سلسلة تعرف - أم 44

أم 44 - الحريشة

15 سنة علي آخر مرة قابلت فيها الست البركة ديه و بناء علي طلب الجماهير قررنا استضافتها عشان تحكيلنا شوية عن نفسها.

-منورانا يا ست الكل.

-ده نورك يا حبيبي.

-ليكي وحشة و الله ماشفتكيش من ساعة ما هربتي من الآسر بخطتك الجهنمية.

-خطة ايه في حد يحط دودة برجول في علبة من غير غطا ناصح من يومك يا حبيبي.

-احم . احكيلنا شوية عن نفسك بقي.

- الاسم ام 44 او الحريشة.

المتداول بين الناس ان اسمي كده عشان عندي 44 رجل بس الحقيقة ان الرقم ده مش دقيقي انا عدد رجولي بيبدأ من 20 و لحد 300 رجل و بيوصل طولي لحد 30 سم في بعض الانواع.

-ربنا يزيدك 😨. بالنسبة لأماكن وجودك نلاقيكي فين يعني?

- اي حتة طراوة اي مكان فيه رطوبة و مبيتعرضش للشمس ممكن استخبي فيه حقولك ليه بعدين بس ممكن تلاقيني في قصاري الزرع تحت جزوع الشجر تحت الصخور علي الشواطئ او حتي في اي مباني مهجورة لو فيه ميه قريبة من المكان بس متخشش بيوت مهجورة تدور عليا لاني مبطلعش اصطاد غير بليل و ممكن تتلبس👻.

-😓 هو انت فعلا سامة يا طنط?!

-اه يا روح طنط بس زي سم النحلة كده مبيموتش البني ادم بس بيسبب تورم و آلام شديدة جدا بس لو الجسم ضعيف زي الاطفال او كبار السن اللي عندهم مشاكل في المناعة ممكن يموتوا كفالله الشر بس ديه حاجة بتاعة ربنا انا ماليش دعوة👼.

-اكيد طبعا و نعمة بالله 😏 بس انت محتاجة السم في ايه?

- اقولك انا اصلا باكل فضلة خيرك حشرات و عناكب و الانواع الكبيرة مممن تاكل فران صغيرة او سحالي. مرونتي في الحركة و سرعتي بيدوني الافضلية في الصيد بحيث اني بهجم عالفريسة و برجليا الخلفية و مخالبي و اللي بيتركز فيهم السم بشل حركة الفريسة و ابدأ اقطع فيها بفكي و اكلها.👾

- 😨😨😨😨😨طول عمرك طيبة يا طنط بس اللي ممكن يشفعلك الشراسة الاوفر ديه انك بتحبي ولادك و لما بتبيضي بتفضلي حاضنة البيض 3اسابيع لحد ما يفقس عشان تحميه و توفري الآكل للكيدز بتوعك حتي ان في بعض الانواع بعد ما بيفقسوا بيتغذوا عليكي انت وانا شخصيا شمتان فيكي.

-عيال واطية زي ابوهم اللي بيعمل عملته وبيخلع و بيسيبني اراعيهم لوحدي 😢.

-خلاص يا طنط متعيطيش و النبي بس هو احنا مبنشوفكيش كتير ليه يعني انا شوفتك يمكن مرتين بس طول حياتي.

-مش معني انك مبتشوفنيش اني مش موجودة انا بس كائن ليلي بنشط بليل و مبسيبش اي آثر ورايا يعني متقدرش تقول ان المكان ده عدت عليه ام44 الا لو شوفتيني و ده صعب لاني مبطلعش من جحري الا عشان اطلع اصطاد فبتخفي تقدر تقول نينجا.

-صايعة يا طنط عشان كده بيشبهوا بيكي الستات اللي مش ولا بد بتصيعي بليل و بترزع كلام في المستخبي 😂😂😂😂.

-اختشي يا واد انا كائن ليلي عشان معنديش افرازات بترطب جسمي فلو طلعت في الشمس حيجيلي جفاف.

-سوري يا طنط مكنتش اعرف انك صاحبة مرض 😂 هو حضرتك ربنا يطولنا في عمرك بتعيشي قد ايه و النضارة ديه عشان سنك كبر?

-لا يا ابو لسان طويل انا اصلا نظري ضعيف بعتمد علي قرون استشعاري و بعيش من 6ل10 سنين كده الله اكبر في عينك.

-دنا علي كده كنت علي معرفة بالوالدة بقي مش بيكي.

-متجيبش سيرة ماما بعد اذنك.

في نهاية حلقتنا نحب نشكر طنط حريشة هي ولسانها اللي بينقط شربات👾 .

كان معكم #TRex_Magazine من داخل حته طراوة

#تعرف

Written by: Amr Khaled
#AK_TRex