سلسلة تعرف - أنترفيو The Dark Knight

سلسلة تعرف - أنترفيو The Dark Knight

مستمعينا هابي ويك ايند عليكوا و يا رب تكونوا في أحسن صحة و حال و كل عام و أنتم طيبين بمناسبة راس السنة الهجرية و يا رب تكو.ّ...
ستوب
- ممكن أفهم انتوا طافيين النور ليه و فين الضيف اصلا انتوا مطلعيني هوا من غير الضيف ما يوصل انتوا بتصغروني عايزين تبوظولي البرنامج.
-- أنا موجود يا بشمهندس .
- سلام قول من رب رحيم الصوت ده جي منين
-- فوق بص فوق .
- سلام قول من رب رحيم تاني طب انت ايه اللي مشعلقك كده, ممكن تنزل عشان نبدأ الحلقة .
--أسف أطلعلي انت انا مستريح هنا.
........
-أديني طلعت ممكن حضرتك تشيل الستاره اللي علي وشك ولا ده نقاب انت مين يا عم.
--أنا الخفااااا.......ااااش.

- ايه الافورة ديه أنت بتخضني ليه انت اتفرجت علي IT ايه لعب العيال ده, طافينلك نور الاستوديو و مشعلقني علي سلم مرمطتني انجز و احكيلي عن نفسك.
-- انا الخفاش الكائن الثدي الوحيد اللي بيطير ,
في مني فوق ال3000 نوع منتشرين في كل انحاء العالم و بمثل 1/3 عدد الحيوانات الثديية عالكوكب.
- هو انت بتتكلم ليه زي الاستاذ عبد الرحمن أبو زهرة في ليون كينج ما تتكلم عادي.
-- كائن ليلي بنشط بليل بس مش كل الخفافيش بتطير بليل  انواع معينة أحيانا بتضطر تطير بالنهار عشان أكل العيش عايز كده.
- طب هو مش حضرتك أعمي برضه بتعرف النهار من الليل ازاي?
-- مين اللي قالك الكلام ده انا بشوف في الضوء الخافت زي كل الكائنات الليلية.
- بس اللي المتعارف عليه انك بتحدد اتجاهاتك و انت طاير عن طريق الصوت زي السونار اللي في الغواصات كده.
-- صح بس مش معني كده اني مبشوفش . انا فعلا باستخدم موجات الصوت في الملاحة و الصيد اني اعرف مكان الفريسة و الأكل عموما لان ربنا ميزني بالخاصية ديه و هي اكتر كفائة بكتير من النظر خاصتا اننا بنعيش في مجموعات ضخمة لو اعتمدنا عالنظر بس و احنا بنطير حنتطقش في بعض زي البيض.

-عمو سكار أنت غريب 😂
-- سكار مين?!
- لا متاخدش في بالك 😂, احم , علي كده أنتوا بتاكلوا ايه بقي اسمع انكوا كائنات مفترسة و مصاصين دماء و قتالين قتلة و كده, متقلقش انا مش بتهمك بحاجة أخوك تيريكس مسجل خطر زواحف برضه.
-- لا مش كل الخفافيش احنا زي ما قولت انواع كتيييييير فيه اللي بياكل حشرات فيه اللي بياكل حاجات اكبر شوية و فيه الفامبيرز طبعا و فيه بياكلوا فاكهة انا عن نفسي واحد منهم.

 - خفاش فيجيتريان?!
-- اه انا نوع من الخفافيش اسمي خفاش الثعلب الطائر أكبر نوع من انواع الخفافيش المسافة بين جناحي بتوصل ل2 متر بتغذي علي الفاكهة و بعيش في آسيا و استراليا بكثرة و معرض للانقراض بسبب البشر الملاعين اللي زيكوا اللي بيحصدوا الثمار فمبنلاقيش حاجة ناكلها.
-أستاذ عبرحمان قصدي استاذ خفاش أنا متأسف بالنيابة عن بني جنسي انك مبتلاقيش فاكهة تعمل الفروت سلاط بتاعتك حقيقي سوري.
-- تقبلتوا.
- كلمنا عن امثلة من انواع تانية طيب هو فيه خفافيش صغيرة ?
-- اكيد فيه خفافيش بتوصل طولها ل5 سم بس و ديه بتتغذي علي رحيق الازهار اسمه الخفاش الطنان خفافيش ملاعين صغيرين و دول موجودين في جنوب افريقيا.

-طب بالنسبة للخفاش الفامبير ايه ظروفه.
-- ده خفاش بيعتبر حجمه صغير برضه بس انيابه عامله زي الامواس بيجرح فريسته و يلزق فيها بمخالب ابهامه و يمص دمها و سبحان الله لعابه بيفرز مادة مانعة للتجلط مبتخليش الدم ينشف لحد ما ياخد كفايته و يطير.
-يا ساتر ده صعب قوي الحمد لله اننا معندناش النوع ده في مصر ,علي كده انتوا ممكن تأذوا بني ادم و تلبدوا في وشه و متطلعوش غير بالطبل البلدي.

-- ده مين النبطشي اللي قالك الكلام ده مفيش حاجة اسمها كده الخفافيش الانسان مش علي قائمة غذائها بس حيدافع عن نفسه زي اي كائن لو خايف حيهاجم و لانه بيطير مبيمشيش ممكن يخبط فيك و تتخربش او يتعلق فيك بمخالبه بس مش معني كده انك تدور علي طبلة و تزفه يعني ايه قله القيمة ديه, و خلي بالك لو عضك عشان عضته بتجيب سعار.
- لا فعلا مش مؤذي خالص !!!صحيح انت مبتمشيش ليه و لو نزلت عالارض بنلاقيك بتزحف?!
-- ده التطور بعيد عنك اعتمادي كليا عالطيران خلي عضلات رجلي تبقي اضعف و مبتشيلش وزني حتي لما بنام ببقي متعلق عالسقف عشان احافظ علي جناحي لانه بيبقي متكون من جلد و متصل بجسمي كمان بيبقي اسهلي اني اطير من الوضع ده مبحتاجش دفعة زي الطيور مثلا.

-طب لو سهي عليك و سبت الحاجة اللي انت متعلق فيها و انت نايم ساعتها حتنزل زرع بصل زي انجري بيردز 😂😂😂😂
-- ده مستحيل لان سبحان الله مخالبي عاملة زي الخطاف غير ان الوضع الاصلي بتاعها منكمش مش مرتخي يعني لو ميت حتلاقي مخالبي مضمومة مش مفرودة.
- سبحان الله انتوا علي غير المتعارف مبتعيشوش في كهوف بس بتعيشوا علي الشجر و البيوت المهجورة من الاخر بتشوفلكوا اي حته ضل و فيها شماعة تتعلقوا عليها, طيب بالنسبة للتزاوج.
-- اه احنا لينا موسم تزاوج سنوي ممكن يلقح فيها الذكر اكتر من انثي مفيش كومتمنت.
- و الانثي بتعمل ايه بعد كده?

-- بص فيه حالتين لأما بتحمل وقتي لأما بتحتفظ بالمني لحد بعد البيات الشتوي و تحمل منه, فترة الحمل بتاخد من 4 اسابيع و لحد 8 شهور حسب نوع الخفاش و حجمه , بيتولد الخفاش اللي بيبقي وصل لتلت وزن امه تقريبا و بيفضل متعلق فيها و بيرضع منها و هما متشقلبين برضه متسيبهوش الا عشان تروح تجيب اكل و تيجي و هنا بقي الفكرة لما بترجع بتميزه وسط الاف الخفافيش الصغيرة من صوته صريخه و ريحته.
- مش محتاجه خفاش علي فكرة انا بعرف صوت صريخ بنتي من و انا علي اول الشارع 😂 بس فعلا سبحان الله قلب الأم برضه.
-طب انا اسف في الكلمة كائن مؤذي و بشع المنظر زي حضرتك ايه فايدته في الحياة?!
-- انا اللي حقولك برضه عالتوازن البيئي انا بتحكم في كميه الحشرات في العالم كفاية اني اقولك ان خفاش حشرات واحد ممكن ياكل لحد 600 ناموسة في اليوم لاننا بنقدر ناكل 3 اضعاف وزننا و برغم كده مبنتخنش 😝 لاننا بنحرق بسرعة بسبب الطيران.
خفاش الفاكهة بيلقح الاشجار و الزهور زيه زي النحل و الفراشات بالظبط.
الروث بتاعي سماد غني جدا بالنيتروجين المفيد للتربة
و حنروح بعيد ليه خفاش مصاص الدماء المرعب بيستخرجوا من لعابه المادة المضادة للتجلط عشان ليها استخدامات طبية لأمراض معينة

-ياه كل ده سبحان الخالق مبيخلقش حاجة من غير فايدة.
وصلنا لنهاية حلقتنا حنسيبك تنام شوية عشان تعرف تصحي بليل بس سؤال آخير انت طلعت مع بين أفليك في باتمان.
--هو بين أفليك عمل باتمان أصلا?????!
- تصدق معاك حق!

كان معكم #TRex_ Magazine من جمهورية Gotham العربية أنجوي يور ويك أند.

#تعرف

Written by: Amr Khaled -T.Rex
#AK_TRex