سلسلة تعرف - لقاء مع وحيد - الكركدن

سلسلة تعرف - لقاء مع وحيد - الكركدن

مستمعينا هابي ويك أند عليكوا و يارب تكونوا بأحسن صحة وأفضل حال,ضيفنا النهاردة كلفنا كتير جدا نتيجة لتوسيع باب الأستوديو و كمية الكراسي اللي أتكسرت غير اللأوفيس بوي اللي نطحة مرتين و كل التكاليف ديه طبعا حتتخصم من اجره في الحلقة و حرجعه الجنينة تاني و ألغي الحلقة لو عمل أي شغب تاني.

- ينفع كده يا وحيد بزمتك مش ندمان انك دغدغت الواد و كسرتلنا نص الديكور,بصلي و أنا بكلمك.

-- خلاص يا هندسة انت حتعملي فيها ريهام سعيد ما أنت حتخصم كل حاجة بقي و بعدين أنا كنت جعان و هو أتأخر.

- ما هو لازم يتأخر يجيبلك منين جبنة فلمنك الصبح هو انا جايب بنتي معايا وحد الله يا عم وحيد و ما تقولش كلام يزعل بيقي.

--خلاص يا هندسة انا متأسفلك مش حعمل شقاوة تاني.

-لا أنت نوتي يا وحيد أتفضل أقعد في النوتي كورنر لحد ما نخلص الحوار.

-- حاضر و الله ده ظلم.

- أخلص يا وحيد بدل ما ارجعك الجنينة و العيال يرجعوا يرموك بالطوب.

--لا خلاص حاضر, أنا أسمي وحيد القرن أو الكركدن أو الحريش أو الهرميس و عندكوا في مصر هنا بتقولوا خرتيت هو مش أسلوب بس أنا حعديها بمزاجي.

-ماشي يا خرتيت أنتوا منين في الكوكب بقي ؟

-- ماشي, علي حسب أحنا فيه مننا 5 أنواع فيه منهم من افريقيا و فيه منهم من قارة اسيا

- مين فين؟!

-- وحيد القرن الأبيض و ووحيد القرن الأسود من أفريقيا ,و الاتنين لونهم رمادي أصلا عشان متتعبش دماغك الفرق بينهم في شكل الوش و الشفايف و بيقوا ضخميين , أما جاوه و الهندي و سومطرة من اسيا أن شاء الله و بيبقوا اوزي في نفسهم شوية.
-أوصفلنا نفسك كده يا وحيد مع ان مش لايق عليك وحيد خالص ديه.
-- ضخم الجثة عريض المنكبين بيوصل طولي في بعض الأنواع ل4 متر كأضخم الثدييات بعد الفيل وده في الانواع الافريقية بالذات وحيد القرن الأبيض. كمان بيميزني قرن فوق مناخيري عشان كده اتسميت وحيد القرن يعني مش طالبة فقاقة, ايه تاني يا وحوح عندي كتلة عضلية هايلة و عصبي و مزاجي متقلب.

- أنت فعلا كتلة, طيب اللي أعرفه ان نظرك علي قده.
-- فعلا بالرغم ان حاسة الشم و السمع عندي قوتيين جدا الا ان نظري ضعيف بس انا بحوش عشان اعمل ليزك و كان عندي امل اجري في الحلقة يغطي تكاليف العملية بس الحمد لله علي كل شئ.
- خلاص يا وحوح أنت حتشحت قطعت قلبي.
-- بجد صعبت عليك يعني حتديني الفلوس كاملة
- ده بعينك يلا,  بمناسبة ودانك انا اسمع انك بتعرف كل واحدة فيهم لوحدها يعني ممكن تلف واحدة يمين و التانية شمال.
-- اها سبحان الله ديه سبيشيال باور عشان اشغل اقدر القط اي حركة حواليا بسهولة عشان الحيوانات المفترسة.
- سبحان الله فعلا بس حيوانات مفترسة ايه عيب علي طولك حتي؟!
-- الحيوانات المفترسة زي الاسود و النمور و الفهود بيهاجموا الصغار بالذات و ممكن يتلموا علي اي عيل سيكي ميكي دعيف البنية بالذات في موسم الجفاف.
- و علي كده الاشاعات ان جلدك قوي جدا و ممكن الرصاص ميأثرش فيه من اول مره.
-- لا وسعت منك ديه بالرغم ان جلدي سميك فعلا الا ان الاوعية الدموية بتاعتي عالسطح و بتعور عادي زي اي حيوان.

- و الجلد ده بيبقي مليان فعلا حشرات و دود و حاجات مقرفة كده.
-- اه فعلا و ده اللي بيخلي دايما الطيور بتقف علي ظهري و تاكل من خيرات ربنا.
- علي كده أنتوا بتعيشوا في جماعات برضة يا وحيد ولا مع نفسكوا كده
-- لا بنعيش في جماعات العزوة حلوة بيبقي فيها ذكور و أناث بس عدد الأناث بيبقي اكتر بيبقي للذكر من 4 حسب الشرع و 2 تانينن نزوات بيحصل التزاوج في موسم المطر
- دنتوا مقضينها عربدة بقي انت تعرف سيد يلا؟!
-- سيد الفرس؟!
- ده حبيبي و صاحبي الروح بالروح
-- منا قولت برضه الخراتيت علي أشكالها تقع.
- مع ان سيد برقبتك و الله, بالنسبة للحمل و الخلفة و تحمل المسئولية
-- الانثي بتحمل في خرتيت واحد لمدة 18 شهر و ممكن تقعد بال4 سنين متحملش تاني لأن عملية الحمل بتبقي منهكه ما هي برضه بتولد تلاجة وزنه 38 كيلو مش افترا هو يعني.

- لا قلبك طيب قوي علي كده بترعا ولاد زوجاتك معاهم.
-- نعم انت حتصغرنا ولا ايه يا هندسة ولا اعرف في شغل الحريم ده.
- واطي, علي كده انتوا معرضين للانقراض بقي وكده
-- ده حقيقي عندك وحيد القرن الأبيض مفيش منه غير 400 بس علي مستوي العالم و الاسود قرب يحصله
الناس بتشتري القرون في أسيا عشان اللي عندهم صغيرين ولمؤاخذه و بيعتبروها بتجلب الحظ غير ان الصيادين بياكلونا افترا و ربنا.
- لا حول ولا قوة الا بالله خلاص يا وحيد متعيطش.
-- شوفت ظروفي صعبة ازاي دنا حتي امي عيانة و حتعمل عملية الشهر الجي و كنت محتاج فلوس الحلقة قوي
- عملية ايه؟!!
-- ليزك برضه العيلة كلها طشاش
- عيلة ما يعلم بيها الا ربنا ماشي يا وحيد انت كملت الحلقة مؤدب عشان كده حديك فلوسك كلها حتلاقيهم جاهزين بره مع الأعداد
-- الله يكرمك يا حبيبنا
- عشت و أبقي سلملي علي سيد.
--يوصل ان شاء الله سلام.
رجعو الخرتيت ده القفص و مياخدش مليم أحمر .....
كان معكم #AK_TRex مراسل #TRex_Magazine من أفريكا بارك انجوي يور ويك اند.

Written by:Amr Khaled -T.Rex
#AK_TRex