سلسلة تعرف - كلاش أوف ذا شبشب الصرصار

سلسلة تعرف - كلاش أوف ذا شبشب الصرصار

مستمعينا هابي ويك أند عليكوا و يا رب ديما  بخير و أحسن حا... ستوب ايه يا ابني الريحة ديه انا منبه كام مرة الأستوديو يتنضف كويس و ترش معطر؟
حضرتك أحنا راشيين معطر و الله بس ده الضيف جه عالبوابة و داخل الستوديو.
ضيف ضيف ايه اللي ريحته جايبه لحد هنا و بعدين .... ايه ده مين اللي قالكوا تجيبوه ده؟
ده الناس اللي طالباه يا فندم
هو انتم اي حاجة الناس تطلبها تلبسوهالي أنا ؟
اه و خلص عشان احنا هوا اصلا !

T-ممممم أتفضل أقعد . لا مبسلمش بالأيد علي ولاد أتفضل.😷
--مالك بس يا بشمهندس شادد حيلك علينا ليه ده السلام لله حتي و بعدين أنتوا اللي مكلميني و الله أخد شنطتي و أمشي😣.
-أقعد أقعد يا أسمك ايه أنت ؟!
-- أنا صرصور و نوعنا ليه اسم تاني هو محرج شوية بس من غير تريقة هو بنت وردان.
-بنت مين و عاملي دكر و شنب 3 متر أقعدي يا شاهيناز 😂😂😂😂طيب أقعدي.
- ايه الريحة ديه يا أبني و الله حموت مش قادر أتنفس😷.
--أنها رائحتي وأنا فخور بها.
-أخلص يا عم حنظلة.😷😷😷
-- ديه أفرازات خاصة جسمي بيفرزها بعلم بيها مكاني و منطقتي يعني.
-انت في منك انواع كتير للاسف صح?
-- يووه متعدش حوالي 3500 نوع بس اللي منتشر او اللي بيضايقوكوا انتوا كبني ادمين 4 انواع بس لانهم منتشرين بكثرة و انا نوع من الأربعة دول
-نوع حضرتك ايه غير انك شاهيناز 😂 و لمؤاخذة يعني?
-- اللهم طولك يا روح و الله اخد شنطتي و امشي😣
- اقعد بس استهدي بالله مش حقولك يا شاهيناز تاني 😂😂😂😂😂😂.
-- انا صرصار امريكي و معايا الجنسية و باسبور ازرق و اتكلم معايا عدل من غير تناكة عشان مقفلكش الستوديو بتاعك ده.
- حقيقي😨 - احنا متأسفين اللي ميعرفك يجهلك
-- ولا يهمك انا صرصار امريكي من النوع الكبير طول بيوصل ل5سم و و لو فردت جناحاتي ممكن توصل ل10سم

-بس اعذرني في السؤال انا بشوفك كتير قوي امريكي ازاي دنتا مرمي في كل البلاعات
-- اجدادي هاجروا عن طريق التجارة من امريكا لكل العالم من حوالي 300 سنة و انتشرنا في كل حته لاننا كائن متكيف بنعيش في اي حته
-بخصوص موضوع التكييف ده انا اسمع عنه اساطير
انتوا فعلا نجيتوا من ال5 موجات انقراض اللي حطت عالكوكب
-- ده حقيقي احنا من اقدم المخلوقات علي كوكب الارض و جسمنا مهئ للنجاة.
انا ممكن اقعد من غير اكل لمدة شهر و من غير اكسجين لمدة ساعة 3 اسابيع من غير ميه و جسمي مبيتأثرش بالاشعاع و شاسيه جسمي قوي و قابل ان احشر نفسي في اي زخنوء من غير ما حاجةتلاقيني.
-ياه دنتا خارق بقي امال ليه شوية بيرسول بيشقلبوك علي ضهرك و تقعد ترفص زي العيال الصغيرة و تموت? 😂
-- اول مرة بس احنا جسمنا بيكون مناعة من السموم لو جريت منك او لو عملت حملة رش و حاجة فلتت الجيل الجديد بيبقي عنده مناعة من المبيد اللي انت رشيته ده ساعتها البيرسول بيبقي أكس بالنسبالنا
- عشان كده ساعات المبيد مبيأثرش فيك?
-- بالظبط ده بيبقي بباه او مامته استشهدوا في رشة قبل كده فكون مناعة من المبيد ده.
- بحاول اتعاطف معاهم بس في داهية الصراحة
- طيب كلمنا عن حياتك العاطفية
-- هحححح مبدأيا كده انا كائن ليلي و رومانسي لما بيحل سيزون الجواز في الصيف بختار مكان رطب بعيد عن عيون الناس و احك طرف جناحي المشرشر في غشاء كده فيطلع الميوزك اللي بتسمعها بليل اللي هي العرير في الوقتواللي الأنثي بتفرز مادة عطرة زي برفيوم كده فأنا أعرعر قوم تلبي الانثي النداء و يحصل اللقاء و نقول للشمس تعالي تعالي بعد سنة مش قب...
- خلصي يا ست.
-- احم معلش اصلك حركت مشاعر دفينة جوايا، بعد اللقاء الأنثي مبتشوفش وشي تاني و اللي منحتهولها بيكفيها تبيض بقية حياتها. و انا بشوف واحدةاصل محسوبك ومنايزر.
- مصير الاولاد ايه بعد ما عملت عملتك و خلعت يا ومنايزر.
-- الأنثي بتضع في المرة حوالي 16 بيضة و بتبيض حوالي 50 مرة خلال فترة حياتها و بتبيض كل 45 يوم، البيضة مبتخرجش صرصار علطول بتخرج حاجة اسمها الحورية و بتقعد تكبر و تنسلخ من الغلاف بتاعها كذا مرة عشان توصل لصرصور ناضج قادر علي التكاثر بتاخدلها حوالي سنة في القصة ديه و زيهم و هي بالغة.

- ايه ده بس كده انتوا فيه منكوا الاف بقي دنتا بتتكلم في جيش
-- ده حقيقي لو بتشوف صراصير بكثرة في بيتك او مخزنك اعرف ان فيه جيش مستخبي في اي مكان رطب حواليك.
-امال بتكلوا ايه
-- فضلات اي فضلات اكل مخلفات ورق فيه مننا بياكل خشب و بناكل الاغشية اللي بتتسلخ مننا و بناكل بعض احيانا.
- انا اللي اعرفوا ان عنكوا فم غريب
-- احنا عندنا فكين واحد بره الفم بيساعد علي تقطيع الاكل و التاني داخل الحلق بيساعد عالبلع كمان بفرز ريق زي بتاع البني ادم كده عشان يساعد في تحليل المواد النشوية و السكرية.
-فكيين ليه Alien بتلاقي اكلك ازاي طيب?
--انا عندي حاسة شم قوية جدا بعرف الاقي اكلي بيها و كمان بعرف مثلا ان مفيش حد في الطبخ او الحمام فبخرج من مخبأي عشان اكل. لان ريحتكوا مميزة ولو حد فينا حصل احتكاك معاكوا بنجري ننضف نفسنا عشان باقي الصراصير متنفرش مننا عشان بنقرف، انا كنت حسلم عليك جنتلة بس و امسح ايدي بالهاند جيل.😒
- تقرف يا معفن، يا معفن يا ساكن البلاعات انت دنتا حامل للستة امراض و بكتيريا عايزة صفحة لوحدها عشان اكتبها ابسط حاجة قرفك اللي بتسيبه في كل حته و قشر جسمك اللي بيسبب حساسية و ربو دنتا بتجيب حساسية للعلماء اللي بيدرسوك.
-- وات ايفر حيترز جونا هيت
-طب بالنسبة لشنب النجعاوي ده ليه لزمة
-- طبعا ده جهاز استشعار متقدم بيخليني احس باقل ذبذبة بتحصل حواليا و هو حاسة الشم بتاعتي اصلا.
-و بالنسبة لباقي الانواع ممكن تذكرهم سريعا كده
-- عندك الصرصرر الألماني و الشرقي دول من آفات المنزل برضه.
- طب يعني انت قذر و مؤذي و بتخوف العيال و الستات و الرجالة كمان انت ملكش فايدة في الدنيا كده.
-- مين قال هو ربنا بيخلق حاجة كده وحد الله في قلبك
-لا اله الا الله فوايدك ايه بقي
-- خد عندك مصدر غذاء عشان غني بالبروتين لشعوب اسيا و لاني بتكاثر كتير فانا حاللهم مشكلة كبيرة في الغذاء بتاعهم.
-- لاني محصن من كل الامراض و بموت لما بعجز بس او في حادثة فبيتم دراستي و استخراج مضادات لامراض كتير مني غير ان حتي الان بيدرسوا انا ليه الاشعاع مبيأثرش فيا.
--وجودي كمصدر غذاء للزواحف حايش عنكوا بلاويهم لانهم لو ملاقيوش اكل حخرجوا يدوروا عليه عندكوا.
-- و اخيرا بعد التقدم العلمي فيه مراكز ابحاث في اليابان قدرة انها تسيطر علي جهازي العصبي و تركب عليا كاميرات و حساسات و تتحكم فيا بريموت كنترول و تدخلني اماكن تدور علي احياء بين الانقاض و اخيرا مفاعل فوكاشيما لاني مبتأثرش بالاشعاع النووي.
- جميل و الله دنتا طلع ليك فوايد بقي عمتا انا بحب اشكرك نيابة عن اسرة البرنامج اللي لموا من بعض و جابولك هدية علي قد ما قسم.
-- حعمل ايه بفردة شبشب واحدة??!😓
- انت مش حتعمل حاجة انا اللي حعمل💀
 طرااااخ💥
- ابقي خلي الباسبور الأزرق بتاعك ينفعك يا شاهيناز!

حلقة مقرفة أقسم بالله #TRex_Magazine انزل بالتتر يا ابني و ابعت حد بجاروف للفقيد!
#تعرف
Written by: Amr Khaled - T.Rex
#AK_TRex

التعليقات
0 التعليقات