رحلة إلى الصحراء البيضاء White Desert

رحلة إلى الصحراء البيضاء White Desert

الصحرا البيضا هي واحدة من المحميات الطبيعية المصرية المعروفة. تم اعلانها فى سنة 2002 كمحمية طبيعية ومساحتها تقريبا 3000 كيلومتر مربع وموقعها فى الصحراء الغربية حوالي 45 كيلومتر من واحة الفرافرة. المكان عبارة عن تحفة جيولوجية وكنز طبيعي من اللون الأبيض المسئول عنه الحجر الطباشيري اللي بيغطي المنطقة بالكامل واللي مع عوامل التعرية ونتيجة للطبيعة الصحراوية للمكان حصل نحت للصخور البيضاء الموجودة فى المكان وشكلت أشكال طبيعية جميلة ومختلفة. المنحوتات الطبيعية فى الصحرا البيضا بالنسبة لمحبي رحلات السفاري والصحرا والطبيعة المفتوحة عبارة عن مغامرة جميلة بسبب الطبيعة الفريدة للمكان والصخور الموجودة فى قلب الصحرا الغربية.





المسافة من القاهرة للصحرا البيضا حوالي 570 كيلو متر لكن الرحلة بتعدي فيها على مناطق مختلفة فى الطريق بتقلل جزء من الاحساس بالتعب من المشوار الطويل واللي بيقل بكتير بمجرد ما توصل للصحرا البيضا وتشوف الصخور والمناظر الطبيعية اللي فيها. الصحرا البيضا تاريخيا كانت جزء من بحر كبير بيغطي منطقة الصحرا الغربية من حوالي 40 مليون سنة وده ظاهر فى الصور الجاية اللي بتبين ان الشكل السفلي للأحجار الموجودة بيقول ان المكان ده عبارة عن قاع بحر طبقا لعلماء الجيولوجيا.



متوسط درجة الحرارة خلال السنة بيبقي تقريبا 47 درجة سليزية لكن نسبة الرطوبة القليلة (38%) بيخلي الاحساس بالشمس والحرارة العالية أقل. ده بيتطلب ان التخطيط للرحلة للصحرا البيضا يكون جزء أساسي هو مياه الشرب وحماية من الشمس لان المكان فى وسط الصحرا وبعيد تماما عن أي مكان مؤهل للسكن مقارنة بالمدن الكبري. بالنسبة لرحلات السفاري للصحرا البيضا فهي متاحة فى أماكن كتير وأسعارها بتختلف على حسب جدول الرحلة ومدتها وده لان الصحرا البيضا محاطة بأماكن سياحية وطبيعية تانية ممكن تبقي فى جدول الرحلة زي العيون الجوفية السخنة فى عين السرو أو الصحراء السوداء وجبل الكريستال. المكان مناسب لمحبي رحلات استكشاف النجوم والفلك وكانت فى تجربة شخصية ليا أنا مع جروب شباب  محترم جدا من علي الفيسبوك لرحلة استكشاف النجوم ومجرة درب التبانة وده لان المكان بعيد تماما عن المدن والأضواء الصناعية وبيتيح فرصة للتأمل فى السماء المفتوحة طول الليل. المكان مناسب طبعا لمحبي ومحترفي التصوير الفوتوغرافي وكل المهتمين بالطبيعة الجيولوجية ورحلات السفاري جوه مصر.






لو قررت تفضي الليلة فى الصحرا البيضا يبقي اتطمن تماما لان الصحرا تقريبا مفيهاش أي نوع من الحشرات او الحيوانات الا 
التعلب المصري الموجود في الصورة اللي تحت. هو مسالم تماما وبيخاف من البشر وبياكل بواقي الاكل اللي انت بترميها واحيانا بيجري يسرقها من حواليك لكن بشكل ظريف ومفيهوش اي نوع من الخوف.



المكان بالمناسبة اتصور فيه فيديو كليب فى 2010 لفريق انجليزي اسمه Klaxons الموجود فى الفيديو ده

Written by: Mohamed Khaled
#mohamedkh5
#TRex_Magazine

التعليقات
0 التعليقات