سلسلة تعرف - العشبة السحرية

سلسلة تعرف - العشبة السحرية

عشبة سحرية ايه يا ابني ده الحزمة منه بجنيه. -بجنيه و نص و الله 😔 وبخمسة جنيه في سبينس😵.

تعرف ان العشبه اللي بتتريق عليها ديه بتعمل ايه اظن انك عارفلها استخدام واحد عالاقل بس خدها كلمه من واحد بيعشق النعناع و مكرس جزء من وقته لدراسه تاثيره علي جسم الانسان و فوايده اللي بجد توريك مدي رحمة ربنا بينا انه وهبنا عشبة بالوفرة و سهولة و سرعة الانبات ديه و ليها كل الفوايد العظيمة ديه كلها
احنا لسه بنتكلم عن النعناع اللي بيتحط عالشاي ده صح?
- اه هو يا عم اللمض بس ده واحد من استخداماته و طالما بتتكلم عن الشاي بالنعناع باستهتار كده يبقي انت مش كييف و مش قد قدسية الكوباية ديه اسحبوا منه الكوباية سوء استماع و سخرية و نزلوله ميلك تشيك ولا اي حاجة 😏

النعناع فوايده انواعه و تقدر تجيبه منين و تخليه متوفر عندك باستمرار من غير متشتريه حتي.
بص النعناع ليه انواع الكتير و اللي متوفر عندنا في مصر النعناع اللي بنقول عليه النعناع البلدي او نعناع الكريشة و نعناع المينتبيبر او النعناع الافرنجي
اقدر افرق بينهم ازاي?  ببساطة النعناع البلدي ورقته بتبقي اصغر و لونه اغمق و ريحته حلوة و قوية و ده اللي بيتباع في الشارع اما النعناع التاني حتلاقي ورقته خشنة اكنها طالعلها عروق كده و ريحته مش قوية بس طعمه قوي و غني بالزيوت بمجرد ما تفرك الورقة حتشم ريحه زيت النعناع وده حتلاقيه في السوبر ماركت.

طيب اشتريته احافظ عليه ازاي?
عندك 3 طرق : تجففه - تجمده - تحط الساق في ميه اكنك حاطط ورد في زهرية كده
نصايح عالسريع
بالنسبة للتجفيف لازم يكون في مكان شمس و هوا عشان مبوظش وتلاقي طعمه عامل زي الملوخية 😂😂😂
التجميد بتحطه في الفريز و بتاخد ورق علي قد الاستخدام و مبتستناش يفك عشان ميبوظش حيقلب معاك طحالب لو الميه دابت عليه 😂
و اخيرا الزهرية احط نعناع في الزهرية انت اطعبت اتكلم باسلوب احسن من كده انا عن نفسي سايب برطمانين نسكافيه مخصوص للغرض ده و مبروك انت كده زرعت نعناع. زرعت نعناع ازاي؟ اه و الله زرعته او عالاقل عملت الخطوة الاولي لزراعته
النعناع لو فريش و لسه الاعواد مقطوعة و اتنقلت للميه خلال 48 ساعة ينفع تتزره تاني بمنتهي البساطة بتحطها في ميه زي ما قلنا زي الورد في الزهرية كده و اسبوعين بالكتير حتلاقي الاعواد القوية طلعت جذور تقدر تنقلها و تغرسها في تربة و تبقي كده مبروك زرعت نعناع اسقيه كل يوم في الصيف و يوم بعد يوم في الشتا و حيبقي عندك مصدر لامحدود للنعناع اقطف الورق و الزرع يكبر و يكتر :D

ايه فوايد النعناع بقي؟ - عد معايا
- النعناع و الجهاز الهضمي
بطنك واجعاك اغليلك شوية نعناع تهديها؟ جدتي و بعدها والدتي ربنا يديها الصحة كانت دايما تقولي كده ليه بقي؟
النعناع بيعمل علي زيادة افراز و نشاط الغدد اللعابية و الانزيمات الهاضمة فبيساعدك في هضم الاكل خاصتا حتلاقيه بيتقدم في المحلات اللي بتقدم اكلات تقيلة و اخص بالذكر كيلو كباب و ابن حميدو اللي عندهم افشخ لمون نعناع في الدنيا.
النعناع فاتح للشهية و بيتحط عالاطباق طازج مفروم او بودرة مجفف كتوابل.
بيحل مشاكل القاولون العصبي و الانتفاخات يجعل كلامنا خفيف عليهم.
مطهر و مضاد للاتهاب الجهاز الهضمي و المرارة
منقي لرائحة الفم الكريهة و بيجدد النفس ححححح عشان كده حتلاقيه في معظم معجون الاسنان

-النعناع و علاقته بالجهاز التنفسي و علاج الربو
النعناع بيخفف الاحتقان و بيسلك الشعب الهوائية ربنا يمسي هولز بالخير مطرح مهو موجود لان زيوت النعناع الطيارة اللي فيه بتفتح ممرات الشعب الهوائية و بتزيل الاحتقان و بتساعدك عالتنفس بشكل كويس
كمان لمرضي الربو الموضوع ده مفيد لانه بيحفز علي التنفس بشكل كويس عشان كده موجود في كل اجهزة الربو عن طريق الاستنشاق كمان بيحارب التهابات الجهاز التنفسي.

-النعناع كمسكن للالم
بساعد علي تسكين الالام و خاصتا الصداع ربنا يكفينا الشر و يجعل كلامنا خفيف عليه محدش يقدر ينكر فضل كوباية الشاي بالنعناع و مفعولها السحري
مكان بما انه مهدئ للاعصاب و بيساعد عالاسترخاء فبيخفف من الالام المصاحبه للدورة الشهرية.

-النعناع و مكافحة السرطان
ثبت بالابحاث وجود انزيمات في النعناع بتساعد علي الوقاية من السرطان و العياذ بالله و خاصتا سرطان البروستاتا و الجلد و الرئة.

-النعناع و علاج الاكتئاب
النعناع بيساعد علي استرخاء الجسم و بيهدي العقل و الاعصاب و بيشجع المخ انه يفرز هرمون السعادة "السيروتونين" و بكده يمنع التوتر المتوجوزين يركزوا معانا شوية عشان ده سلاح ذو حديين 😉.

-النعناع و امراض ضغط الدم
النعناع بيحتوي علي نسبة كبيرة من البوتاسيوم. و ه بيساعد علي استرخاء الاوعية الدموية و المحافظة علي توازن السوايل في الجسم و اللي بيترتب عليه خفض ضغط الدم. اظن كلنا ضغطنا عالي من التعامل مع الاشكال الضالة اللي بنقابلها كل يوم 😤.

-علاج دوار البحر و السفر بشكل عام
لو بتعاني من الموضوع ده كل اللي عليك تخلي معاك شوية نعناع طازج و تشم زيته الطيار حيفقوك و يخليك متحسش بغثيان خالص 😷.

-تحسين الذاكرة
النعناع برغم انه بيهدي الجسم الا انه بيصفي الذهن فبيسمح للذاكرة انها تعمل بشكل اكثر فاعلية و بيزود التركيز 😆.

-تقوية المناعة
كالسيوم و فسفور و فيتاامينات C, D, E ,كمان شوية فيتامين B المركب  و ديه كلها حاجات بتعزز المناعة و بتقي الجسم من الامراض و تخليه باحسن صحة 💪💪💪💪💪.

-تحفيز فقدان الوزن
لو مهتم بفقدان الوزن اكيد سمعت عن مشروب الديتوكس و ده بيبقي عبارة عن منقوع شرائح لمون و خيار و ورق نعناع
النعناع دورة ايه؟ زي ما قلنا انه بيحفز افراز انزيمات و ده اللي بيساعد علي امتصاص المواد المغذية و ميخليش الاكل يتحول لدهون و يحقق الاستفادة القصوة للجسم من الاكل كمان بيساعد علي حرق الدهون خاصتا في منطقة البطن.

- فوائد النعناع للبشرة
تنظيف البشرة الدهنية و المحافظة علي نضارتها و نقاء البشرة و ازاله الالتهابات و الهالات السودة.

تحذير: الحوامل بالذات في الاشهر الاولي يبعدوا عن النعناع لانه بسيبب ارتخاء لعضلات الرحم🚼 .

اظن ده كفاية تخليك تقوم تشوف عندك نعناع ولا لا لانه فعلا بشوية فلوس قليلة انت عندك اجزخانة كاملة في بيتك بعشبة واحدة بس تقدر تحمي نفسك و اسرتك من استخدام الادوية الكيميائية في الحاجات الخفيفة اللي بنحتاجها كل يوم و يا رب دايما تبقوا كلكوا بصحة و افضل حال.

كان معكم #TRex_Magazine ليف من داخل حوض النعناع البرايفت بتاعي :D
#تعرف