كرات الظل Shade Balls

واحد من أغرب الأحداث العلمية والبيئية اللى حصلت خلال السنين الأخيرة كانت فى الولايات المتحدة وبالتحديد فى ولاية كاليفورنيا. الحدث ببساطة ان جهاز حماية البيئة (EPA (Environmental Protection Agency مع عمدة لوس أنجيلوس (اريك جارسيتي) وقعوا مرسوم من خلاله هتقوم مدينة لوس أنجيلوس برمي 96 مليون كرة بلاستيك سوداء اللون فى خزانات مياه المدينة خلال شهر أغسطس 2015، الكرات دي اسمها كرات الظل Shade Balls وهي عبارة عن كرة بلاستيكة قطرها 4 بوصة (حوالي 10 سنتيمتر) وسمكها حوالي 1 ميلليمتر ووزنها 245 جرام والوزن ده فيه 205 جرام مياه داخل الكرة عشان تبقي متزنة فى حركتها والباقي عبارة عن هواء. القرار كان متفق عليه من 2006 وتم تطبيقه فى أماكن منفصلة فى الولايات المتحدة لكن الحدث الخاص بولاية كاليفورنيا كان هو الأكبر من حيث العدد والصدي الاعلامي.

الفكرة غريبة وجديدة وبتتنفذ بشكل عملي وتم تطبيقها بهدف حماية حوالي 1000 مليون لتر من مياه الخزانات الموجودة فى لوس أنجيلوس. مياه الخزانات هي مياه أمطار بتنزل علي المدينة وبيتم تخزينها فى خزانات كبيرة بهدف استخدامها للمدينة فى مياه الشرب. لكن يعني ايه حماية مياه الخزانات باستخدام ملايين من الكرات السوداء لتغطية سطح المياه بشكل كام وعزلها عن أشعة الشمس. كلمة حماية ليها أكثر من سبب واحد;السبب الأول انه معدل سقوط الأمطار خلال أخر 15 سنة فى لوس أنجيلوس بقي أقل بشكل واضح ومعدل جفاف المياه بقي أكبر بسبب ارتفاع معدل درجات حرارة الأرض بشكل عام ومنطقة لوس أنجيلوس بشكل خاص (الصورة اللي تحت بتظهر نفس الخزان في 2011 علي الشمال وبعد 3 سنين فى 2014 علي اليمين) وبالتالي فيه احتياج لحماية مياه الخزانات للتعرض لأشعة الشمس لفترات طويلة وتبخرها وانخفاض منسوبها فى الخزانات وده بيمثل خطر على مستقبل المدينة من مخزون مياه الشرب. الفكرة دي طبعا هي الأرخص مقارنة بانه يتم بناء مظلات كبيرة فوق خزانات المياه اللي تم تقدير تكلفتها بحوالي 300 مليون دولار فى الوقت ده مقارنة بسعر ال96 مليون كرة اللى كانت تكلفتهم 50 مليون دولار.

السبب الثاني لحماية المياه هو ان تعرض المياه لفترات طويلة لأشعة الشمس ووجود الكلور المستخدم لتطهير المياه بيحفز انتاج مكون كيميائي (بروميت BrO3) وهو مسبب رئيسي لألام المعدة ومشاكل الهضم بكميات قليلة وزيادة نسبته فى المياه ممكن يسبب ضرر دائم للكلي. بجانب العنصر ده فان فيه احتمالات ليها علاقة بتكون الطحالب اللى من الممكن تتفاعل مع الكلور وتنتج مواد مسببة للسرطان و كمان تعرض المياه المفتوحة لعناصر تلوث مختلفة من المدينة والحيوانات المحيطة بالخزانات.

كرات الظل هدفها العملي هو امتصاص أشعة الشمس والاحتفاظ بيها وتقليل نسبة وصولها لسطح المياه، اللون الأسود ده عبارة عن لون كربوني وهو غير ضار بالصحة والعمر الافتراضي للكرة بيوصل ل10 سنين وممكن لضعف الرقم ده والاسم مكتسب من ان هدف الكرات هو عمل ظل على المياه مش تقليل درحة حرارتها أو تبريدها عشان معدل البخر يقل. اللون الأسود بيمنع وصول الأشعة فوق البنفسجية للمياه وبالتالي بيقلل فرص التفاعلات الكيميائية المذكورة وبيخلي عمر الكرة الافتراضي مقارنة باللون الأبيض أعلي اللي بيعكس أشعة الشمس لكن بيسمح بمرور جزء للمياه على عكس اللون الأسود اللي بيمتص الحرارة بالكامل وبيحتفظ بيها وبيفقدها بسرعة خلال ساعات الليل وبالتالي معدل ارتفاع درجة حرارة المياه بيبقي أقل من استخدام اللون الأبيض للكرات وبالتالي نسبة الانخفاض المتوقعة فى معدل بخر المياه يوصل ل90% من المعدل السابق خلال التعرض لأشعة الشمس بشكل مباشر. الجدل حول اللون الأسود مقارنة باللون الأبيض كبيرة وفيها تفاصيل مختلفة وأراء علمية متعددة لكن الواقع بيقول ان تجربة اللون الأسود تعتبر ناجحة وان المخاوف من احتفاظ الكرات لحرارة الشمس لفترة طويلة بيحفز نشاط البكتيريا لارتفاع درجة حرارة المياه هي مخاوف مفيش اثبات ليها حاليا لكن محتاجة متابعة.

الفيديو ده لعملية ملء أحد الخزانات بكرات الظل فى لوس أنجيلوس

Written by : Mohamed Khaled

#Mohamedkh5

#TRex_Magazine