سلسلة تعرف - البرص

سلسلة تعرف - البرص 


بتهيالي ده تاني اسوأ كابوس بعد انك تشوف فار في البيت يمكن عشان شكله عامل زي السحلية او بيجري بسرعة و حركته غير متوقعة بيخلي كل اللي في البيت بيصوتوا او لان لو شوفته في المطبخ عندك ارمي اي اكل مكشوف لانك مش حتعرف هو مشي عليه ولا لا 😭 وجوده في البيت هو كارثة بيئية بكل المقاييس. بالرغم من اني بدأت اتعاطف معاه بعد ما بدأت اتفرج علي Oscar oasis اللي لو عارفينه تبقوا عمد 😂.


تعرف ان حيوان السلمندر او البرص الأسطورة بتقول ان البرص مبيتحرقش او النار مبتأثرش فيه ليه تنين ولا تايجيرين ما علينا حوضحلكوا حقيقة الموضوع ده و رأي الشخصي في الآخر.
البرص اللي بيتضرب بالشبشب ده بيعتبر حلقة الوصل بين الفقاريات واللافقاريات حيوان برمائي و بري ساعات و مائي ساعات تاريخه بيرجع للعصر الجوراسي و تكوين اعضائه الداخليه بدائي الي حد ما زي ما تقول كده كان مرحلة تطور كائن ووقفت في النص.
انا كنت مأجل الموضوع ده لحدما  امسك البرص اللي عندي في البلكونة بس لانه ديما بيستخبي وسط الزرع معرفتش امسكه علي قيد الحياة بس و هو بيفرفر اعترفلي بكل حاجة.

- اسمك و سنك و عنوانك
- تقدر تقولي الوزغ او البرص سني مش مهم لانها مش بالسن يا شبح اما لو بتسأل عن عنواني فأنا ساكن هنا من قبل الزرع بتاعك لا انا اقدم من زرع بلدك كله.
- أنت وزغ فعلا بصلي و انا بكلمك مش ندمان انك حولت البلكونة اللي كنت بشرب فيها الشاي لمكان مهجور كل اللي في البيت خايفين يخشوه
- لا
- رد عليا
- قلتلك لااا انت حتكفرني عشان مسكتني
- مسكتك مرة واحدة ديه رابع مرة امسكك كل مرة تسيبلي ديلك و تجري بتتمهزق بيا
- انت اللي خبؤ عملتها فيك اول مرة بتقع فيها تاني ليه مش بس انت انت وكل الناس تضرب ولا كانها ماسكه حرامي و اسيبلهم الديل و اجري مش بس الديل علي فكرة انا ربنا واهبني قدرة انه اسيب اي طرف من اطراف جسمي و بيتجدد تاني.
-سبحان الله مع اني مش مستظرفك شخصيا بس احكلنا حكايتك من ساعة ما اتولدت.
- هات بوق ميه طيب
- لا انت مش ممسوك في قهوة خلص
- طيب , انا مبدأيا كده زي مانت شايف كده شبه السحليه بس انا مبتولدش كده تكنيكالي انا بخرج من البيضة مبدأيا انا و اكتر من 500 واحد زي من ام واحدة البيض في معظم الوقت بيفقس في مكان رطب في بركة او اي مكان في ميه عشان كده بيبقي عندي خياشيم و بعرف اعوم كويس زي الضفادع في بداية حياتها كده.
سبحان الله يعني انت بداية وجودك بتبقي زي السمكة?
- حاجة زي كده بس تقدر تقول ان ده مبيستمرش كتير اسابيع و بتخلص من الشكل ده و بخرج ارازي فيكوا عالبر عادي الا انواع قليلة بتكمل بخياشيم و تفضل في الميه و ده اسمه السلمندر المائي.
- ايه موضوع جلدك ده و هل انت فعلا معندكش رئه
- تقدر تقول مش في كل الانواع انا عندي رئه بسيطه جدا في تكوينها بتتطور من الخياشيم بتاعتي اما الانواع التانيه بتتنفس من جلدها زي ورق الشجر كده مش ده بس الغريب انا دايما برطب جلدي بافرازات معينة عشان جلدي مينشفش الافرازات ديه في بعض الانواع بتكون سامة في بعض الاحيان و بتغطي كل جسمي كمان بتساعدنا في المشي اني افضل لازق في الحيطة او عالسقف
- لا ثواني بس مش ده السبب الوحيد اللي اعرفه ان رجلك نفسها مصممة سبحان الخالق بطريقة كده زي شرايح بتخليك ماسك في الحيطة لدرجة ان في علماء قلدوا التصميم ده و استفادوا منه.

- فعلا انا قدرتي علي المسك في الاسطح المختلفة الهمت العلماء عشان يطوروا ميكانيزمات لصق تفيدهم في التجميع السريع و تركيب الحاجات في بعضها.
- انت بتاكل ايه طيب?
- فضلت خيرك شوية دبان علي اي حشرة معدية اللي الناس متعرفوش اني بطلع لساني زي الضفدعة و اصطاد بيه.
- طب سؤال آخير قبل ما تودع ايه حكاية ان النار مبتآثرش فيك ده انت حاوي
- يا عم ولا حاوي ولا بتاع ديه ناس متخلفة انا افهمك انا بعشش في جزوع الشجر عشان بتحميني من الشمس فمرة الشجر ده ولع لقوني خارج منها قالك بص سلمندر ناري اهو و لزقت فيا السمعة ديه بقي

- طب اقولك انا وجة نظري
- لا مش طالبة هري انا هموت احسن وسع كده
زووووووو ضحكت عليك تاني
- !!!!!!!!!!!! 😓😓😓😓😓😓
لحد ما استوعب اللي ابن الجزمة ده عمله فيا تاني
حقولكوا شوية حقايق

- فيه اكتر من 500 نوع سلمندر علي مستوي العالم
- بيتم دراسة السلمندر بشكل كبير و قدرته علي تجديد اطرافه لان من وجهة نظر العلماء ان ممكن تطوير القدرة ديه بحيث انها تكون مناسبة للبشر.
- الشريط اللازق اللي شبه رجل السلمندر يقدر يسحب عربية ربع نقل بمجرد لزقه زي السلوتب 😨.
- البرص لو مشي علي الاكل بيتلوث و ممكن يجيب امراض او يموت لو حد تناول الاكل ده لو كان سام.
بعض الابراص ممكن يوصل طولها لمتر و نص الحمد لله الانواع ديه مش عندنا 🙏.

- من وجهة نظري البرص مش حيتحرق لو جري بسرعة في النار لان جسمه مترطب علطول اكن ايدك مبلولة او عرقانة و مشيتها عالنار بسرعة الحرارة حتمتص اثناء تبخير السائل قبل ما تحرق ايدك و بتعزل ايدك عن مصدر الحرارة.
-لو قولت للبرص صاحب البيت اسمه محمد حيرد عليك و حيقولك عاشت الاسامي و لو جري ده لانه خايف منك يا متخلف 😂.
بس كفاية كده انزل بالتتر
كان معكم #TRex_Magazine من موقعة البلكونة
#تعرف

التعليقات
0 التعليقات