الكنغر - Kangaroo - سلسلة تعرف

الكنغر كوكي - Kangaroo - سلسلة تعرف

مستمعينا هابي ويك اند عليكوا و كل سنة و انتوا طيبين بمناسبة حرب اكتوبر المجيدة و استثني من التهنئة ديه أي مدير نزل الموظفين بتوعوا الشغل و ديه دعابة متودوناش في داهية.
ضيفنا النهاردة صديق عزيز و واحد من الحيوانات الفريدة اللي ربنا سبحانة حباها صفات مدهاش لأي كائن تاني. تشكيلة غريبة من حيوانات مختلفة أتجمعت و طلع الكائن ده بالشكل ده معانا و معاكم كوكي الكانجرو.

- أزيك يا كوكي واحشني يا عم
-- أنت أكتر يا تيري و الله.
- أيه يا عم مبتسألش خالص كده .
-- ملعون أبو المسافات يا صاحبي.
- مبسوط في استراليا بقي علي كده؟!
-- أستراليا حلوة أنت عارف انها ديه موطني الأصلي أصلا و مليانه مراعي طبيعية و بعدين أهلي  كلهم هناك.
- فعلا أستراليا حلوة طب أحكيلنا عن نفسك شوية كده من الأول خالص.
-- ماشي انا أسمي الكنغر من فصيلة الجرابيات زي الكوالا و الأبوسوم .....
- يعني ايه جرابيات؟!
-- ديه حيوانات معينة ربنا بيبقي مانح للانثي جيب أو كيس بتشيل فيه أطفالها اللي بيتولدوا غير مكتملي النمو
- أها تمام أوصف للناس شكلك كده
-- أنا لو شوفتني حتعرفني علطول عندي أرجل خلفية كبيرة بعضلات قوية جدا و ديل طويل و فيه عضلات برضه قوية جدا و راسي صغره نسبيا بالنسبة لجسمي و بتمتع بحاسة سمع قوية بفضل ودني الكبيرة غير حاسة الشم اللي متقلش قوة عن حاسة السمع عندي, و جسمي كله متغطي لفرو زي بتاع الجمل كده.
- تمام بس ليه رجلك قوية مصممة بالطريقة ديه أنت بتلعب سكوات؟
-- حاجة زي كده انا من الحيوانات اللي بتمشي علي رجلين بس و مش بنمشي أحنا بنط فلازم تكون قوية عشان تتحمل وزن جسمنا
- فعلا انا اسمع ان قفزتك بتوصل ل5 متر أثناء الجري و ممكن ترفع جسمك أفقي 2.5 متر 

-- ده حقيقي غير ان سرعتي بتوصل لأكتر من 70 كم/ساعة
- ما شاء الله ايه مركب تربو و ايه دول ديلك في القصة ديه؟

-- ديلي بستفيد منه في التوازن أثناء القفز غير انه يقدر يشيل وزن جسمي كله في الحالة الدفاع عن النفس برتكز عليه و بالشلاليت بقي مقولكش
- عنيف و غبي يا كوكي من يومك أنت مفتري يا عم و مستضخم نفسك.
-- شوية انا طولي ممكن في أنواع معينة يوصل ل 2.5 متر و الأنواع ديه قفزتها بتبقي أكبر كمان فيه حالات فردية سجلت قفزة حتي 10 متر أثناء الركض.

- 2.5 متر ليه ولاد أبو اسماعيل ايه الافترا ده علي كده كلكوا كده ولا فيه منكوا احجام.

-- لا في اكتر من 50 نوع من الكناغر و في أنواع بتبقي صغيرة مبتعديش ال30سم و فيه أنواع عندها مخالب و ببتسلق الشجر كمان

- بالجسم الضخم ده انت علي كده حيوان مفترس

-- لا خالص بالرغم اني عدواني حبيتين الا ان معظم اكلي عشب و فاكهة و خضار و حشرات ان لزم الأمر انا كائن زاهد وراضي بقليلي.

- يا رجل عدواني حبتين دنتا بتنط من فوق السور و بتخش تاكل الخضار بتاع المزارعين و اللي يتعرضلك بتديله شلوت تطيره و محدش بيعرف يكلمك

-- أكل العيش يا صاحبي ثم هما واخدين ارضي اللي كنت باكل من خيرها و عملوها مزارع أموت من الجوع يعني؟؟!

- متمثلش انت بتستسهل عشان متمتع بحصانة خاصة و ممنوع اذيتك في استراليا بأمر القانون مقضيها بلطجة

-- هههههه فعلا محدش يقدر يكلمني بحكم القانون والا يتسجن و بتغرم بس ده بعد ما قربت أبقي معرض للانقراض بسبب أن السكان كانوا بصطادوني و يكلوني مفكرني أرنب الأغبية لحد ما كانوا حيخلصوا عليا و نظرا لأني حيوان فريد و مفيش مني غير في استراليا الا اعداد قليلة فأستراليا وخداني شعار للدولة عايز الشعار ينقرض.

-لا معاك حق دنتا تفيم عربيتك و تعدي من اي لجنة مستريح علي كده.

-- عيب عليك محسوبك مسيطر و بعدين الدولة بتعوض المتضررين و بعد ما كنت معرض للأنقراض بقي موجود مني 50 الف في استراليا لوحدها  ايتس وين وين يا صاحبي

- عاش انت كنت بتقولي في منك انواع قولنا حبه منهم كده

-- بص يا نجم عندك الكنغر الأحمر و الرمادي دول بيبقي حجمهم كبير وفيه جرذ الكنغر أو اللوب ده بيبقي حاجة اوزي كده زي ما قولتلك.

- نسيبنا شوية من الغباوة و نلمس الجانب الكيوت اللي في حياتك كطفل

-- انا طفولتي بتبدأ بعد 90 يوم من الحمل بتولد في موسم المطر و ممكن ماما تبقي حامل فيا كبيضة مخصبة لمدة شهرين من غير ما اكبر لحد ما الجو يبقي رطب و مناسب لنموي

- و ايه اللي بيحصل بعد ال90 يوم يا بيضة

-- بتولد و هنا بتدأ رحلة الكفاح بزحف بنفسي لحد ما اتقلب جوه الكيس بتاع ماما بيحتويني و بيتوفرلي جواه الغذاء من الرضاعة و بتحافظ عليا امي من الجو و الخيوانات المفترسة لمدة توصل ل9 شهور مبخرجش غير في اخرهم اتنطط شوية و ارجع انط جوه تاني

- ده شكلك و انت صغنن سو كيوت طب و لو الام خلفت تؤام

-- واحد منهم هو اللي بيقعد جوه و التاني بيموت و لو الام حست بالخطر بترمي الكنغر من الكيس و تجري

- دنتوا عيلة واطية كلكوا بقي راضعين وطينة

-- حاجة زي كده

- طب انت نورتنا و الله يا كوكي و مبسوط ان انا شفتك 

-- منورك صيامي كده ولا حتبأجني ولا شكلي حتخانق

- لا يا عم و الله ادوا كوكي فلوسه كاملة يا جدعان ده غبي و بيشلت بسرعة بس عشان بدأ يتعصب اشوفك عالقهوة بليل بقي يا كوكي حبيبي.

هنا خلصت حلقتنا كان معكم #AK_TRex مراسل #TRex_Magazine من أحد شواطئ سيدني بأستراليا.

Written by: Amr Khaled - T.Rex

#Ak_TRex

#TRex_Magazine