العلوم الهامشية - السفر عبر الزمن - الحلقة 2
كنا اتكلمنا في الحلقة الاولي "السفر عبر الزمن" من الموضوع ده عن فلسفة السفر عبر الزمن و امكانية حدوثه من عدمه.وصلنا في النهاية ل3 فروض:
1-ان الزمن مش ماشي في خط واحد زي شريط القطر لا ده كل أحداثه بتحصل في الوقت نفسه.
2-في عدد لانهائي من الأكوان الموازية بتتولد مع كل انسان بياخد قرار بيخلي الواقع يتشكل بطريقة مختلفة.
3-ان السفر في الزمن للماضي و العبث فيه بالمعلومات اللي انت عارفها مش حيغير حاجة في المستقبل اللي انت جي منه بسبب انك في واقع موازي تاني و كذلك اللي انت تعرفه مش شرط كله يتحقق لان وجودك حيطلق سلسلة من الاحداث محدش يقدر يتوقع تأثيرها علي الخط الزمني اللي بقيت فيه ده .
و بكده تخطينا فكرة اشكالية السفر عبر الزمن للماضي فلسفيا عشان نقضي علي معضلة لو رجعت بالزمن و قتلت نفسي و أنا صغير.
السفر عبر الزمن بينقسم لشقين:
1-السفر عبر الزمن للمستقبل.
2-السفر عبر الزمن للماضي.
حتي الآن فيه خمس طرق للسفر بالزمن منهم آخر اتنين نظريا شغالين في المستقبل و كمان للماضي.
حنبدأ بالجزء السهل و هو السفر عبر الزمن للمستقبل لأنه علميا هو ممكن نظريا و عمليا نتائج التجارب واعدة جدا و ليها مستقبل.
1-التباطوء بالزمن : اثبتت النظرية النسبية لأينشتين ان الزمن مش ثابت من ثوابت الكون وانه متغير من متغيرات الكون و أن كل ما يتزيد سرعة الجسم و بتوصل لسرعة الضوء بيتباطأ الزمن بالنسبة له.
أثبت العلماء ده عمليا بتجربة معروفة بأسم مفارقة التؤام "Twin paradox" ببساطة جابو تؤام متماثل صفاتهم البدنية شبه متطابقة و بعتوا واحد منهم محطة الفضاء الدولية لمدة 11 شهر كان الاتنين فيهم خاضعين للمراقبة عايشين بطريقة شبه مماثله ماشيين علي نفس النظام الغذائي حاولوا ان كل المتغيرات تبقي متماثلة الا متغير واحد السرعة محطة الفضاء الدولية ISS بتدور حول الأرض بسرعة 7.66 كم/ث بينما سرعة دوران الأرض 0.456 كم/ث و ده معناه ان اللشخص اللي في المحطة الدولية ISS حيعيش الوقت بشكل ابطأ مت تؤامه اللي علي الأرض و قد كان ثبت علميا بعد رجوع الاخ ان الكلام ده صحيح و ان مش بس ساعات محطة الفضاء هي اللي بأخر لا ده اي جسم علي متنها حيعيش الوقت بشكل ابطأ و ديه سرعة قليلة نسبيا لما نقارنها بسرعة الضوء 3000000 كم/ث تخيل لو في جسم قرب من السرعة ديه الزمن بالنسبالة حيعدي ازاي??!!!
2-الجاذبية:
وفقا للنسبية برضه عم أينشتين ده كان راجل عجيب 😂 نسبية الزمن مرتبطة ارتباط وثيق بالجاذبية بمعني كل مالجاذبية تزيد يحصل تباطؤ نسبي في الزمن. طب نلاقي فين جاذبية كبيرة?
في الثقوب السوداء و لو متعرفش يعني ايه ثقب اسود فباختصار هو جسم كتلته مهوله بينتج من انهيار نجم او استنفاذه لوقوده كليا الامر اللي بيخليه كتله مهولة في حجم صغير جدا مقارنتا بحجم النجم و عليه بتنتج جاذبية قوية حتي فوتونات الضوء مبتقدرش تهرب منها وعشان كده اتسمي ثقب أسود. و ده اللي قام عليه فيلم Interstellar لو شفته و جودهم علي كوكب قريب من ثقب أسود خلي الزمن بالنسبالهم بيتباطأ لدرجة ان الدقيقة كانت ب7 سنين برا الكوكب ده. بس تجربة ده مستحيل حاليا لأن اقرب ثقب اسود لينا بيبعد 3000 سنة ضوئية عننا و معندناش التقنية اللي توصلنا ليه عشان نثبت صحة النظرية ديهّ.
3-حالة السبات العميق:
مستوحاة من فكرة البات الشتوي عند الكائنات و ان ده ممكن يساعدنا في التغلب علي المسافات الكبيرة لرحلات الفضاء و كذلك يمكن تطبيقه علي الزمن, حالة السبات بتتم بتبطئ المؤشرات الحيوية للجسم الامر اللي يخلي الوقت يعدي ببطء بالنسبة للجسم و كنا اتكلمنا عن كائن اسم دب الماء بيعمل الموضوع ده و ان العلماء بيحاولوا يحقنوا رواد الفضاء بمواد و يقللوا حرارة جسمهم عشان يدخلوا في حالة شبه النوم يخليهم يناموا مدة كبيرة. بنفس الكيفية ممكن يناموا عدد سنين كبير في حجرات مخصصة و لما يفوقوا من حالة الثبات حيبقوا صغيرين في السن مقارنة بكل اللي حواليهم.
4-دوامة الضوء:
الطريقة ديه كنت سمعتها من العالم اللي فرض الفرضية ديه في احد برامج ناشيونال جيوجرافيك هو كان بيحاول يعمل حاجة اسمها دوامة الضوء باستخدام اشعة الليزر يخلي الاشعة تداخل بطريقة معينة بحيث انها تولد تشوه في الزمكان يقدر يوصل منه لحاجة اسمها نقطة التفرد او ال Singularity و ديه حجر الفيلسوف بتاعة علم الفيزياء لأنها نقطة بتتلاشي فيها كل قوانين الفيزياء حتي الخاصة بالزمن فكأنك في مكان خارج نطاق الزمان و المكان فتقدر تسافر براحتك اي زمان و اي مكان و تعمل اللي انت عايزه. متستصعبش فكرة الSingularity لأن وفقا لستيفن هوكينج هي موجودة في قلب الثقوب السوداء بالفعل بس مفيش اي اثبات عملي علي وجودها حتي ان في البعض في مجتمع الفيزياء بيعتبرها فيري تيل.
5-الثقب الدودي:
الثقب الدودي او مايعرف بجسر اينشتين- روزن هي ممرات كونية بتنتج من دوران الثقب الاسود محدثة اضطراب في نسيج الزمكان و اتصال نقط ببعضها بمعني تكون جسور بين نقط في المكان بتفصلها مسافات مهولة او نقط في الزمن الامر اللي يخليك ممكن تنتقل من نقطة للتانية في الزمن عن طريق الجسر. العوائق ان جاذبية الثقب الاسود كفيلة بسحق اي جسم يدخل فيه و ده نظريا طبعا علي اساس ان مفيش Singularity أما الفرض التاني انك لو استخدمت الجسر رايح جي كل مرة حتبقي في واقع مختلف حتي لو في نفس التوقيت بس هل لو استخدمته للانتقال من مكان للتاني حينطبق نفس الكلام ممممممممممم أنا دماغي لفت مني أقسم بالله 😂😂😂😂😂😂😂😂😂.
التحكم في الزمن و التنقل فيه خاصية استأثر بيها ربنا عز و جل ذاته بس سبحانة و تعالي أمرنا بالتفكر و التدبر اللي دايما بيخلونا ندرك قد ايه احنا عاجزين قدام قدرته و عظمته.
كان معكم #TRex_Magazine من أحدي نقط ال Singularity الفيو من هنا يجنن.
Written by: Amr Khaled - T.Rex
#AK_TRex
#TRex_Magazine
0 التعليقات