كهف وادي سنور
واحد من المحميات الطبيعية المصرية هو كهف وادي سنور بمحافظة بني سويف. الكهف تم اعلانه كمحمية طبيعية سنة 1992 وتم اكتشافه أثناء عملية التنقيب عن رخام الألباستر فى منطقة رقم 54 فى جبل وادي سنور بمحافظة بني سويف على بعد حوالي 70 كيلومتر شرق من محافظة بني سويف وتقريبا 200 كيلومتر من محافظة القاهرة. الكهف بيصل عمقه على حسب تقديرات العلماء لحوالي 700 متر تحت الأرض بعرض حوالي 15 متر وطول 15 متر
الرحلة للكهف بسيطة لكن بتحتاج عربية دفع رباعي لان فيه مناطق جبلية فى الطريق للمحمية وبمجرد وصولك لمكان الكهف بتنزل طريق دائري عشان توصل لمدخل الكهف اللي بتحتاج سلم عشان توصل للفتحة اللي بعد كده بتنزلك الكهف عن طريق مجموعة سلالم تانية داخلة للكهف
وجود كهف كمحمية طبيعية فى مصر هو موضوع غير معتاد وده بسبب ان طبيعة الكهف اللى تم اكتشافه بالصدفة هي انه تم تكوينه من ملايين السنين (من حوالي50 مليون سنة) نتيجة لترسبات المياه الجوفية مع الحجر الجيري اللى بيكون الجبل فى المنطقة دي. شكل الترسبات هو صواعد وهوابط من أعمدة الترسبات مختلفة الأشكال شديدة الجمال
فى الفترة بين 1994 و1995 اتعرضت المنطقة لسيول شديدة تسببت فى تسريب مياه الامطار بكميات كبيرة داخل الكهف واستدعي ده ان جهاز شئون البيئة المسئول عن حماية الكهف عمل دراسة لمشروع وتنفيذ عن طريق شركات لعمل مخرات للسيول فى المنطقة وده ساهم ان تسرب مياه الأمطار داخل الكهف يقل
الرحلات لكهف وادي سنور بتبقي لمدة يوم واحد بيتم فيها استكشاف الكهف وتقضية الوقت فى التصوير لهواة ومحترفي التصوير والجميل ان درجة الحرارة داخل الكهف بتبقي حوالي 24 درجة فى جميع الأوقات لان الكهف شبه معزول عن الجو الخارجي . المكان جميل ويستحق الزيارة فعلا
Written by : Mohamed Khaled
#Mohamedkh5
#TRex_Magazine
#Mohamedkh5
#TRex_Magazine
0 التعليقات