هل الكائنات الفضائية هما اللي بنو الهرم !!

مين اللي بني  الاهرامات .!.!.!

كتير من العلماء بياكدوا ان اللي بني الاهرامات والحضارة الفرعونية هما كائنات فضائية .... هل في دليل  ل كده ؟؟

في دليل ...اولا في اهرامات في المكسيك و اهرامات في اندونسيا في شرق اسيا ...اتبنوا كلهم قبل الميلاد وكلهم شبه بعض ...ف اكيد اللي بناهم شخص واحد ....ده غير ان صعب يكون حد من مصر او المكسيك زار الثاني،العصر القدييم ده مفيش حد قدر يعدي المحيط.........وكمان ....الحضارة العظيمة دي والاهرامات الجبارة دي اتوجددت مرة واحده ....ف اكيد في حد عنده علم كفاية جه مصر و بناها

الموضوع مقنع ..علي الكلام ده اكيد كائنات فضائية هما اللي بنوا مصر القديمة

 انا بتريق علي الكلام الاهبل ده .....اكيد لا طبعااا مفيش حاجة اسمها كائنات فضائية ....انتوا ماشين ورا  رائي عشر علماء  وسايبين رائي الاف العلماء اللي بياكدوا ان اللي بني الهرم مصريين ومش عبيد كمان

وايه الدليل .... وايه الدليل علي ان الكلام ده غلط ؟؟

تعالي نرد علي كل نقطة لوحدها

اولا تشابه الاهرامات  في 3 مناطق في العالم بعيدة عن بعض ....... انا اذا قلتلك عايزك ترسم حاجة طويله توصل بيها للسما ....( توصل بيها للنجم او الشمس ) ...و سالت نفس السؤال ل واحد من الصين  و واحد من المكسيك .

تتوقع يرسمو ايه الناس دي ......تخيل كده ..... مهما حاولت تتخيل ...هتجيب حاجة انت شفتها قبل كده اما برج او هرم ...او سلم ......اللي انت هتتخيله اكيد في غيرك في قارة تانية هيتخيله برضو لانك انتوا الاثنين بتشوفوا نفس الحاجات اللي موجودة حاليا 

نفس الكلام زمان ....هما عايزين يوصلوا للسما ...ايه اقرب حاجة ممكن توصلهم للسما  في  عصرهم  هو الجبال .....ف في حضارات عندهم جبال جاهزة استخدموها ك مقبرة او دور عبادة ...و اللي معندهوش جبال يعمل جبل .....واكيد تصميم الجبل او الهرم  هيكون واحد .....ما هو نفس الشئ ......ف كل الموضوع انها نفس الافكار بس 

ده حتي في مصر ......لما كانت العاصمة طيبه جنوب مصر ...كان في جبال ....ف مكنشي في داعي يبنوا هرم ......اما في الشمال منف ...مفيش جبال فكان لازم يبنوا هرم 

ثانياا : الحضارة والاهرامات ظهرت مرة واحده ........... تعالي نرجع بالزمن ونشوف ...

الهرم الكبير كان لملك اسمه خوفو بعد اول واحد بني  هرم في مصر (اللي هو ملك سوزر)..يعني  عدي مئات السنيين علشان الهرم الكبير ده بعظمته يكون موجود ...هرم خوفو كان سنه 2560 قبل الميلاد وهرم سوزر او سقارة كان 2648 ق.م.....يعني تقريبا بعد 100 سنه 

ده غير ان كان في مصر حوالي 100 الي 111 هرم ....متبقي منهم حاليا اقل من 50 ...لان الباقي  اتدمر بسبب عوامل التعرية والجو ...

ترتيب الهرم الاكبر .....تقريبا  السادس او السابع .....يعني كان قبليه 5او6 محاولات ده الي موجود حاليا ..منعرفشي كام هرم تاني تم بنائه واتهد في الفترة دي 

والاهم ....ان اول هرم كان سنه 2648 ق.م يعني الاسرة الثالثة .....و تاريخ الاسرة الاولي حوالي 3000 ق.م  ...ضيف كمان ل معلومات  ان فترة كبيرة من الزمن  بالافات السنيين  اسمها ما قبل الاسرات ..... يعني المصرين فضلو عايشين  في الارض دي بيبنوا و يتعلموا  ل الاف السنين  قبل ما الحضارة تكون بالعظمة اللي انت بتتكلم عنها ....

الموضوع محصلشي فجاءة ابدا .....اخد سنين لحد ما بقي زي ما انت شايف .....ف عيب اوي  تقولي  كائنات فضائية .....

ايه سبب بناء الاهرامات اصلا ؟ 

 في الديانة المصرية القديمة , الفراعنه كانوا بيعبدو مجموعه من الاله ....وكل معتقادتهم تتمثل في حركة الاجرام السماوية , وخاصه الشمس والقمر ...واذا  حبيت تتعمق في الكلام ده اقراء رحلة الموتي (الرحله اللي بتاخدها الروح بعد الموت علشان تعدي للحياه الاخري ..اللي هي نفس رحلة الشمس  من الشروق الي الغروب ) 

وبالتالي كان لازم يكون القبر بتاع الملك موجه للسماء (لازم الهرم يلامس السماء زي اللي في الصورة ) و يكون موجه لاتجاه معين علشان يسهل علي روحه او يعرفه الطريق الصحيح للحياه الاخري

ده السبب المقنع واللي في اثباتات تاريخيه عنه ..... في اسباب اخري معظمها غير منطقيه او  مفيش اثبات تاريخي ليها يعني مفيش كتابات عنها ....و بالتالي مش هقولها . 

ليه في 100 هرم بس ..وبعد كده الاهرامات اختفت ؟
مفيش سبب موثوق منه تاريخيا ...بس السبب المقنع هو الحاله الاقتصادية للبلد ....في اول فترة كانت الاهرامات كبيرة وضخمة ...ومع مرور الوقت بدات البلد في التدهور و ده العادي في نهاية كل اسرة , حيث مع نهاية الاسرة السادسة بداء عصر الاضمحلال الاول ...ف بالتالي مفيش فلوس كفايه علشان يبنوا اهرامات اصلا .
وممكن برضو المهندسين اللي بنو الاهرامات ماتوا من غير ما ينقلو خبرتهم  لغيرهم...ف بعد فترة بقت الاهرامات مش جامدة  ومش بتعيش فترات طويله .

وبرضو من اهم الاسباب ...في عصر الاسرة الحديثة او الدولة الحديثة (بعد الهكسوس ) اتنقلت العاصمة  الي طيبه الاقصر حالياا ...واستغلو وجود جبال في المنطقة واستخدموها كمقابر ليهم (وادي الملوك حاليا )  زي اللي في الصورة

ازاي الاهرامات اتبنت ؟
في نظريات كتير اوي , ومعظمها منطقي , بس مفيش اي اثبات تاريخي ب كيفيه البناء .. من اهم النظريات واللي من منظوري شايف انها الاقرب للحقيقة ........
ان الهرم الاول اتبني ك تل من التراب بالارتفاع المطلوب ...و بعد كده تم بناء من الخارج للداخل .....الفكرة ان التل الترابي هيسهل جداا سحب الاحجار الضخمه اللي اعلي نقطة ....و كمان هيسهل عمل تجويف داخل الهرم ...بس ده رائي لشخصي , في نظريات كتير

ازاي نقلو الصخور الضخمه ؟؟ 
اولا  زي صخرة الجرانيت اللي في غرفه الدفن .... مفيش اي نظرية او فكرة منطقية ازاي اتنقلت واتحطت في مكانها ..... مستحيل نقلها ..
اما باقي الاحجار كانت بتتجر علي الارض ( بيتحط تحتها عمود من الخشب اكنه عجل ..و الارض يتحط عليها لبن وعسل ف يسهل الحركة وتتزحلق بسهوله )..دي برضو افتراضات .

ايه هي هندسة الهرم من الداخل ؟ ...ايه هو تاريخ بناء الاهرامات ازاي بدأت ؟
الاجابه هتكون في موضوع منفصل  لانها محتاجة تفاصيل  اكتر ....

Written by:Mohamed ElMously

#M_Elmously

#TRex_Magazine