سلسلة تعرف - ابو حلاوة يا تين

ابو حلاوة يا تين

تقريبا الثمرة ديه من ضمن الحاجات القليلة اللي ممكن ترتقي لمرحلة المانجا و البطيخ في فاكهة الصيف.
أسمائه بتختلف من بلد للتانية زي الصبير الهندي او أكناري أو البلس سموه زي ما تسموه عندنا اسمه التين الشوكي.
سبحان الله بالرغم طعمه ألا ان التين الشوكي بيعتبر ثمرة نبات يتبع طائفة الصباريات يعني ثمرة نوع من أنواع الصبار.
صبار التين الشوكي بيبقي عبارة عن أجزاء شبه بيضاوية كده بيبقي أسمها كف النبته بتبقي عبارة عن كفوف كتير بقي متصلة مع بعضها و تكبر لحد ما يوصل ارتفعها 2.5 م  الكف الواحد ممكن يوصل طوله ل40سم و عرضه ل20سم. و في موسم ألزهار بيبقي علي الكفوف ديه ورد أبيض و بيبقي هو ده مكان طرح الثمار فيما بعد.

أجمل أنواع التين الشوكي بيجي من بلدة في فلسطين أسمها "فقوعة" و بيتميز بطعمة الذيذ و غني باللحم و البذر فيه قليل.
لو متعرفش التين الشوكي و أظن ده صعب لأنه عشق الطفولة فهو عبارة عن ثمرة ليها قشرة بتحتوي علي شوك رفيع جدا عشان كده تلاقي الراجل اللي بيبيعه لابس جوانتي لان القشره بتحتوي علي اشواك دقيقة. جوه القشرة بقي ديه لحم الثمرة عبارة عن ألياف طعم العصارة بتاعها مسكر و لذيذ جدا قول ان شاء الله يعني و فيها بذور منتشرة داخل الالياف ديه. ألوانة بيتدرج من الأخضر مرورا بالاصفر و الاحمر و بيوصل للفوشيا أو الأرجواني يعني.😍😍😍😍😍

غير طعمة الفشيخ هو ليه فوايد بقي؟! ورقة و قلم و أكتب معايا:

1- الفيتامينات و الاملاح المعدنية

التين الشوكي بيحتوي علي املاح معدنية و عناصر مغذية كتير زي الحديد و الكالسيوم و الماغنسيوم و البوتاسيوم و الصوديوم و الفسفور و النحاس ايه كمان.

2-الجهاز الهضمي

تحسين عملية الهضم و تنقية الجسم من السموم حتي ان البذور تعمل علي تنشيط جدار المعدة و الامعاء و ده بيبقي مفيد لمرضي القرحة و بيخفف الاثار الجانبية لبعض الادوية اللي بتسبب المشاكل ديه كمان بعتبر الاختيار الامثل بعد وجبة دسمة لأن زي ما قولنا بحفز عملية الهضم.

3-فوائد صحية للتخسيس

برغم انه طعمه مسكر ألا ان الثمرة الوحدة بتحتوي علي 30 سعر حراري بس غير عملية تحفيز الهضم و خاصتا الدهون و بالتالي بيساعد علي الحرق و التخلص منها.

4- للوقاية من الأنيميا

الحديد العنصر الاساسي في تكوين اليهموجلوبين المسئول عن نقل الغذاء و الاكسجين لكل أنحاء الجسم عشان كده بيعمل وقاية من الانيميا و بيعلي نسبة الهيموجلوبين في الدم.

5-فوائد للبشرة

النحاس عنصر مهم جدا في تكوين الكولاجين اللي بنسمع عنه في كل كريمات البشرة لأنه بيخلي البشرة تتمتع بالنضرة و الحيوية و تظهر بصحة كويسة.

6-مرضي السكر

بيعمل علي تنشيط الاستجابة لهرمون الانسولين و خفض نسبة السكر في الدم و ده مفيد لمرضي السكر بس لنفس السبب ده مينفعش تاخد انسولين بعده او قبل اكله بساعتين عشان السكر ميلغبطش.

7-لعلاج الأكتئاب

البوتاسيوم و اللي بيحتويه التين الشوكي بنسبة كبيرة بيعمل علي انقباض العضلات و تهدئة الاعصاب وده بيسبب حالة من الأسترخاء و السعادة.

8-الوقاية من السرطان

العناصر الغذائية العالية اللي فيه بتزز المناعة و بتقي من الاصابة بالامراض و الدراسات اثبتت انه بيرفع المناعة لأانواع كتير من السرطانات.

9-فوائد للمرأه الحامل و للرضاعة 

تنظيم درجة حرارة الأم و الجنين بيحسن الحلة المزاجية للأم و بيحسن وظايف جسمها و بيحسسها بالنشاط غير انه مدر للبن في حال كانت الام بترضع غير طبعا الفوائد الغذائية اللي ذكرناها قبل كده.

تعرف بقي ان التين الشوكي زراعته سهلة جدا و كل اللي عليك انك تقطع كف من نبته صبار تين شوكي من الجزء السفلي عشان تكون ناضجة و قوية و تغرزها في رمله لحد نصها و تخلي نصها ظاهر بره و بتسقيها كل اربع ايام لانه نبات صبار بيتحمل الطقش الجاف و ظروف الحرارة العالية الشجرة بتبدأتطرح الثمار بعد سنتين الي 3 سنين و بتظهر الثمار في يوليو وأغسطس و علي فكرة الكف اللي انت خدته من النبتة الام مش حيضرها بالعكس ده حيسرع نموها أكنك بتعملها تقليم.
لو عندك أي مساحة محتاج تعملها سور طبيعي أظن أن صبار التين الشوكي هو الأختيار الامثل و اخواتنا في ليبيا بيعملوا كده و بيقسموا بيه الاراضي كمان.


التين الشوكي زي اي حاجة خلقها ربنا الافراط في تناولها بيسبب مشاكل زي الامساك لو كلته علي الريق او بكميات كبيرة عشان البذر اللي جواه كمان ممكن يسبب مشاكل لمرضي القاولون بسبب أحتوائه علي نسبة ألياف عالية جدا حاجة أخيرة بيسبب حساسية لنسبة قليلة جدا من الاشخاص فلو بتحس بأعراض حكة لما بتاكله فأنت ممكن تكون من النسبة القليلة ديه.
و متعملش شبح و تقول للراجل متقشرهمش حقشرهم في البيت عشان حتزعل حتزعل جامد و الله عن تجربة.😂😂😂
كان معكم #TRex_Magazine من أمام أحد عربيات التين الشوكي اللي كلتها كلها.
#تعرف