سلسلة تعرف - حيوان الولفرين

سلسلة تعرف - حيوان الولفرين

مستمعينا الأعزاء هابي ويك أند عليكوا ضيفنا النهاردة أسمه مش حيكون غريب عليكوا بالرغم أنك ممكن متكونش شوفته قبل كده.
و برغم المصاعب اللي وجهناها عشان نستضيفه الا انه أخيرا قبل يجي يكلمنا شوية عن نفسه و الحمد لله الاصابات أثناء تسجيل الحلقة كانت قليلة قدر الأمكان. ضيفنا النهاردة أسمه حيوان الولفرين لا مش هيو جاكمان أنا مش راية.


- مساء الخير ازي حضرتك.
-معلش جبناك من أخر الدنيا بس و الجو عندنا حر شوية.
-طب لو حضرتك سامعني ممكن تعرفنا بنفسك.
-أسمي ولفرين أو الشره.
-معلش هو أنا بس مش فاهم حضرتك أيه يعني أنت دبة ولا لمؤاخذه كلب؟!
-أنا عرسة!
-نعم!!!عرسة نزل رجلك يلا رجعوا الحاجة الساقعة ديه كل النفخة ديه و طلعت عرسة في الأخر.
-أنا أكبر حيوان من فصيلة العرسة و برغم كده بصنف في قوة الذئب و شراسة الضبع.

- الصلاة عالنبي كل ديه مخالب ولفرين بقي! أنا متأسف دول بتعمل بيهم ايه دول؟
-بصطاد بيهم و بتسلق الجبال و بيساعدوني في المشي و التسلق عالجليد.
-يعني حضرتك شبه الدبة الصغيرة و حجمك حجم قد الكلب بس أنت عرسة بمخالب فتاكة؟!
-حاجة زي كده😏.
-تمام اللي فهمته أن حضرتك بتعيش في الاماكن الباردة.
-تمام انا بعيش حاليا في شمال أوروبا و امريكا و أسيا وده لأني بتكيف كويس جدا مع درجات الحرارة المنخفضة
كان في مني شوية في شمال أفريقيا بس قربوا يخلصوا لأن الجو مبقاش قد كده.
- معك حق و الله الواحد حيفطس. طيب بالنسبة للأكل أنت بتاكل أيه
- أنا أكل للحوم باكل الثدييات الصغيرة أرانب معيز جبلي بس ممكن اكل الجاموس الجبلي لو ملقتش صيده صغيرة.
- مش وسعت منك ديه ده الموضوع بيحتاج قطيع ذئاب عشان يحلقوا عليه و يمسكوه
- أه منا ببقي مستنيهم يصطادوه و أخش أتخانق معاهم عشان أخده منهم او لو في واحد مجروح من محاولة صيد قديم بخش أخلص لوحدي.

-ثواني يعني انت بتخش تتخانق مع قطيع ذئاب لوحدك ليه أبراهيم الابيض!!! طب لو مت؟!
- مش مهم ساعات كتير بنموت فعلا في الحركة ديه.
-أكيد عشان الغشومية ديه معرض للأنقراض اللي عرفته انك بتتخانق حتي مع الدببة اللي قدك مرتين.
-أه أصلهم شايفين نفسهم بس أنا معرض للأنقراض بسسبكوا تغير المناخ مع الصيد الجائر خلصتوا علينا جتكوا داهية.
-عصبي أوي. بالنسبة للمدام..
-مالها أنت تعرفها ؟؟؟؟؟؟

-لا و الله أبدا😓 بس أنا بتكلم عن أناث الولفرين عمتا سمعت أنها شخصية قوية و بيبقي ليها منطقة نفوذ زيها زيك الذكر بالظبط ولما بتتجوزوا المنطقتين بيندمجوا مع بعض.
- ده حقيقي الستات عندنا ب100 راجل من أي حيوان تاني. مش بس كده أم حنينة و لما بتخلف بتبقي مجهزة حفرة و عازلاها من جوه بغصون الشجر و بتقعد تحرس الولاد لحد ما ارجع من الشغل بالأكل.
- بنت أصول و الله فترة الحمل عندها بتبقي من 30 ل50 يوم و بتولد في المرة اتنين أو تلاته ربنا يخلهملك.

-اه و الله بيطلعوا روح أمي.
-يا سيدي روق دمك العيال كلهم كده بس أنت حنين عليهم برضه غير كل الحيوانات.
- فعلا حتي لما بيكبروا و بيبقي ليهم مناطقهم الخاصة بعرفهم و بنزور و نسأل علي بعض.
- الأب يا أخوانا بس أنا سمعت أشاعات علي حضرتك مش ولا بد كده
-خير؟؟؟!
-لا خير أن شاء الله بس هو يعني حضرتك فعلا بتاكل الجيفة و العضم وأي مخلفات صيد حد
-أمال ايه انا مش قايلك عرسة و عندي ضروس قوية بقرقش بيها العضم كمان.

-ربنا يديك الصحة😨
في نهاية حوارنا أحب أشكر ضيفنا علي سعة صدره و بنقوله احنا مسامحينك عالشباب اللي اتشرحوا جوه دول.
كان معكم #TRex_Magazine  من جحر العرسة انجوي يور ويك اند.
#تعرف

التعليقات
0 التعليقات