قبلة الوداع - المسبار كاسيني

قبلة الوداع - المسبار كاسيني

قبلة الوداع ده أسم أخر مهمة للكاسيني Cassini–Huygens قبل أنتحاره المتعمد و المخطط له من فتره كبيرة
بس قبل ما نعرف ايه اللي دفع العلماء للتخطيط لجعل كاسيني ينتحر و ازاي ده حصل, حنستعرض مهمة المسبار كاسيني و نفهم هو اتبني و تم اطلاقه للفضاء ليه.

بدأت رحلة المسبار كاسيني لما وصل مداره حول كوكب زحل عام 2004 بعد ما قطع 3.5مليار كم. بتمويل من مختبر الدفع النفاسي JPL التابع لناسا ووكالة الفضاء الايطالية بتكلفة كلية 3.2 مليار دولار كان الهدف من مهمة كاسيني دراسة كوكب زحل وأقماره ال62 تم التركيز علي 7 منهم أبررزهم القمر تيتان تاني اكبر قمر لكوكب في المجموعة الشمسية بعد القمر جانيميد التابع لكوكب المشتري.

خلال رحلة كاسيني في جمع بيانات عن كوكب زحل و اقماره معتمدا علي 6 اجهزة استشعار و بطارية نووية قام بعدة اكتشافات ابرزهم كان
- أكتشاف محيط من المياه المتجمده تحت سطع القمر انسيلادوس طبعا احنا عارفين ان وجود المياه شرط اساسي لمقومات دعم الحياة الامر اللي يخلي القمر من الوجهات اللي ممكن نستعمرها مستقبلا.
-عن طريق هبوط المسبار الملحق هويجنز بالمظلات اكتشفوا ان القمر تيتان غلافه الجوي غني بالنيتروجين زي الارض و فيه شبكة انهار معقدة من مواد هيدروكربونية المعروفة بالمواد العضوية و منها الميثان وده بيخلي الدنيا هناك بتمطر ميثان و ده بيخليه علي خريطة الزيارات برضه.
-القمر تيتان بيدور بمحور مائل زي الارض و فيه الاربع فصول بتوع السنة بس الفصل الواحد بيستمر 7 سنين أرضية.

-فهم طبيعة كوكب زحل و دراسة المجال المغناطيسي بتاعه.
-دراسة حلقات كوكب زحل الشهيرة و دراسة ابعادها بدقة و ديه كان اخر حاجة عملها كاسيني انه اول جسم من صنع الانسان يدخل بين زحل و الحلقة بتاعته قبل قبل ما يدخل المجال الجوي لزحل مستغلا جاذبية تايتن اللي غير مساره و رماه في حضن زحل عشان يتحرق و هو داخل الغلاف الجوي نتيجة الاحتكاك و لحد اخر لحظة بث كاسيني للأرض صور رائعة لزحل و أنتهت رحلة كاسيني 15 سبتمبر 2017 بعد رحلة طويلة من العطاء أرقد بسلام يا أبو الكسانين.

سؤال بقي هما موتوا كاسيني ليه طالما كان شغال  زي التاكس?!!!!
سؤال كويس بوجود انظمة تدعم وجود الحياة ضمان دوران كاسيني حوالين اقمار زحل بسلام بدون اي حادث ممكن يؤدي لتلوث الأنظمة البكر ديه ببكتيريا من الارض و منعرفش البكتيريا ديه حتتصرف ازاي لأنها حتبقي دخيله علي النظام ده الامر اللي حيضعف احتماليه استعمار الآنطمه ديه مستقبلا.
كان معكم #TRex_Magazine من كوكب زحل.

Written by: Amr Khaled - T.Rex
#AK_TRex