سلسلة تعرف - الغربان حراس السور
تعرف ان الغراب يعتبر من اذكي الطيور اللي ربنا خلقها علي كوكبنا
الغراب هو الطائر الاسود اللي اهالينا ياما حذرونا منه و كانوا بيدايقوا لما بيسمعوا صوته و لان في مصر عمتا قريب من الاماكن الزراعية بنلاقيها كتير فمن حسن حظي ان قدرت اراقب سلوكه عن قرب و اتاكد من كل اللي بيتقال عليه خلال مراحل عمري
مبدأيا كده الغراب طائر من الجوارح يعني بيتغذي علي بواقي اللحوم و الحيوانات الصغيرة و اي حاجة ميتة زبال من الاخر
الغراب بيعيش في جماعات كوبلز يعني الذكر و الانثي بيفضلوا مع بعض طول حياتهم و بترفض الانثي الاقتران باي ذكر تاني من المجموعة ست كمل
الزوجة ديه بتبني مع زوجها العش و بتهتم بصيانته بيربوا مع بعض الصغار و بيصطادوا هما الاتنين و بيوفروا الاكل للصغار و لنفسهم يعني بتصرف في البيت معاه اصيلة يا ام اشرف و الله
بيت الغراب بيبقي عش يزينه بحاجات بتلمع بالنظر عن قرب ممكن تلاقي فيه سيديهات معالق اكسسوار و عملات بس خلي بالك لو فكرت بتبص من قريب
لانك لو حد فيهم شافك حتي لو الفرخ الصغير و اللي بيبقي لونه ابيض سبحان الله و هو صغير بيقعد يصرخ و بيسمعه باقي الغربان و بتبدأ تهاجمك
مش بس كده انت بقيت بلاك ليست خلاص لان الغراب مبينساش وش حد هاجمه قبل كده ديه متاكدش منها الصراحة العمر مش بعزقة بس ناشيونال جيوجرافيك اتاكدت و قالتلي انهم عملوا مجموعة من التجارب اكدت ان الغراب افتكر مين بيعامله كويس و مين بياذية و بيبلغوا بعض
الغراب بيقدر انه يستخدم الادوات مثلا ممكن ياخد البندق و يرميه في اشارة المرور عشان العربية تعدي عليه تكسره و يستني الاشارة تقفل و ينزل ياكل مثلا
كمان يقدر يحل بازل اربع مستويات عشان يوصل للاكل بتاعه
مجتمع الغراب صارم جدا و بيحاكم اللي بيغلط كان نفسي اشوفها عالحقيقة بس مجاتش فرصة الغربان بتعمل صفين و تقعد تصرخ في اللي غلط و ينتفوا ريشة و لو جرمه كبير يعني اعتدي علي عش تاني مثلا ممكن يقتلوه
و هنا نوصل للموت اول تجربة موت للانسان كان الغراب حاضرها لما قتل قابيل هابيل و مكنش عارف يعمل ايه في الجثة فعلمه الغراب ازاي يدفن كمان الغربان هنا اللي خد منهم البشر و قفة الحداد لان لما فرد منهم بيموت بيقفوا لحظة صمت و بعدين يلفوا حوالين المكان بدون اصدار صوت كنوع من التآبين
ربط الغراب بالموت خلاه يعتبر نذير شؤم وه بيظهر في معظم الثقافات حتي في الاعمال الفنية زي جيم اوف ثرونز لان وجودة بيعني ان فيه جثة او ان حيبقي فيه جثة شئ سئ علي وشك الحدوث
كان معكم #TRex_Magazine من امام بتاع السوبيا و اخر فطار في رمضان كل سنة و انتم طيبين
#تعرف
0 التعليقات