طاقة الكتله الحية – Biomass - مقدمة

طاقة الكتله الحية – Biomass - مقدمة 

بسم الله الرحن الرحيم (( وَضَرَبَ لَنَا مَثَلا وَنَسِيَ خَلْقَهُ قَالَ مَنْ يُحْيِي الْعِظَامَ وَهِيَ رَمِيمٌ* قُلْ يُحْيِيهَا الَّذِي أَنشَأَهَا
أَوَّلَ مَرَّةٍ وَهُوَ بِكُلِّ خَلْقٍ عَلِيمٌ* الَّذِي جَعَلَ لَكُم مِّنَ الشَّجَرِ الأَخْضَرِ نَارًا فَإِذَا أَنتُم مِّنْهُ تُوقِدُونَ* أَوَلَيْسَ الَّذِي خَلَقَ 

السَّمَاوَاتِ وَالأَرْضَ بِقَادِرٍ عَلَى أَنْ يَخْلُقَ مِثْلَهُم بَلَى وَهُوَ الْخَلاَّقُ الْعَلِيمُ )) صدق الله العظيم 

ــــــــــــــــــــــــــــــــــــــــــــــــــــــــــــــــــــــــــــــ

اعاصير و فياضانات في كل مكان ....خلاص العالم بيسلم نمر 😲😱
كوارث طبيعيه في كل مكان وبتذيد كل فترة وده غير انقراض بعض الحيوانات والنباتات ....

---  بس ايه السبب ورا كل الكلام ده

-الاسباب كتير , ومن اهمها طبعا  الاحتباس الحراري و ثقب الاوزون ...(ممكن يكون في مقال مختلف عن المشاكل دي بالتفصيل )
واكيد شوفتوا فيلم Intersteller , انه في المستقبل وبقي مفيش اكل غيرالذرة  ..والحل ان انهم يدوروا علي كوكب تاني

وفيلم wall-e  لما الزباله ملت الارض وكان الحل الوحيد ان البشر يعيشوا في الفضاء

وفيلم Book of Eli  لما الغلاف الجوي ادمر والاوزون ادمر تماما  الشمس حرقت كل شئ والبشر بقو زي الحيوانات....

و افلام كتير وكتير ............اكيد الافلام دي مش جايبه الفكرة دي من الخيال ده للاسف واقع ....وللاسف بقي مالهوش حل !

زمان كان العالم بيدور علي حل للاحتباس الحراري ...بس حاليا  بيتمنوا انهم ميزودوش المشكلة عن الحد الموجود حاليا و نحاول نتعايش مع المشكلة وخلاص.

--- بس ايه هو الاحتباس الحراري  وماله ب موضوع المقال ده ؟؟

-من اهم اسباب الاحتباس الحراري هو التلوث الناتج عن حرق البنزين و الفحم ( او الوقود التقليدي زي السولار والديذل والغاز الطبيعي والبنزين و الفحم )

بسبب حرق الوقود  بينتج غازات سامة ..في منها  اللي بيضر الانسان او النبات مباشرة وفي منها اللي بسيبب مشاكل في الغلاف الجوي ...زي الباشا الكبير ثاني اكسيد الكربون CO2 اللي بيسبب الاحتباس الحراري ..و بسبب ده درجة حرارة الارض بتذيد

--- ازاي درجة حرارة الارض بتزيد ...وهتوصل لكام يعني ؟؟

-الاحتباس الحراري ببساطة شديدة ... ان الارض بتمتص حرارة من الشمس و بتخرج الحرارة الذيادة تاني للفضاء ...بس بسبب وجود طبقة من CO2 الارض بتمتص الحرارة ومبتعرفشي تتخلص من الحرارة الذيادة ....و بالتالي بتفضل الارض محتفظة بالحرارة ...و هكذا كل يوم نفس الكلام ...

ارتفاع درجة حرارة الارض درجة واحد بس بيسبب مشاكل كتير بيخلي القطب الشمالي يذوب و يسبب فيضانات , ويسبب اعاصير , بعض النباتات متقدرشي تعيش في جو دافي او حر زي ده ف تنقرض وده غير التصحر  وهكذا....وكل ده طبعاا بيضر الانسان ...

اذا درجة حرارة الارض ذادت 5 الي 6 درجات .... مش هيكون في ارض او جو صالح  اصلا علشان نعيش عليها  ...ف حاليا العالم يهدف ان درجة حرارة متذدشي عن درجتين ده الحد الاقصي اللي ممكن نتعامل معاه ...اكيد هيسبب مشاكل بس مفيش حل اصلا
 

--- طب والحل ..!!....هل هندور علي كوكب جديد نعيش عليه بجد

-لحد ما نلاقي كوكب تاني ...في حل بسيط نبطل نحرق وقود نبطل نتج غازات اللي بتسبب الاحتباس ....

--- اذاي ...؟؟.....وهل فجاءة كده هنوقف العربيات والطيارات ...هل في بديل ؟؟؟

-         ما اكيد مش فجاءة ...بالتدريج

لازم نستخدم الطاقة المتجددة زي طاقة الرياح او الطاقة الشمسية , وفي كمان طاقة الهيدرو(استغلال حركة المياه زي الامواج او المد او شلالات ) , و طاقة الحرارية من باطن الارض

--- جميل جدا ....وايه اللي موقفنا ؟؟

-العالم كله شغال في الموضوع ده ....والمانيا كمثال بقت معتمدة بشكل كبير علي طاقة الرياح و الشمسية لانتاج كهربا .....بس الفكرة ان التكنولوجيا دي غالية اوي ومتنفعشي في اي مكان ..لازم يتوافر في المكان بعض الشروط زي سرعة الهوا وشدته , او درجة حرارة الشمس , والفترة اللي بيتعرض ليها المكان للشمس , الموضوع كبير

بس برضو احنا عايزين وقود زي البنزين ....صعب تقارن عربية بالكهرباء مع عربية بنزين ....مفيش زي البنزين او الديزيل في الكفائة  .... حتي الطيارات اكيد مش هنعمل طيارة بالكهربا

طب اذا فشلنا خالص وعايزين نهج من الارض هنجيب منين وقود للصواريخ

--- خلاص نستخدم الوقود بس في الحاجات الكبيرة دي

-انا مقلتلكشي برضو البترول اصلا بيخلص ومش مكفي استهلاك البشر 😂 يعني لازم بديل عن البترول ك كل ( بديل للبنزين و بديل للديزيل و بديل للمازوت ....ده غيير مع نهاية البترول هتنتهي معاه صناعات كتير زي البلاستك والدهانات وهكذا (صناعات البتروكميائية )

--- ده الموضوع معقد اوي ومالهوش حل ...ده غير انك قلت ان في مشكلة الزباله اللي مش هنعرف نتخلص منها 

-ما الحل بقي  في  طاقة الكتلة الحية او Biomass بكل بساطة احنا هناخد الزباله نحولها ل بترول ونتج بقي ينزين وغاز طبيعي وحتي كمان مواد كميائية نستخدمها في الصناعات البتروكميائية   

وزي ما قلت في الاول الايات من سورة يس ... ربنا ذكر 3 ايات بيبين فيها عظمت خلقه ...ذكر خلق البشرفي الاول و في الثالثه ذكر خلق الكون وفي النص بينهم ذكر ان الشجر ممكن نخرج منه وقود .....ف اكيد الموضوع ده عظيم ومهم جداا 

--- ايه علاقة الشجر بالزباله ...ما معروفة من بداية البشرية اننا بنحرق الخشب من الاشجار لانتاج حرارة ....ايه المميز

-لا , الموضوع مش بسيط كده .....تعالي بقي اشرحلك بالتفصيل ايه العلاقة واذاي بنحول الزباله والمخلفات الي مواد تنفعنا .

ديه كانت مقدمة سريعة عن سبب أتجاه العلماء للبحث في موضوع طاقة الكتلة الحية أو بدائل الطاقة عموما هنتكلم مع بعض في المقال الجاي عن :

·        ايه هي  طاقة الكتله الحية...و ايه هي الزباله العلماء بيشوفوا الزباله اذاي  

·        هل هي طاقة نظيفة بجد ؟ هل هي طاقة متجددة زي طاقة الرياح  ؟ ولا هي حل موقت بس

·        ما هي مميزاتها عن باقي انواع الطاقات المتجددة , لماذا نلجاء اليها مع العلم انها ليس نظيفة وتسبب تلوث

انواع biomass technology  ...او كيفية تحويل المخلفات  الي طاقة ..

Written by: Mohamed Elmously

#M_Elmously

#TRex_Magazine