سلسلة تعرف - الذبابة الملعونة

الذبابة الملعونة

مستمعينا هابي ويك اند أخيرا انقضي ثلث عام اغسطس. وزي ما كان اسبوع طويل و رخم احنا قررنا نكمل عليكوا و نستضيف ضيف أرخم 😂.

-أهلا😏
-- اهلا بيك، مكان فخم الاستوديو بتاعك لا صارف.
-ما انت كائن قذر بتاكل و تتغذي عالروث و الزبالة العضوية و الجيفة اي خرابة بالنسبالك حتبقي مكان فخم.
-- خرابة ياااااه فكرتني و الله بالاماكن الحلوة الواحد عايز يغير جو في الكام يوم اللي فاضلينله بس سؤال انت مين و عايز ايه?!
- تيريكس .... الانترفيو ..... الاستوديو .....
-- مش فاكر.
- صاعق الحشرات....
-- اه اه افتكرت خلاص حقول علي كل حاجة
- ايوه كده اعدلي انت ليه بتتلمي علي المخلفات بالذات
-- سببين اولا ده اكل عيشي و مصدر غذائي انا معنديش معده بفرز ماده علي المواد العضوية بحللها و بمتصها بانبوب ربنا خالقني بيه شاليموه رباني.
- بس مش ده السبب الوحيد اللي اعرفه انك اصلا بتحط البيوض بتاعتك في الروث و المخلفات و احيانا في الاكل عشان اطفالك يلاقوا حاجة ياكلوها.

-- أنت مين ووعايز ايه?!
- ام ده سؤال هاتلي الصاعق يا أبني.
-- لا لا فعلا معاك حق انا بعمل كده و الصراحة يا سعادة البيه انا بنقل كل انواع الامراض و الميكروبات اللي ممكن تتخيلها و لو وقف علي حاجة تتاكل ارميني أحسن لصحتك. فكرة انك لو وقعت في حاجة تغطسني فيها علميا قابلة للتحقق و فقا لفريق أبحاث من أستراليا  و اللي دراساته كانت واعدة انهم حيقدروا يوصلوا لمضادات جديدة للبكتريا مني بس انت و نفسك بقي.
- سبحان الله بس هو انا ارميها عشان تروحي تاكليها اسلوب رخيص. مش كفايه رخمة لا و بتجيبي امراض بتبتدي من الاسهال و الام المعدة و لحد امراض خطيرة زي مرض النوم.
-- لا يا بيه ديه ذبابة التسي تسي أنا ذبابة منزلية علي باب الله.
- هو انتوا فيه منكم انواع ?
-- يوه متعدش يا بيه الاف الالاف و بنعيش في كل حته خلقها ربنا ما عدا القطبين عشان مبنحبش البرد.
بس تقدر تعرف شوية انواع مثلا الاسود زي حلاتي ده ذباب منزلي .المصفر و اصغر شوية ديه ذبابة الفاكهة و ديه بتدمر الفاكهة و تبهدل الشجر. و فيه الخضرة دية دموية شوية بتتلم عالدبايح و بتشدها ريحة الدم. و اللهم أحفظنا الزرقة و ديه بتبقي موجودة في المقابر لانها بتتغذي عالجيفة و اي حاجة ميتة. و أنواع تانية كتير.

ألا يا بيه لا مؤاخذة أنت مين و عايز ايه?!
- نهار أسود خدي رشة الريد ديه عشان تنشطلك ذاكرتك.
-- خلاص كفاية حموت. دنا لسالي 6 أيام.
- علي أيه?
-- 6 ايام و اموت اصل انا متوسط عمري 21 يوم بعد ما بفقس من البيض ببقي دودة في الاول و بعدين جلدي بينشف بيعمل شرنقة زي بتاعة الفراشة كده  ممكن تقعد بالشهور لو الجو برد عشان كده مبتشوفوناش في الشتا كتير. بس اول ما الجو بيحرر بخرج من الشرنقة و ابقي ذبابة في طور اسمه العزراء و بعد كام يوم و في انواع بقدر اتجوز علطول و في انواع بعد 36 ساعة بتنضج اصلي مستعجلة اوي💃. بس ببيض في المرة حوالي متوسط 150 بيضة بحمل في المرة 4ايام قبل وضع البيض و اعيد الموضوع تاني العمر مفيهوش كتير ولازم انبسط.
-يا رخيصة.
-- انت ازاي تكلمني بالأسلوب ده أنت مين و عايز ايه?!
- رشة كمان . نصحصح مع بعض و نفوق من ام الزهايمر ده بدماغك الصغيرة و ذاكرتك اللي مبتكملش 5 ثواني ديه.
-- انا دماغي ونت من البتاع اللي انت رشيته ده ده أكس. انت عارف انك لو عايز تضربني بايدك حتبقي معركة خسرانة لأن بالست عيون بتوعي و اللي بيتقسموا جوه لألاف العدسات بقدر اشوف بقوة عالية و ده بالتزامن من تحريك جناحي بسرعة الف رفرفة في الثانية مما ينعكس علي قدرتي علي المناورة في الهواء و التحكم في انسياب المائع بسرعة فائقة.

- خلاص حتعملي فيها خبيره ايروديناميكس.
-- ايه الايرو ديناميكس ديه ثم انت مين و عايز ايه?
انا عايزة امشي بس مش عارفة احرك جناحي انت شربتني حاجة اصفرة.
- لا أنا جبت أخري انت مش فاكرة طبعا ايه اللي حصل او انت مش عارفة تطيري انت دخلتي صاعق الحشرات ده من نص ساعة عشان بتنجذبي للضوء خاصتا الاشعة فوق بنفسجية. بس انت ممتيش اتشليتي بس لاني طفيته بعد اول طرقعة. و بعد ما خدت المعلومات اللي انا عايزها حشغله بعد ما أعد واحد اتنين ...ثل.
-- استني انت مين و عايز ايه?!
-😠😠😠😡😡😡⚡⚡⚡⚡⚡💥 ⚡⚡⚡⚡💥 💥⚡⚡⚡⚡⚡💥💥💥
 كان معكم #TRex_Magazine من أمام أعظم آله اخترعها البشرية بعد التكييف انجوي يور ويك اند.

التعليقات
0 التعليقات