الناجحين بيعملوا ايه الصبح?!

الناجحين بيعملوا ايه الصبح?!

سواء كنت من الأشخاص اللي بتحب الصبح و بتنشط فيه او كائن ليلي باتماني بتنشط في الليل سواء كنت بتدرس أو بتشتغل أو عايز تقضي مصلحة فأنت مضطر تتعامل مع الصبح بشكل أو بآخر. الصبح بيمثل هنا بداية يومك و اللي عليه حتترتب كل حاجة بعد كده و ده الدراسات اثبتته ان معظم الناس بتعتقد أن اليوم اللي بيبدأ بداية سيئة بيكر وراه أحداث ما يعلم بيها الا ربنا و ده حقيقي نسبيا بس ايمانك بالفكرة هو اللي بيجذب الأحداث السيئة لأن حتلاقي ان معظم الأحداث ديه نابعة من تصرفاتكواللي مبرمجة مسبقا أن ده حيبقي يوم سئ أو يوم تلات مثلا!

اللي الدراسات بتقوله برضه أن ده ممكن يتغير بمجرد ما تتبع شوية عادات أثبتت الأحصائيات أن معظم الشخصيات البارزة و الناجحة علي كوكبنا  بيقوموا بيها الصبح عشان طلعة اليوم تظبط معاهم و بالتالي اليوم يظبط مش معني كده ان مش حتجيلهم مشاكل لا حتجيلهم تحديات اليوم العادية بس حيعرفوا يهندلوها لأنهم عرفوا يبدأوا يومهم صح.

ايه هي العادات الصباحية اليومية المشتركة بين الأشخاص الناجحين بقي?!

في 10 عادات يومية دايما بيتكرروا في كل أنترفيو مع شخصية ناجحة وفقا لمجلة Forbes و هم كالتالي:

1-أصحي بدري ساعة.

أول حاجة غلط كتير من الناس بتقع فيها انها تقول من النوم تنط في لبسها في 5 دقايق تكون جاهزة و نازلة و هي لسه مش مترجمة الدنيا أصلا و ده بيخلي الواحد عامل زي الزومبي صاحي و ماشي في الشارع بس السوفت وير بعافية شوية مبلم مش فاهم حاجة. لما بتصحي بدري ساعة بيكون عندك وقت تبدأ يومك بداية كويسة و تعمل أنشطة حتساعدك فيما بعد انك تنجو بيومك.حتي في مقولة بتقول أن الصحيان ساعة بدري بيخلي اليوم 25 ساعة مش 24.

2-أخرج يومك.
تخيل يومك المفروض يبقي ماشي ازاي وفقا للحاجات اللي عارف أنها وراك و ايه اولوية كل حاجة ساعتها حتبقي عارف في هدوء كده انت المفروض تعمل ايه و سيناريو المشاكل اللي حتقابلك فحتكون جاهز أكتر سواء بحلول أو جاهز لمواجهتها لأنك متوقعها أكنك عشت اليوم ده قبل كده.

3-أفطر.
وجبة الفطار مهمة جدا لصحتك الذهنية و الجسدية مع ان كتير مننا بيهملها و بيتجه للكافيين علطول و مبيلحقش يفطر او بيفطر بعدين و ده بيسبب خلل في وظايف دماغك و جسمك و بيخليك متوتر و بيبوظ حرق السعرات في جسمك مبقولش متضربش نسكافيهك بس أفطر معاه ولو سندوتش صغير أحفظها كده الكافيين الصبح بيطلب معاه أكل.

4-أركن الخازوق علي جنب.
كل واحد مننا في خازوق في حياته لما بيفتكره بيكتأب الخازوق ده عادتا مبيبقاش ليه حل دلوقت او بيبقي مزمن فتركيزك فيه مش بس حيضيعلك طلعة الصبح لا انت كده بتقفل اليوم بدري بدري و قابل سواد بقي الدنيا مش حتقف تستناك تحل مشكلتك ولا حتسمي عليك ولا حتلاقي حد يطبطب أركن علي جنب حل بقية مشاكلك و المشكلة الكبيرة ديه حيجيلها و قتها في اليوم كده كده بس بلاش أول ما تصحي الله يرضي عليك.

5-أفتكر الحافز بتاعك.
حلم نفسك تحققه حاجة نفسك تشتريها كلية و عايز تخلص منها و تشوف مستقبلك ضحكة علي وجه زوجتك ولادك و والدك و والدتك فسحة ولاسفرية اي حاجة تخليك لما تفتكرها تقدر تعافر عشان توصلها.

6-رياضة الصبح.
مش لازم تنزل تجري يعني او تعوم شوية  لا شوية كاريدو تفي بالغرض يا عم ألعب شوية ضغط و عقلة و سترتشات. الرياضة بتعزز ثقة الواحد في نفسه و بتقلل التوتر و بتعلي التركيز و تحسن المود لبقية اليوم روتين أحمائات مش حياخد منك أكتر من ربع ساعة و حيبقي تآثيره سحري.

7-حضر سناك ليومك.
الموضوع ده حيفيدك فوق ما تتخيل لانه حيخصلك من مشكلتين سؤال حناكل ايه بتاع بريك الساعة 1 و اللي بنبدأ نسأله من الساعة 10 تقريبا وده بيضيع وقت و بيشتت الذهن المشكلة التانية أن ايا كان اللي حتجيبه حيبقي زبالة و بيضر جسمك بشكل أو بآخر لانها حترسي علي جنك فوود في الآخر.

8-نضف و أرمي.
مش قوم روق و شغل المكنسة كده انت حتطرد من البيت لا نضف مكتبك الديسكتوب بتاعك روقه و ارمي الملفات اللي مش عايزها احذف الملفات اللي مش محتاجها او الايميلات الغير مفيدة ده كله حيديك احساس بالتجديد و انك بتعمل فريش ستارت.

9-خمسة هدوء.
أدي لنفسك شوية كده أقعد فيهم علي كرسي مريح متمددش عشان حتنام عن تجربه 😂 بس عارف كده أهدي و قول هديت و متفكرش في ولا حاجة لمدة 5 دقايق أعمل pause و أرجع تاني.

10-نام بدري.
ما هو انت مش حتصحي ساعة بدري و أنت نايم متأخر اصلا ده افترا و جسمك حيدفعك تمنه نام عدد ساعات معقول المتوسط 6 ساعات فيه ناس بتحتاج اكتر ساعة اقل ساعة شوف أنت مين فيهم و ظبط مواعيد نومك علي كده عشان دماغك تعالج كل الأحداث اللي يومك مر بيها وتقدر تبدأ يوم جديد.

حاجة زيادة من عندي علي ال10 بتوع فوربس أسقي الزرع بتاعك او لو عندك قطة او كلب أكلهم الموضوع ده بيدي جرعة سعادة كده تقدر تمشيك شوية في يومك.
أقرا اي حاجة اي حاجة كتاب رواية أقرالك مقال من T.Rex Magazine مثلا 😂 حاجة زي بيقولوا كده تداعب دماغك و تخليك تفووق.
مش لازم تعمل العادات ديه كلها مع بعض ممكن تعمل واحدة او اتنين بشكل مبدأي او تختار منهم شوية يبقوا روتين الصباح الخاص بيك اللي ايا يكن هو ايه حيبقي احسن من انك تظبط 10 منبهات و تصحي علي اخر واحد تجري عشان تلحق اللي وراك و تبوظ كل حاجة معاك في السكة و تخرب يومك.أنا عن نفسي لقيت أن عندي نقط في يومي لازم تتحل و أنا بكتب المقال ده قولنا أنت بتعمل ايه و مبتعملش أيه من العادات ديه.
كان معكم #AK_TRex  من مركز #TRex_Magazine لتطوير الذات و تجارة الأفكار.

Written by: Amr Khaled- T.Rex

#AK_TRex