان وتقريبا 75% من البراكين النشطة حول العالم فى منطقة طوق النار. 
الصور دي بتوضح منطقة الحزام الناري للزلازل حول العالم 



ملاحظة بسيطة: خلال كتابة المقال تم اكتشاف ان اليوم هو ذكري زلزال 12 أكتوبر سنة 1992 فى مصر وهي مصادفة بحتة غير مقصودة وربنا يسترها علينا كلنا ☺☺☺☺☺☺☺☺☺☺

Written by : Mohamed Khaled
#Mohamedkh5
#TRex_Magazine

التعليقات
0 التعليقات