ظاهرة الشفق القطبي Aurora Borealis

ظاهرة الشفق القطبي

ظاهرة الشفق القطبي هي واحدة من أشهر الظواهر الطبيعية وتعتبر مصدر جذب شديد للمصورين المحترفين وعاشقي السفر والمهتمين بالفلك والسماء بشكل عام. الظاهرة بكل بساطة هي ظهور سحب وأشعة من ألوان مختلفة فى السماء خلال اليوم واللون الأكثر ظهورا هو الأخضر الشاحب وبتظهر برده ألوان من الأصفر، الأحمر، البنفسجي والأزرق (الفيديو ده لظاهرة الشفق القطبي فى سنة 2014 خلال شهر فبراير يوم 27 و28 اللي كان خلالها النشاط الشمسي كبير.


الظاهرة دي تقدر تشوفها فى المناطق الشمالية والجنوبية من الكرة الأرضية فقط. الاسم فى الانجليزي هو (Aurora Borealis) للشفق القطبي الشمالي و (Aurora Australis) للشفق القطبي الجنوبي، لكن بشكل عام الشفق القطبي الشمالي ومتابعته بشكل كبير بيبقي فى النصف الشمالي من الأرض بسبب ان فيه مساحة كبيرة من الأراضي والدول تقدر تتابع منها الظاهرة على عكس الجزء الجنوبي اللى فيه استراليا والجزء الجنوبي من أمريكا الجنوبية والقارة القطبية الجنوبية بس. الأضواء الشمالية أو ظاهرة الشفق القطبي الشمالي الألوان فيها ممكن تظهر بأشكال كتير وبتمتد لمسافات طويلة فى السماء لحد تقريبا 640 كيلومتر من سطح الأرض. الظاهرة ممتعة وعلي حسب رأي الناس المتهمة بمتابعتها ان الصور أقل روعة من الواقع.



بشكل علمي شوية، الظاهرة بتنتج بشكل رئيسي من النشاط الشمسي اليومي، النشاط الشمسي الناتج من التفاعلات النووية المسئولة عن حرارة الشمس بتسبب ان جزء من الجزيئات المشحونة تهرب من المجال المغناطيسي ومجال جذب الشمس ناحية كواكب المجموعة بسرعة ممكن توصل ل 8 مليون كيلومتر فى الساعة الواحدة. الجزيئات المشحونة لما بتقرب من الكرة الأرضية بتصطدم بالمجال المغناطيسي المحيط بالأرض وجزء منها بيبعد عن الأرض وجزء منها بيقدر يدخل الغلاف الجوي للكرة الأرضية فى الشمال والجنوب لان المناطق دي هي الأضعف فى قوة المجال المغناطيسي. دخول الجزيئات المشحونة دي للغلاف الجوي بيسبب ان الغازات الموجودة فى الغلاف الجوي تصدر الألوان المميزة لظاهرة الشفق القطبي الشمالي. النشاط الشمسي بيختلف دايما لكن بيوصل لقمة النشاط بشكل دوري كل 11 سنة وفيها بتصدر عن الشمس أكبر كمية من الجزيئات المشحونة أو الرياح الشمسية وده حصل فى 2013 وخلال الشهور الأخيرة من السنة دي وأول شهور 2014 زي الموجود فى الفيديو الأول كانت الظاهرة واضحة خلال النهار والليل بشكل كبير.

الظاهرة بتحصل بشكل شبه دائم لكن كل 11 سنة بتوصل لأعلي درجاتها ولكن في شهور معينة في السنة وأوقات معينة من اليوم بتبقي مرئية بشكل واضح، الفترة دي بشكل عام هي من نوفمبر لأبريل كل سنة فى الجزء الشمالي من الكرة الأرضية لان السماء بتبقي صافية والليل أطول بيبقي مناسب أكثر للمتابعة والتصوير ودي الفترة الأحسن للسفر لمتابعة الظاهرة. الدول والمنطاق الشمالية اللي ممكن تتابع منها الأنوار الشمالية هي كندا، ألاسكا، النرويج، الدنمارك، السويد، اسكتلندا، جرين لاند وشمال روسيا. الشفق القطبي الجنوبي بيبقي أوضح فى القارة القطبية الجنوبية، نيوزيلندا وجنوب الأرجنتين وهي مرئية من خارج الأرض فى محطة الفضاء الدولية (ISS).




الفيديو ده من جامعة أوسلو لكل اللي حابب يفهم التفسير العلمي للظاهرة بشكل أوضح.


أسيبكم مع مجموعة صور أكتر تبين مدي روعة الظاهرة ديه.
Written by: Mohamed Khaled
#MohamedKh5
#TRex_Magazine








التعليقات
4 التعليقات

4 التعليقات