طاقة الكتله الحية – Biomass - الجزء 2

طاقة الكتله الحية – Biomass -الجزء 2

هنتكلم مع بعض انهاردة عن احد الحلول المقترحة لحل مشكلة التلوث ومشكلة الزباله ومشكلة انتهاء البترول .....ده اكيد حل سحري حل 3 في 1😃😃
اللي هقوله ده ببساطة مفاتيح العلم ده ..لانه كبير جداا ومتشعب ...واللي بيشتغلو فيه ممكن يكون مهندس ميكانيكا ومهندس كمياء  وعلوم كمياء و بايلوجي ومهندس زراعه ..يعني معظم العلوم بتشارك


<
 طب خلينا في المفيد ..ايه هي  طاقة الكتله الحية...و ايه هي المخلفات..و العلماء بيشوفوا الزباله ازاي ؟؟
ببساطة التكنولوجيا دي ....هي طريقة لتحويل المخلفات بكل انواعها الي مواد ذات قيمة ممكن ننتج وقود للعربيات او للطيرات او وقود لمحطات الكهربا ...وممكن فحم وممكن غاز شبه الغاز الطبيعي ...وممكن مواد كميائية لصناعات البلاستك او الدهانات او المنظفات ...او حتي سماد للارض
وابسط مثال روث الحيوانات ....فاكرين الجلة ..اللي هي روث البقر ..اما بيدفنوها في الارض تاني علشان تكون سماد للارض او تتجف و بيحرقوها علشان ينتجوا بيها حرارة ....احنا كنا بنعمل كده من الاف السنين ....دلوقتي اتطورنا ولاقينا طريقة نستغل كل انواع المخلفات زي الروث....و بدل ما نحرقها زي ما هي , بنفككها وناخد المهم منها ونرمي الباقي 

ايه كل ده ....كل الكلام ده ممكن انتجه مثلا من قش الارز ...ده احنا كده نبقي اغنيه جداااا؟؟!
لا  طبعاا .....حسب انت عايزايه .....انت هتنتج حاجة واحدة بس او 2 بالكتير ...
انت مثلا عايز بنزين ...يبقي تستخدم نوع معين من المخلفات وطريقة معينه من التحويل وجهاز معين ...


طب ايه هي الزباله ..وليه هي مفيدة كده ...؟
تقريبا كل اكلنا عبارة عن نباتات ....حتي اللحوم والفراخ ,الحيوانات دي بتتغذي علي نباتات ...ده حتي السمك بياكل اعشاب او طفيليات اللي بتعمل نفس اللي بتعمله النباتات ...واللي هو عمليه البناء الضوئي
باختصار : ...
الشجرة علشان تنمو لازم تاكل .... اولا بتجيب اكل من الارض زي المياه ...مش بس كده كل زرعه محتاجة مكملات غذائية بتجبها من الارض زي النيتروجين او الحديد  المنجنيز ...وحاجات كتير
وبعد كده بتحتاج تكسر المياه ...الاكسجين هي مش محتاجاه هي عايزة الهيدروجين بس ...ف محتاجة طاقة كهربيه علشان تفكك المياه ...ف بتمتص طاقة من الشمس تولد بيها تيار كهربي يفكك المياه ل هيدروجين و اكسجين ...ال O2 يطلع للجو ....و يدخل مكانه CO2  .... تكسره وتركبه مع ال H2   وبكده انتجت الاكل بتاعها ...وهو عبارة عن مركبات C-H-O  
وبالتالي كل جزي في الشجرة من الورق الي الخشب الي الثمرة نفسها عبارة عن مركبات C-H-O ومعاها حبه نيتورجين اومركبات تانية (اللي هي سحبتها من الارض في الاول .
الشجرة او اي نبات مثال الارز ....هنلم المحصول ناخد الرز ونرمي باقي النبته زي الورق و الخصن ...
الحمد الله اكلنا و شبعنا ....ندخل الحمام بقي  نفضي و نتخلص من الذيادة ...
تتوقع يكون الحمام بتعنا مختلف يعني ...اكيد لا  هيكون برضو في نفس المركبات
C-H-O –N –Mg  وهكذا

وبالتالي كل انواع الزبالة من مخلفات بشرية الي مخلفات حيوان الي مخلفات زراعيه هي نفس المركبات

انا مش فاهم حاجة وبعدين ازاي بقي هنطلع بنزين ..؟؟
اصبر شوية ....
انت بكل سهوله ممكن تعمل زي الفلاحين زمان ....تاخد الزباله دي وتحرقها ...هتديك نار و حرارة  اعمل بقي اللي انت عايزه بيها ...ولد كهربا بيها تطبخ بيها أعمل اللي أنت عايزة ..

 
طب والعربيه  هحط فيها زباله يعني ..... هتبقي العربيه حمام ووسيله مواصلات في نفس الوقت .!!!؟؟؟
ما هنا بقي يجي دورنا ...اننا نحولها ل وقود ينفع نستخدمه
هناخد الزباله دي , مع بعض العمليات الكميائية والحرارية (يعني نسخن المخلفات  ونحط عليها مركبات كميائية او بكتريا او طحالب حسب يعني انت عايز تطبخها اذاي )
حسب العمليه اللي هتعملها ...هتفكك المركبات دي
C-H-O-N-Mg
تحولها ل ابسط صورة ليها .....زي الجلوكوز ....12O6 C6H /

ازاي الجلوكوز ابسط صورة .؟؟
مثال ...الهدوم اللي انت لابسها دي ..كلها باشكلها والوانها  هي عبارة عن خيط ...نفس الكلام في الشجر هي عبارة عن جلوكوز (بيسموا سكر احادي ) متركب مع بعضه  علشان يكون تفاحة ..ويغير ترتيبه يكون ورقة شجر وهكذا
المهم ...هنكمل العمليات علي الزبالة والجلوكوز ....و نوصل في الاخر اننا نتج
مركبات :
Co2  ,  و مركبات مهمه C-H او C-H-O   ودي اللي بتكون شبه الوقود بنزين او غاز

لا استني بقي ...انت كده انتجت غاز ثاني اكسيد الكربون تاني ...وكمان انتجت بنزين  هتحرقة هينتج الغاز ده تاني ....ده كده انت خربتها خالص ...اذاي هتحل مشكلة الاحتباس؟؟؟
انا قلت اصبر .....وانا مقلتش هحل انا قلت مش هذود المشكلة ......
مش النبات اخد CO2 من الجو....انا خرجته تاني للجو ....مجبتش CO2  من فراغ يعني ....عكس الوقود اللي بيجي من البترول ....اللي هو جديد مكنشي موجود من الاول

 
طب علي كلامك اللي دخل هو اللي خرج ..فين باقي المكونات ..زي الحديد مثلا ؟
انا حولت الزباله ل سائل و حبه غاز.....اكيد هيتبقي باقي المركبات في صورة صلبه  في الاخر بيتسمي char and Ash  
البتاع الصلب اللي في الاخر بيشبه الفحم .... وحسب زي ما قلت طريقة التحويل اذا فيه C-H كتير ممكن نحرقة زي الفحم ....و اذا في  قليل  ممكن نرجعه تاني للارض الزراعيه علشان هو ماليان بمكملات الغذائية اللي النبات محتاجه ...و بالتالي بيكون سماد للارض (ده غير بعض اللمميزات التانية )

بكل بساطة ...النبات بياخد طاقة الشمس و ثاني اكسيد الكربون ....وانا باخد النبات احرقة اطلع CO2  تاني زي ما هو و اخد طاقة الشمس استغلها
مش كده بقي الطاقة دي متجددة ...!!!... بس مش نظيفة ....اسمها green energy  مش  clean  .....وده لبعض العيوب هنقولها في موضوع اخر

طب ازاي بقي بنحول الزبالة ديه لوقود.؟؟؟
تمام ...في مقال تاني  هرد علي السؤال ده بالتفصيل
Written by: Mohamed Elmously

#M_Elmously
#TRex_Magazine

التعليقات
0 التعليقات