مخاطر الوقود البديل ..

مخاطر الوقود البديل ..

اتكلمنا قبل كده عن احد انواع الطاقة البديلة وهي Biomass او بمعني اخر انتاج طاقة في شكل وقود بديل من المخلفات. 

واتكلمنا علي اهميتها في سد العجز من الوقود السائل والغازي, وكذلك حل مشكلة المخلفات والتخلص منها بصورة مفيدة ...ولكن لكل شئ جانب السئ ...

كل انواع الطاقات البديله او الطاقات المتجددة ليها عيوب ومخاطر, ولكن biomass  عيوبه اخطر واكتر ....ومثال للتوضيح
ان طاقة الرياح بتدي مميزات80 % و عيوب 20% .....اما ال biomass  بتدي مميزات 60% و عيوب 40% ...ده مثال مش ارقام حقيقية ..

في مهندسين كتير ضد استخراج الوقود من المخلفات وشايفين انه مضر اكتر من انه مفيد ....اذاي ؟ ... هنوضح اذاي خلال بعض من النقاط المبسطة. 

اللي ميعرفشي يعني ايه biomass ...باختصار شديد , هي طريقة لاستخدام جميع انواع المخلفات و بعض النباتات وتحويلها الي وقود .. مخلفات زي مخلفات الزراعية, مخلفات منزلية مخلفات بشرية وحيوانية, ومخلفات صناعية. وبعض النباتات و الطحالب التي لا تعتبر طعام للبشر , وبعض الاطعمه واشهرها الذرة ثم البطاطس .....

علشان نعرف الاضرار كويس , لازم الاول نعرف طبيعه الوقود الناتج ونعرف تكوينه ....

العمليات دي بمختلف انواعها  بتنتج 4  مواد مختلفه .....وهما (غاز , سائل, مياه, مواد صلبه )....التركيب الكميائي بيختلف حسب نوع المخلفات اللي بستخدمها .... يعني المركبات من الذرة هتكون مختلفه اكيد عن المركبات من الصرف الصحي  

اولا الغاز : ..

بيتكون من مجموعه من العناصر اسااسيا ..CO2+CO+CH4+H2+ CxHy بالاضافة الي بعض المركبات N & S
بالعربي ( غاز ثاني اكسيد الكربون + اول اكسيد الكربون + ميثان + هيدروجين  + مركبات هيدروكاربون ) + مركبات كبريت ومركبات نيتروجين) 

ايه الضرر في ده ؟؟

غاز ثاني اكسيد الكربون ..اللي بيعمل احتباس حراري ( زي ما قلنا احنا معملناش حاجة , اللي النبات اخده احنا خرجناه ) بس الفكرة ...النبات سحب الغاز ده من الجو في سنين و احنا خرجناه كله في يوم ....ف كده مفيش اتزان سليم ..

وضيف كمان ..ان الغاز ده خارج وانا مش مستفيد منه ..مش واخد طاقة منه 

النبات محتاج طاقة علشان يكون الروابط بين مركباته ...وانا باخد المركبات دي بحرقها و بكسر الروابط بينها و باخد الطاقة بتاعتها و اخرج CO2....يعني لما اخرج CO2 قبل ما احرق يبقي كده انا خسرت طاقة . 

اول اكسيد الكربون و الميثان  و CxHy و الهيدروجين ....دول مفهمشي مشكلة ....بيتحرقوا عادي و بيدوني طاقة  

مركبات N & S  ...دي كارثه ...عند الاحتراق بيكون مركبات كبريت , احماض , بتسبب امطار حمضية .....و مركبات النيتروجين بتسبب ثقب الاوزون ......بس الحمد الله , مش كل انواع الزباله بتخرج الغازات دي , و في طرق كتير بتمنع خروج الغازات دي اصلا من الاول. 

ثانيا , المواد الصلبة  Char: 

بتستخدم ك فحم او سماد للارض , او فلاتر active carbon  ..... الضرر منها بيكون لما تكون من مخلفات فيها مواد سامة او فيها كربيت , و بالتالي استخدمها كفحم هيخرج غازات سامة, او سماد هتنقل المواد السامه للنبات ...واذا فلاتر ممكن , بس في النهاية لازم نتخلص منها بشكل سليم , وده هيخلينا ندفع فلوس وطاقة اكتر للتخلص منها . 

ثالثا المياه: 

المياه الخارجة من العملية , بتكون ماليانه مواد سامه ومركبات مضرة كتير ....وتقريبا مالهاش استخدام مهم .... بيستخدموها  ك process water  او مياه بتستخدم في الصناعه , بس في النهاية يجب التخلص منها بشكل امن لانها خطر جداا علي الاحياء. 

رابعاا السائل , Biooil: 

ده بقي المشكلة الكبيرة ... 90% من المخلفات بتنتج سائل سام وخطر جدااا , ما عادا المخلفات او النباتات اللي بتنتج كحول ,ده مفيش مشكلة منه .

السائل السام ده بقي .... خطر علي الاحياء كشرب او لمس او شم حتي ...بيسبب سرطانات وحروق وتسمم , غير انه قابل للاشتعال.

ماشي انا مش هتعامل معاه ...زي البنزين ما هو سام برضو .!!.....لو كده ماشي بس برضو هو محتاج تعديلات وعمليات كميائية تانية علشان نستخدمه في العربيات , ده ماليان بلاوي كتير لازم كلها تتشال علشان استخدمه في العربية ( يعني هدفع فلوس اكتر ) ...بس ممكن تستخدمه زي ما هو في الافران التقيله زي الاسمنت و الحديد . ....

ثواني كده ... في حاجة مهمه , الوقود الناتج من السائل ده او السائل نفسه بيتحرق عند درجات حرارة عالية جداا , اعلي من البنزين و الوقود العادي .....طبعاا ده حلو ...بس للاسف لا , درجة حرارة عالية يعني النيتروجين اللي في الهواء اللي بيدخل في الاحتراق هيتحرق و هينتج مركبات نيتروجين  NOx وبالاخص (NO2, NO3) و ده  بيسبب ثقب الاوزون 

يعني الوقود ده اقل من البنزين و الوقود العادي  في القدرة وكمان بيسبب ضرر, بيخرج CO2 عادي و كمان بيخرج NOx  اكتر .!!

دي العيوب من النواتج .... هل في عيوب من حيث المخلفات نفسها .؟؟؟

اه اكيد ..بس مش المخلفات , اكيد حاجة كويسه انك تتخلص من الزبالة. ....بس مش كويس لما تاخد اكلنا او اكل الحيوانات وتستخدمه لانتاج وقود .....ومش كويس انك تقطع الغابات و الاشجار مخصوص لانتاج الفحم ( فحم الشيشة هو عبارة عن فحم من الاشجار نفسها ) .....

الفكرة اننا علشان نتج وقود كويس لازم نستخدم الشجر نفسه, او نباتات زي الذرة او بذور وطحالب في حيوانات بتتغذي عليها.
بمعني تاني ...انا بقطع الشجر اللي بيمتص CO2 وبيقلل الاحتباس الحراري ..و بحوله لوقود بينتج CO2 !!!!!!!

بس في الاخر ...احنا محتاجين التكنولوجيا دي ...محتاجين مصدر بديل للطاقة , بس نحاول نقلل من العيوب و الاضرار, ونستخدم بس المخلفات بلاش النباتات والاكل . 

Written by :Mohamed Elmously

#M_Elmously

#TRex_Magazine