سلسلة تعرف - القرش بهلول

سلسلة تعرف - القرش بهلول

يعني يا جدعان يظهر قرش عندنا في البحر الاحمر و اسمه بهلول و محدش يقولي و الله عيب ولا انا عشان باقتي خلصت يعني 😔😔😔 ماشي

ماله عم بهلول ده مبدأيا مش انا اللي سميته ديه وزارة البيئة شكله يقربلهم لانهم بيقولوله بهلول حاف كده فواضح انهم متابعينه
جه منين عم بهلول ده انا حقوله عم بهلول عشان فرق السن بس

تعرف مبدأيا ان عم بهلول ده قبل ما يتبهدل و يجي مصر و يتقل قيمته اسمه قرش الحوت يعني هو قرش ولا حوت?
بص هو قرش بس مدي علي حوت حتي بيتكلم حيتاني كويس انا اتاكدت من الموضوع ده بنفسي
عن طريق وزارة البيئة 😝
الخبر الكويس ان قرش الحوت مش مفترس بالرغم من حجمه اللي ضعف حجم القرش الابيض اللي بيجي في الفك المفترس و بوقه الواسع اللي بيحتوي علي  350 سنه الا انه بياكل قشريات و اسماك صغيرة لا يتعدي حجمها سنتيمترات

مبيبصش في مرايات مش فاهم حجمه قد ايه ده مقضيها جمبري و سيبيط و كابوريا و هو ده غذائه طول رحلة حياته اللي بتوصل ل70 سنة بيكروز فيهم البحار و المحيطات عشان لقمه العيش و رغيف الجمبري مع انه لو نزل المطرية يضرب من دنيا الجمبري ارحمله من المرمطة ديه 😂

القرش الحوت طوله بيوصل الي 12 متر و وزنه 18 طن و سمك جلده 10سم كمان عنده 5خياشيم علي كل جنب و برغم حجمه ده الا انه بطئ في السباحة و مسالم جدا و لو قربت منه حيعوم جنبك عادي لكن حذاري دونت تتش عشان عنده فوبيا و بيقلب سلوكه عدواني لما حد بيلمسه محدش يلمسه مش عايزين قلق في القعدة يا اخونا الناس اللي دايقت بهلول من ساعة ما عدا علي مطروح من فترة متصورة و حتتجاب مسألة وقت مش اكتر😂

القرش الحوت بيبيض بس بيحتفظ بالبيض داخل جسمه حتي معاد الفقس سبحان الله 😱
و في النهاية احب اوجه رسالة للانسان و لنفسي سيب مخلوقات ربنا لحالها و بطل اذي يا كائن يا سو 🙅
كان معكم #TRex_Magazine من فوق كوبري اكتوبر  الناس هنا طيبين اوي و بقوا عشرة منهم سواق تاكس كان حيقلبني من فوق الكوبري و علي وجهة ابتسامة مشرقة 😠
#تعرف