سلسلة تعرف - أنترفيو مع رؤوف

سلسلة تعرف - أنترفيو مع رؤوف

مستمعينا هابي ويك اند عليكوا و كل سنة و أنتم طيبين بمناسبة عيد الأضحي.أغسطس يعني المعاناة و الفرهدة كالمعتاد و نتمني من ربنا ان العيد يكسر شوكته و يعديه علي خير.
الضيف اللي معانا النهاردة ديه ليلته و الحفلة ديه كلها معمولة علي شرفة او عليه أن صح التعبير. ضيفنا النهاردة ربنا أفتدي بيه سيدنا أسماعيل عليه السلام لما والده سيدنا أبراهيم عليه السلام شاف رؤيه أنه بيذبحه و لما هم سيدنا أبراهيم بتفيذ أمر ربنا أفتداه عز وجل بكبش في القصة اللي ذكرت في القرأن الكريم :
" فَلَمَّا بَلَغَ مَعَهُ السَّعْيَ قَالَ يَابُنَيَّ إِنِّي أَرَى فِي الْمَنَامِ أَنِّي أَذْبَحُكَ فَانْظُرْ مَاذَا تَرَى قَالَ يَاأَبَتِ افْعَلْ مَا تُؤْمَرُ سَتَجِدُنِي إِنْ شَاءَ اللَّهُ مِنَ الصَّابِرِينَ(102) فَلَمَّا أَسْلَمَا وَتَلَّهُ لِلْجَبِينِ (103) وَنَادَيْنَاهُ أَنْ يَاإِبْرَاهِيمُ (104) قَدْ صَدَّقْتَ الرُّؤْيَا إِنَّا كَذَلِكَ نَجْزِي الْمُحْسِنِينَ (105)إِنَّ هَذَا لَهُوَ الْبَلَاءُ الْمُبِينُ(106) وَفَدَيْنَاهُ بِذِبْحٍ عَظِيمٍ
(107) " صدق الله العظيم

حنعرف كل حاجة عن رحلة الأنسان مع الخروف النهاردة من ضيفنا الأستاذ رؤوف الخبير بقسم بحوث الغنم بالغرفة التجارية.🐑🐑🐑🐑🐑

-صباح الفل ازيك يا أستاذ رؤوف.
--صباح النور الحمد لله و قولي رؤوف بس من غير أستاذ.
-رؤوف أنت منين؟
-- بص المصادر التاريخية لأننا منتشرين بشكل كبير متقدرش تجزم بس لما تتبعنا معظم السلاسلات لأننا فوق ال20 سلالة لقينا ان معظم الخرفان في العالم جايه من اسيا و اوروبا و انتشرت في باقي القارات عن طريق الهجرة للبحث عن الغذاء.
-انتوا وقفتوا مع البشرية من زمان احكيلنا اكتر عن الموضوع ده.
--ده حقيقي فعلا الخروف من أوائل الكائنات اللي أستأنسهم البشر و ده لأن الخروف بكل أنواعه كائن مسالم و بيعيش علي المرعي و مطيع الي حد ما يعني سهل ان بعيل صغير تسيطر علي قطيع بالكامل عشان كده كان سهل ان الانسان يروضه.
-بس بتهيألي برضه فكرة انكوا بتتحملوا الجو الجاف و المنافع اللي الانسان بيحصلها من وراكم ساهمت بشكل كبير في الشراكة ديه.
-- ده حقيقي الانسان خد مننا عناصر كتير ساعدته علي النجاه بدايه باللحوم و الالبان كمصدر للغذاء و البروتين و حتي الجلود كان بيعملها ملابس الي وقتنا هذا بتطور صورتها عن اللي كان بيستخدمها الانسان البدائي.
- جميل اللي فهمته أن حتي العظام كان الانسان كان بيستخدمها في عمل ادواته غير دوركم في الزراعة من حراثة الأرض و تسميدها بالروث حتي أن المصري القديم كان بيستخدمكوا في فصل قشرة بعض الغلال عن الحبة عن طريق انه يسيب القطعان بتاعتكم تدوس عليها.

-- ده حقيقي أحنا علاقتنا كانت قوية جدا بالمصري القديم حتي أنه كان أحد اهم الهته الاله الخالق بياخد هيئة أنسان براس خروف و كان أسمه "خنوم" و ده وفقا ليهم كان المسئول عن خلق البشر من طمي النيل حتي انهم كان عندهم تصور ان خنوم بيشكل الاطفال من طمي النيل و بيحطهم في رحم أمهاتهم غير ان كان معاه عصي سحرية بيطلع بيها النباتات علي ضفاف النيل و اللي كانت مهمته برضه الفيضانز فكان ليهم رمز للخصوبة و الخير. و تم عبادته في كل انحاء مصر علي فترات مختلفة من تاريخ الفراعنة.
- معلوماتك التاريخية هايلة بس المصريين القدماء مش بس اللي ساهم تواجدك في ازدهار حضارتهم. احنا بنلاقي دول في العصر الحديث بدأ أقتصادها أصلا عليك زي أستراليا  مثلا.
--فعلا استراليا بعد أكتشافها أتنقلها أغنام من سلالة المارينو عن طريق المهاجرين الأسبان و ديه من أفضل سلالات الخرفان من حيث الصوف و اللبن و كثافة اللحم و بسبب تميزها بالمراعي الطبيعية أستراليا عندها  حاليا ثلث ثروة العالم من الغنم حاليا.

-و أحب أزود علي كلامك أن أستراليا نيوزيلندا بتاغونيا و المملكة المتحدة هما أهم مراكز تربية الماشية في العالم. سؤال بقي مين عدوك الرئيسي؟
--الذئاب بلا شك العداوة بنا تاريخية لأننا خصم سهل و بنتحرك في مجموعات و قدرتنا في الهروب و المناورة مش عالية ده بيخلينا هدف سهل غير أننا غذاء مرضي بالنسبالهم بسبب توفر اللحم فبيصطادوا الصغار بالذات لأن معندهمش أي وسائل دفاع عن نفسهم. 
- طيب أنا الموضوع اللي حتكلم فيه حساس شوية و هو فوايد لحمك لو معندكش أعتراض يعني.
-- لا لا عادي أتفضل اتكلم أنا اوبن ميند في الحوار ده.-كبد الخروف غني جدا بالحديد العضوي و فيتامين أ و د و بنصح بيه بشده لمرضي الأنيميا. الكلية غنية بالبروتين و الألياف كذلك القلب غني بالالياف برضه اما عن المخ فهو غني بالفسفور المفيد للعظام و كمان فيتامين د.
--كفاية كفاية ما تاخدوا مناخيري تعملوها صفارة كمان بالمرة.🐑
- أنا أسف بس حضرتك قلت أنك اوبن ميند.... ثواني بس عشان الاعداد بيقول حاجة غريبة
ايه؟ مش خبير ازاي؟😨
هربان من السطوح اللي جنبنا؟عليه مكافئة لمن يجده .... خد هنا حلق عليه يا فوزي.... امسكه يلا عايزه حي.....🏃🏃🏃🏃🏃🏃🏃
كان معكم #TRex_Magzine  من المدبح أنجوي يور فته و كل سنة و أنتم طيبين.

Written by: Amr Khaled - T.Rex #AK_TRex #TRex_Magazine