سلسلة تعرف - الإعصار

سلسلة تعرف -  الإعصار

وفاة 21 شخص بكوبا خسائر بملايين الدولارات و فيه جزيرتين في الكاريبي اتساووا بالبحر و ده كان مجرد ستارت أب للإعصار "أرما" ده بيسخن بس و اللي و أحنا بنكتب الموضوع ده عل ي وشك انه يضرب فلوريدابعد ما وصلت سرعة الرياح فيه ل260كم/ساعة و بيتقدم بسرعة 20كم؟ساعة ي أتجاه فلوريدا. السلطات الامريكية بالفعل أصدرت قرار بأخلاء 5.6 مليون شخص لمنازلهم لأنها علي حد تعبيرهم أكبر من أكبر أعصار شهدته الولايات المتحدة في تاريخها. المتوقع مبدأيا أنقطاع التيار الكهربي عن 9 مليون شخص و حسب وكالة CNN رسالة السلطات للسكان في ولاية فلوريدا كانت "أخلوا منازلكم فورا".
سيزون الأعاصير علي أشده في أمريكا السنادي لأن كان لسه ضاربهم إعصار "هارفي" من أسبوعين و اللي ضرب ولاية تكساس و لويزيانا و سبب خسائر 180 مليار دولار بشكل مبدأي غير كارثة في النقص في مادة الأثيلين اللي بتدخل في صناعات كتير و أكبر انتاج في تكساس ده غير الوفيات و الضحايا.
بعد أخبار الحوادث اللي عالصبح ديه يهمنا نعرف بقي ايه هو الإعصار بيتكون أزاي و ازاي نوقفه او نتنبأ بحدوثه؟؟؟؟!

أيه هو الاعصار؟
الاعصار عبارة عن منطقة انخفاض للضغط الجوي بتدور حولها رياح حلزونية و اتجاه الدوران بيبقي عكس عقارب الساعة في نصف الكره الأرضية الشمالي و مع عقارب الساعة في نصف الكرة الجنوبي.

الاعصار بيتكون من ايه؟
بيتكون من رايح شديدة و بخار مياه حنقول جابها منين بعد كده بس مبدأيا نقدر نقسم الأعصار لجزئين
الجزء الأول و هو مركز الأعصار أو عين الأعصار و ديه منطقة الضغط المنخفض و بتبقي هادية نسبيا و قطرها بيبقي حوالي من 10كم الي 50 كم حسب حجم الأعصار
الجزء الثاني و ده اللي بيسبب معظم الدمار و هو الجدار الخارجي للأعصار و ده اللي بيبقي فيه كل ألأكشن الرياح المضطربة اللي بتدور بسرعات رهيبة أكتر من 119 كم/ساعة و أنت طالع و بيصحبها دايما أمطار بلوازمها من برق و رعد الأمطار ديه هي اللي بيتغذي عليها الأعصار و بتضمن أستمراره لأطول وقت.

أزاي بيتم تصنيف الأعاصير و هل كل الأعاصير مدمرة؟
مبدأيا مش كل الأعاصير مدمرة
بالنسبة للأعاصير المدراية و ديه بتبقي في المناطق الأستوائية بتبقي أعاصير ضخمة جدا بتوصل مداها ل500 كم و سرعة دوران الجدار بتبقي أقل بكتير من الأعاصير المدمرة و بتبقي خطر جدا في البحر بس بمجرد وصولها لليابسة أو حتي توصل لمياه باردة بتتبدد.
النوع التاني و المدمر بقي هي الأعاصير القمعية و ده اللي بيتصنف تحته الأعصارين أرما و  هارفي و كاترينا لو تسمع عنه.
الأعاصير القمعية بتتشكل بين دائرتي عرض 15 و 45 و بتستمد قوتها من المحيط في بداية تكوينها.
بتتدرج قوه العاصير من واحد الي خمسة حسب سرعة دوران الرياح و و نصف قطره
ملحوظة :أرما قوته خمسة علي مقياس الأعاصير.

نيجي للسؤال المهم أزاي بتتكون الأعاصير أصلا؟!
القصة كلها بتبدأ لما درجة حرارة المياة في المحيطات ترتفع و توصل ل37 درجة تقريبا عند درجة الحرارة ديه بيزيد سرعة تبخر الميه و اللي بترتفع لأعلي بسبب أختلاف الضغط و الكثافات بينها و بتشكل سحب رعدية ضخمة لما بتتشبع طبقات الجو العليا بالماء
حتي هذه اللحظة احنا في عاصفة عاديه المشكلة بقي أن المنخفض الجوي اللي بيحصل نتيجة تبخر الميه و تدفقها لطبقات الجو العليا بيخلي كتل هوا ضخمة من مناطق الضغط الجوي العادي او المرتفع تجري للمنخفض الجوي ده بسرعات رهيبة و بسبب دوران الأرض بتاخد الحدفة بتاعتها بكرف و هنا يبدأ الأعصار الرقص بفضل البخار و الرياح و دوران الأرض.

بتزيد قوة الأعصار طول ما هو علي مسطحات مائية لأنه عمال يبخر في ميه و يجيب رياح و يكبر أكتر و أكتر شرعة تدفق البخار مع سرعة الرياح و الدوران العنيف ليهم بتبقي كفيلة انها ترفع سفن و كائنات بحرية بأحجام متقدرش تتخيلها لدرجة ان الأعصار بيصاحبه أمطار عجيبة من الكائنات البحرية بتلاقي الدنيا ممكن تمطر سمك غير ان العاصفة المصاحبة ليه و اللي بيستمد قوتها منه لما بيسيب المحيط ويدخل علي اليابسة بتمطر حبات برد اللي هو كتل تلج يعني بأحجام ضخمة بتنزل زي الصواريخ بتدمر اللي تخبط فيه.
رحمة ربنا أن الاعصار بمجرد ما بيدخل اليابسة بتبدأ قوته تقل او تتحجم و يبدأ يستهلك في الوقود اللي جمعه في صورة العاصفة اللي حوالية بيوت بالكامل و مدن بتمحي من الوجود غير الأسر اللي بتشرد و الاشخاص اللي بيفقدوا سواء بسبب الرياح أو السيول لأن الاعصار لازم يصرف الميه اللي جمعها من المحيط ديه حتروح فين يعني كل ده بيرجع للأرض في صورة أمطار او برد.

هل أحنا نقدر نتنبأ بالأعاصير؟
للأسف شبه مستحيل معادلة تكون الأعصار بيخش فيها كمية متغيرات حتي أن العلماء بيقولوا أن رفرفة جناح فراشة ممكن تكون سبب في تكون الأعصار أو لا فأنت مش حتقدر توفر التفاصيل الدقيقة ديه أبدا عشان تدخلها لبرنامج محاكاه يقولك الاعصار الجي حيبقي فين هي مش حفلة عمرو.بس بسبب التقدم في الرصد بالأقمار الصناعية و تقنيات الرصد بنقدر نحصر الأماكن اللي مشتبه فيها و أنت نصيبك حيطلعلك منين بقي.

طب الحمد لله أحنا كده عندنا اماكن محتملة نجهز بقي عشان نوقف الأعصار أول ما يتكون!
للأسف الأوبشن ده غير متاح برضه أي تامل ليك مع الأعصار أول ما بيتكون نتايجة غير متوقعة بالمرة طول ما هو في المحيط انت مجرد متفرج حتعمل ايه حتضربه بنووي تلاشيه مثلا خرف و كأن قوي الطبيعة بتسخر منا و بتروينا أحنا صغيرين و متغطرسين أزاي.
الأعصار حيفضل يكبر و يقوي غصب عنك و تحت عينك لحد ما يوصل لليابسة حمد ربنا بس لو عرفت تتوقع مساره بدقة عشان تخلي السكان لأن أملك الوحيد انه يوصل لليابسة بسرعة عشان يبدأ يفقد قوته و يبقي ضرره أقل.

طب يعني خلاص كده العلماء مستسلمين للامر الواقع؟!
لا طبعا في دراسات بتتم علي العاصير و بيتم جمع بيانات عن طريق الروبوتات و نماذج المحكاة و بنعرف عنها جديد كل يوم و لو اتمكنا بسبب العلم اننا نعرف اول ما بتتكون و نتنبأ بمسارها حنقدر يوما ما اننا نضعفها او نبددها قبل ما توصل لليابسة.
احد ابسط الحلول نظريا ان بمجرد تكون الاعصار تحتول نوفر طريقة او مادة تعزله عن الميه يبقي زي غشاء فميعرفش يبخر ميه تاني و يبدا يضعف بس ايه الماده و طريقه تسليمها لمكان الاعصار و ايه الكمية و اثرها عالبيئة ده اللي بيحاول العلماء يوصلوله في وقتنا هذا.
ملحوظة: السبب الرئيسي في أنتشار الأعاصير و ازدياد ضراوتها عام ورا التاني هو الأحتباس المناخي و أرتفاع درجة حرارة المحيطات!!!!
كان معكم #TRex_Magazine من عين الأعصار و في النهاية الحمد لله الذي عافانا مما أبتلي به غيرنا.
#تعرف