سلسلة تعرف - سيد الفرس

سلسلة تعرف - سيد الفرس

مستمعينا هابي ويك اند عليكوا النهاردة معانا ضيف اختلفت عليه الاقاويل تشوفه تقول عليه طيب و ابن حلال حتي الاطفال بتحبه بالرغم من كده طالع عليه اشاعات انه شرير و قتال قتلة فأحنا قولنا نستضيفه و نعرف منه بنفسنا.
- السيد قشطة ازيك يا سيد
--ازيك يا بشمهندس تيريكس

-نقول سيد ولا فرس النهر مع اني مش مقتنع بقصة فرس ديه خالص بكرشك ده.
--ليه و الله يا هندسة لو ركزت في شكلي حتلاقيني فعلا عندي نفس ملامح الفرس بس علي قلبوظ شوية ودني صغيرة و مناخيري نفس المناخير حتي نفس شكل الجمجمة بس انا بخدود حبتين و بعيش في الانهار بقي فبقيت فرس النهر.
-طب ايه حوار سيد قشطة ده?
-- ده اسم الشهرة انا اسمي باللغة العربية البرنيق او فرس النهر بس تعرف حضرتك لما جدي زار أول مرة جنينة الحيوانات اللي في الجيزة العاملين هناك سموه سيد قشطة ناس تقولك كان ممثل ساعتها و ناس تقول كان حد شغال معاهم قلبوظ شوية بس و من يومها و انا في مصر سيد قشطة.

-عسل و الله يا سيد انت منين اصلا
-- انا اصلا بسكن في وسط افريقيا و شوية جنوب و  علي ضفاف الأنهار اصلي بحب الطراوة
-اه فعلا انا سمعت انك معظم الوقت بتبقي في الميه
-- فعلا انا ممكن اقعد بال18 ساعة في المية بطع عالنوم بس
-يا بختك و الله الجو فرهدة فعلا.بس انا اللي اعرفه ان ربنا واهبك صن بلوك رباني.
اه فعلا انا مبعرقش انا عندي غدد مخاطية بتفرز زي جل كده لونه بني بيحميني من اشعة الشمس و الجفاف.
سبحان الخالق هو انت بقي بتاكل ايه يا سيد?
--فضلت خيرك انا باكل حشائش علي شوية خضار و فاكهة لو جم في سكتي تقدر تقول فيجيتريان يعني.
-حنشوف حوار فيجتريان ده بعدين بس مش غريب 18 ساعة في المية و بتاكل خضار و حشائش بس علي كلامك و بتجري ممكن توصل سرعتك ل40 كم/ساعة و وزنك كده يا سيد دنتا بيوصل وزنك لطن و نص لما بتكبر.
-- قول اللهم صلي عالنبي و الله روحت للدكتور و عملت دايت  دنا حتي باكل نص اللي جسمي محتاجة بس هما بتاع 45 كيلو اكل في اليوم بس و برغم كده زي ما انت شايف مفيش فايدة كله ترهلات. حتي مقضيها سباحة طول اليوم.
-سباحة ايه انت حتشتغلني يا سيد هو انا بتاع كشري منا عارف انك مبتعمش اصلا ولا كلابي حتي دنتا بتزق نفسك في الارض او في الصخور عشان تتحرك في الميه.

--بتحرك في الميه اسمها سباحة برضة
-انت كبير عيلة يا سيد يعني انتوا بتعيشوا في جماعات و بيبقي ليها كبير او ألفا هو اللي بيقود القطيع اللي بيبدا من 35 و ممكن يوصل ل200 فرد.
--فعلا احنا بنحب العزوة و انا وارث قيادة القطيع عن الحج الله يرحمه بس بمجهودي برضه دحنا قطعنا بعض عالكرسي ده انا و شباب القبيلة كانت عاركة جامدة و مات فيها في الرجلين كتير.
-ايه المميزات اللي كسبتها بقي لما بقيت قائد?
-- الحريم.
-نعم!!!!
-- اه و ربنا في موسم التزاوج اللي بيكون في فترة الجفاف بختار احلي واحدة في القبيلة اتجوزها و الباقي بسيب بقية الذكور يقطعوا بعض عليهم.
-لا ميزة فعلا و الانثي بتحمل في بيبي واحد حوالي 8شهور  بعدين بتولده و تحميه و تخلي بالها منه من التماسيح و من خناقاتك مع الشباب امال انت دورك ايه في الليلة ديه.
-- انا مشارك بمجهودي.
-عاش يا اسطي💪. سيد انت شكلك مش كيوت زي ما انت في جنينة الحيوانات انت عندك انياب كبيرة بس هما بيكسروها عشان متأذيش حد.

-- بس انا عمري ما.آذيت حد دنا حتي العيال بتكور الاكل و تاكلني في بوقي و عمري ما اذيتهم.
-سيد انا يؤسفني اقولك ان بنو جنسك مسئولين عن مقتل اكتر من 3000 واحد كل سنة في افريقيا و ان بانيابك و فكك الكبير ده بتقدر تقسم مراكب الصيد نصين و تقتل الصيادين و اسرهم.
--ابدا و ربنا انا مقتلتش حد😨😱.
-اهدا يا سيد انت بتصنف كواحد من اعتي القتله في افريقيا في قارة موجود فيها اسود و نمور و تماسيح انت فاهم ده معناه ايه انت من عيلة قتالين قتلة يا سيد.
-- مقتلتش حد انا برئ😭.
- انا عارف يا سيد بس الاشاعات وصلت بالرغم انها في حالات قليلة ان فيه افراد منكم بتاكل اللحوم حتي في حالة تم رصدها قريب كانت بتاكل واحد منكم دنتوا حتي بتقتلوا التماسيح.

-- انا مصدوم و ربنا احنا السيد قشطة لا ديه اكيد قلة شريرة مندسة و ممولة اللي بتعمل الكلام ده.و التماسيح دول ده دفاع عن النفس.
انا راجل هلاس يا بيه بحب الميه و الاكل و الستات و بسمع بيتبول 💃💃💃 قتل ايه متزعلنيش منك بس.
-متزعلش يا سيد انا بقرالك احصائيات موثقة انا مبتهمكش شخصيا بحاجة.
متزعلش بقي دنا عاملك برميل سلطة خضرة. ايوه كده فين الضحكة الحلوة يوغتي علي لوغده الجميل😊.
نورتني يا سيد.😃
و في نهاية حوارنا مع سيد اللي بينسف برميل السلطة حاليا نحب نشكره و نشكر سوق العبور علي توفيرة لكمية الخضار الفريش ديه.
كان معكم #TRex_Magazine من امام احد تلاجات الخضار بسوق العبور. براحة يا سيد مش محاسبين عالتلاجة كلها الله يخربيتك.😨😨😨😨

#تعرف

Written by: Amr Khaled - T.Rex
#AK_TRex