زخات الشهب الأكبر منذ 96 عام.
ايه هو الشهاب?الشهاب هو الشكل اللي بنشوفه لما صخور من الفضاء بتخترق الغلاف الجوي للارض. و بسبب سرعتها و احتكاكها بالغلاف الجوي بتتحرق و بتكون الضوء اللي بنشوفه في السما ده مبيوصلش منها للارض الا الغبار الناتج عن احتراقها اما لو الصخور ديه وصلت للارض ايا كان حجمها بتسمي حجر نيزكي مش شهاب.
زخات الشهب بقي ان مجموعة صخور مصدرها مخلفات مذنب بتتعارض مع مسار كوكب الارض او بتقع فريسة لجاذبية الكوكب و بالتالي بتدخل تباعا فتبان كمجموعة شهب مع بعض او ورا بعض و ده بيبقي منظر من المظاهر البديعة جدا لان السما بتنور و كأنها العاب نارية.
اللي بيحصل من يوم الخميس و نهايته النهاردة للأسف بقي مصدره مذنب اسمه سويفت" Swift Tuttle" وفقا لمصدر في هيئة البحوث الفلكية و اللي قال ان كثافة الشهب حتوصل لاكتر من 100 شهاب في الساعة و ده بيعتبر اكبر كثافة لزخات الشهب من فترة كبيرة.
وعن سبب تسميتها بشهب البرشاويات لانها بتظهر من نقطة واحدة في السما و هي موقع كوكبة برشاوس او "حامل رأس الغول" و بتظهر و كانها طالعة من وسط الكوكبة.
طب يعني لازم تلسكوب عشان اشوف الكلام ده?!
لا الشهب ممكن يتم رصدها بالعين المجردة بدون اي ادوات بس لانها بتظهر فجآة و لفترة بسيطة محتاجة شوية صبر و تروح مكان بعيد عن المدينة و الضوضاء الضوئية و ميكونش فيه اي مصدر اضاءة قوي قريب منك يعني مثلا لو كنت علي شاطئ او مخيم في الصحرا حاول تبقي بعيد عن النار او ايا كان مصدر الضوء.القمر في طور الأحدب و ده حيشوشر شوية علي رؤية الشهب كل ما تقرب من منتصف الليل حيكون القمر في ابعد نقطة و بالتالي ضوئه حيقل و ده حيزود فرصتك للرصد.
المنظر بيبقي ساحر فعلا و مش حتندم انك استنيت تشوفه النهاردة اخر يوم الحق نفسك 😃.
كان معكم #TRex_Magazine من علي ظهر المذنب.
0 التعليقات