سلسلة تعرف - لقاء مع مسجل خطر


سلسلة تعرف - لقاء مع مسجل خطر 

مستمعينا هابي ويك اند عليكم بقالنا كتير بنستضيف ضيوف لطيفة نسبيا حتي لو كانوا مشاكسين شوية فقررنا نستضيف حد خطير مسجل خطر فعلا ان صح التعبيرز ضيفنا النهاردة بنوا جنسه أصلا مرعبين بما فيه الكفاية بس هو مرعب أكتر منهم لأن ربنا مع الشكل الدارج لفصيلته مانحه قرنين زيادة.ضيفنا صيتها مسمع في أي رحلة بتطلعها في الصحراء حتي أهل المكان نفسهم بيقلقوا منها و بيحكوا عنها حكاوي منها حقيقي و منها أساطير عشان كده قررنا نخوض المغامرة معاكم و حنروحلها لحد عندها.
معانا و معاكم الطريشة او الحية ذات القرون.


-صباح الخير ازي حضرتك.
-- ازيك يا عنيا.
-بصي مبدايا كده حضرتك انا معايا حزام اسود اي عوق حركة كده او كده حثبتك مكانك من قرونك اللي فرحانة بيهم ديه.👊
-- متخافش يا بابا. انا لو عايزة اعملك اي أذي كان زمانك متكوم من ساعة ما دخلت و من غير ما تعرف ايه اللي حصلك اصلا.
الحزام الاسود بتاعك ده تمسك بيه البنطلون عشان ميقعش.😂
-احم سافلة 😫.أسم حضرتك بالكامل.
-- الطريشة او الحية ذات القرون أو أم جنيب.

- طيب الشائع ان أسم الطريشة ده لأنك فاقدة لحاسة السمع مع ان معظم التعابين كده أصلا و ذات القرون مفهومة ايه موضوع أم جنيب ده؟
-- أم جنيب ده أسم سماهولي قبائل البدو ديه طريقة مشي بمشي اتقصع بجنب. لأن حركتي بطيئة لقدام غير التعابين العادية.
-بس اللي أعرفه انك سريعة جدا لما بتمشي بالجنب بغض النظر عن المياصة ديه. حتي أن فيه أسطورة بتقول انك الطريشة الطائرة ممكن تصيب حد راكب علي ظهر جمل لأن القفزة ممكن توصل من 4 ل5 متر.
-- يا ابني الصيت ولا الغني انا اه سريعة جدا زي اي تعبان بس انا حجمي اصلا بيتراوح من 25سم ل80سم حنط 5 متر ازاي مركبة تربو بس أه بنط مسافات طويلة بالنسبة لجسمي بس مش ديه نقطة قوتي في الهجوم
--.حسس عليا كده!

-ايه؟!! فيه ايه ؟!!!😨
-- متتخضش كده مالك في ايه!
-نعم؟!😓
-- حط ايدك عليا متخافش.
-أحم 😓 ايه ده انت مش ناعمة زي باقي التعابين ديه حراشيف؟!
-- اها ده من اسباب بطئي في خط مستقيم ان جسمي مش أملس فالرمل بيعوق حركتي نسبيا عشان كده بمشي بالجنب. و مبهجمش مباشر لا بعمل كمين و أوقع الفريسة فيه.
-طب ممكن تقعدي مكانك بقي عشان الدنيا حر. بتعملي كمين ازاي؟!
-- بدفن جسمي في الرمل بقعد أتلوي كده لحد ما يتدفن من الديل و تبقي عيني بس اللي طالعة و اول ما الفريسة تعدي هوب أروح مسكاها و بالهنا و الشفا علي قلبي.
- بس كده انا كنت فاكر ان القرون ديه ليها أستخدام يعني حتنطحي الفريسة أو فيهم سم كده يعني.
-- لا القرون ديه مش ناشفة زي ما هو ظاهر في شكلهم دول مجرد جلد و طريين حسس عليهم كده.
- هو حضرتك ايه مشكلتك مع التحسيس ممكن تقعدي مكانك انا مصدقك.


-- القرون ديه ليهم أستخدامين و انا بدفن نفسي في الرمل ميخلوش الرمل يجي علي عين. كمان بيحموا عنيا الحلوين دول من الهجمات لو الفريسة قاومت ولا حاجة.
- طيب و الحراشيف اللي علي جلدك.
--اه دول للدفاع برضه بفرك جسمي في بعضه فيطلع صوت بيخوف أعدائي.
- حرمة صعرانه!
--ايه؟
-لا ولا حاجة مواهب حضرتك متعددة بس فبمدح فيكي.
--ميرسي أوي انا حبيتك خالص.😍
- و انا كمان بس من بعيد لو سمحتي. حضرتك موطنك فين بالظبط.
--بلاد الله واسعة بس انا بحب الأماكن الجافة منتشرة في صحراء شمال أفريقيا و منها للصحرا العربية كلها.
-أنا برضه قولت مش حتفوتي أخواتنا الخلايجة.
 بالنسبة للسم بتاعك هل فعلا هو ملهوش علاج و بيشل و يموت في ساعتها و بيعد من اخطر سموم التعابين.

--لا ده جهل بقي أنا سمي عادي له علاج في المصل و اللقاح و متوزع علي مستشفيات الصحة في الاماكن اللي بيبقي معروف اني فيها.
-جميل يعني الموضوع ملحوق الحمد لله.
--لا مهو أنت لو ملحقتش نفسك و خدتلك المصل خلال فترة قريبة بتتوقف علي حجم الطريشة و كمية السم اللي بختها في جسمك. حتتكسر روابط دمك و حتبدأ خلاياك تموت و جسمك يسود و لو لحقوك بالمصل حتفضل مشوه بقية حياتك.
-حرام عليكي ليه الأذي ده؟!!😱😱😱😱
--أنا مبهاجمش البني أدمين الا لما بيضايقوني لأنكم مش علي المنيو بتاعتي أنا باكل أرانب فران سحالي .بس خير وسيلة للدفاع هي الهجوم غير كده السم بتاعي غالي عليا قوي فمببخوش كله ألا لما أتأكد انك خطر فعلا. ولا اسيبك تتحرش بيا يعني؟!
- انت بتتلككي! سؤال أخير
-- ليه أخير متخليك قاعد شوية!😋
-سؤال أخير 😤 انت و لمؤاخذة بتبيضي كام بيضة في المرة.
-- بتاع 25 طريشة في المرة أن شاء الله و حاليا سنجل.
-كفاية بقي عشان قشعرت أنا خلصت يا جدعان من فضلكوا رجعوا الشمال ديه زنزانتها.😤😤😤
-- أحسن أنت الخسران!
أستغفر الله العظيم ديه مسجلة خطر ديه يا ربي ولا اداب. أتمني يكون الانترفيو المريب ده غطي كل المعلومات الخاصة بالطريشة
كان معكم #TRex_Magazine من سجن النساء بوادي النطرون انجوي يور ويك أند.

#تعرف
 Written by:Amr Khaled - TRex
#AK_TRex

التعليقات
0 التعليقات