الروبوتات تحتل الISS
محطة الفضاء الدولية ISS أكبر معدة خارج كوكب الارض من صنع البشر و المكان الوحيد اللي بيدعم الحياة خارج الكوكب من صنع الانسان و بالرغم من وجود طاقم بشري دائم فيها بيتبدل باستمرار مهمتهم دراسة الفضاء و عمل التجارب في نخصصات مختلفة بتستلزم ظروف معينة مش متوفرة علي كوكب الارض. حتي رواد الفضاء نفسهم بيبقوا غبارة عن تجربه لان بيتم فحصهم طبيا بصورة دقيقة لمعرفة تأثير السفر في الفضاء و التعرض للاشعة الكونية علي اجساد البشر الا ان و من اول 2010 تم التمهيد لاحتلالها بواسطة الروبوتات.
اولا Robonaut و بعديه weebo هو اسمه Int-Ball بس لو انت من جيل اواخر التمانينات و اوائل التسعينات اكيد حتبقي اتفرجت علي فيلم Flubber للراحل Robin williams و اللي كان مخترع فيه روبوت كيوت اسمه weebo قريب اوي من Int-Ball لو مكنوش مستوحينه منه بشكل كلي.
Int-Ball تم ارساله لمحطة الفضاء الدولية علي متن Dragon احد صواريخ SpaceX في مهمة محددة و حرجة جدا حيشتغل مصوراتي.متستغربش التصوير بياخد 10% من وقت رواد الفضاء لانهم مضطريين يوثقوا كل حاجة بيعملوها و كل تجاربهم و كل الاصلاحات و الاجرائات اللي بيقوموا بيها علي متن ISS.
بيشتغل ازاي بقي ده شبه الكورة الكفر?!!!!!!
هو اصغر شوية اكنه هاند بول كده قطره حوالي 15سم و وزنه 1كجم.
الكورة ديه مزودة ب12 مروحة متوزعة داخل جسمه و بتتيح له الحركة بحرية في كل الاتجاهات و بسرعة و مناورة كبيرة لانه معرض للجاذبية الصغري بس فكانه عايم و المراوح بتديله دفع في الاتجاه اللي عايز يروحه لانه ذاتي الحركة محدش مضطر يمسك ريموت ويتحكم فيه.
الروبوت من صنع وكالة الفضاء اليابانية JAXA (اليابان طبعا)و تم الانتهاء من الاختبارات الاولية ليه و بث اول فيديو بنجاح. الروبوت بيستخدم دلائل معينة علي جدران محطة الفضاء تم تركيبها مخصوص ليه عشان يبقي عارف هو فين بالظبط و لما ياخد امر انه يروح يصور في مكان يروحله من نفسه.
الموضوع بادئ بالتصوير بس زي ما قلنا كل حاجة هناك عبارة عن دراسة. سلوك الروبوت في الجاذبية الصغريMicro Gravity بيحدد امكانية استخدام روبوتات مماثله في اعمال الاصلاحات و المهام الروتينية داخل و خارج الISS.
روبوت بحجم صغير زي ده ممكن يبقي عندك منه جيش يقوم بأعمال كتير جدا و يلغي الحاجة للتواجد البشري يوفر اكسجين و طاقة للطاقم و يخليهم يركزوا في التجارب بتاعتهم.
بس تخيل لو Robonaut و Int-Ball تم تحديثهم و عملوا زي روب و اليس روبوتات الفيسبوك و نفضوا للبشر مش بعيد ياخدوا رواد الفضاء رهينة او يتخلصوا منهم عشان يقدروا يعيشوا بحرية علي متن ISS او طموحهم يمتد لابعد من كده الكوكب اللطيف بتاعنا محدش يتنبأ بسلوك الروبوتات ديه لانها شغالة في بيئة مختلفة عن اي روبوتات تانية صنعها البشر التجارب و الخبرات اللي حيكتسبوها فوق و الداتا اللي حتبقي معاهم تخلينا تبقي في وسط راسنا قبل منسلمهم الدركسيون بايدنا و نلاقي محطة الفضاء مخيشة في كوبري مشاه.
كان معكم #TRex_Magazine من محطة الفضاء الدولية.
0 التعليقات