العالم علي موعد مع القمر الدموي

القمر الدموي

ده اللقب اللي بيطلق علي القمر لما بيتحول لونه للون الاحمر في ظاهرة فلكية بتتكرر لما بيحصل خسوف كلي للقمر.

حنشوف بيبقي احمر ليه بس الأول ايه هو الخسوف?!
المكونات اللازمة للخسوف 3 حاجات :
الشمس - الارض - القمر بالترتيب كده بيحصل الخسوف الكلي لما ال3 بيبقوا علي صف واحد فظل الارض يغطي القمر و بالتالي القمر يظلم لانه بيعكس ضوء الشمس وهو ده الخسوف وقوع القمر في ظل الارض نتيجة الاصطفاف علي خط واحد.



ليه بيحمر طيب مش بيختفي?!
ده لأن فيه جزء صغير من ضوء الشمس بيوصله بعد ما يعدي عالغلاف الجوي للارض اللي بيعكس الطيف الازرق بدرجاته و بيسمح بنفاذ الطيف الأحمر فبنشوفه منور باللون الأحمر ده لانه زي ما قولنا بيعكس الضوء اللي بيوصله.
ظاهرة القمر الدموي حتحصل النهاردة و حيتم رصدها في اماكن متفرقة من العالم و بالرغم اننا مش حنتمكن من رصد الظاهرة ديه الا اننا حينوبنا من الحب جانب لان النهاردة حنقدر نشوف في سماء مصر و الوطن العربي خسوف جزئي بمعني ان جزء من القمر حيبقي شبه مظلم بالرغم اننا في نص الشهر العربي و القمر بدر.

تقدر تشوف الظاهرة ديه بالعين المجردة بدون اي ادوات خاصة النهاردة و حسب مركز بحوث الفلك حتستمر الظاهرة 5 ساعات حتكون في ذروتها الساعة 6:20 م حيكون القمر مظلم بنسبة 30% ده عندنا في مصر و الدول العربية و حيبدأ ينور و يرجع بدر تاني تدريجيا. و الجميل اننا في اغسطس و السما صافية جدا مفيش غيوم فتقدر تروح اي مكان مفتوح و منها تشم هوا و تتفرج عالظاهرة اللي بتشهد بعظمة الخالق عز و جل.

#TRex_Magazine

التعليقات
0 التعليقات