Chocolate Story episode1 - قصة الشوكولاتة الحلقة1

Chocolate Story episode1 - قصة الشوكولاتة الحلقة1

الشيكولاتة تقريبا هي الحل لكل المشاكل العاطفية و النفسية اللي ممكن تقابل الواحد مننا في حياته. فكرة أن المادة ديه او النبات اللي بيستخرجوا الخام منه مكانتش معروفة للبشرية في يوم من الأيام مرعبة. أزاي البشرية قدرت تعيش كل الفترة ديه من غير شيكولاتة. سفير في كل المواقف اللي بتعجز فيها اللسان في التعبير عن أحساسك. قصة الشيكولاتة بتبدا معانا من الطفولة. أول ما بتبدأ تستكشف الدنيا من حواليك و لسانك أقوي حاسة عندك وقتها و ووسيلتك لأستكشاف العالم بيعرف هي حاجة جميلة قد أيه. من وقتها بتعرف أنك مستني بابا عشان الشيكولاتة. بتتعرف عليها كتعبير عن الحب و و سيلة للمكافأة و التحفيز و المصالحة و العقاب بمنعها. و بتكبر و جواك الأساسايات ديه و بتبدأ تتقن أستخدامها بانك تديها للكراش بدل ما تقعد تتكلم و تهلفط و تخرب الدنيا بتهادي بيها الناس في المناسبات المختلفة و بتصالح بيها ياما مديرين كانوا حيتقتلوا و ربنا سترها بسبب كيتكات دارك مش لمديرك لنفسك اه عادي ممكن تهادي نفسك بالشيكولاته و تتصالح معاها عادي جدا  ياما خطوبات و جوازات كانت حتتفركش و ربنا سترها بسبب تدخل فريرو روشية و ياما علاقات عملت رستارت بعد واحدة ميلكا و فيه اطفال بتتولد بسببها و الله ما علينا من أنترو أسامة منير و قلة الأدب ديه الشيكولاتة ديه جاتلنا منين أصلا؟

محدش كان يعرف الشوكولاتة قديما لأنها ببساطة مكانتش موجودة عالخريطة من اساسه و ده لأنها كانت في مكان معزول و غير مكتشف قديما أسمه أمريكا الجنوبية ده موطن شجرة الكاكاو الأصالي و الوحيد في العالم. شجرة الكاكاو ديه الشجرة اللي بتطرح ثمار الكاكاو و اللي اللب بتاعها هو المادة الخام لكل مشتقات الشيكولاتة اللي نعرفها في حياتنا. شجرة الكاكاو تواجدت هناك بس ده لأنها شجرة استوائية بتحتاج ظروف بيئية أستوائية و ممطرة بغزارة لنموها غير ان مع المناخ الحار ده بتحتاج لظل و مبتتحملش الرياح فبتحتاج لأشجار تانية طويلة و كثيفة تنمو تحتها و سبحان الله الظروف ديه كلها تجمعت في موطنها اللي كانت بتنمو فيه بشكل طبيعي دون أي تدخل من البشر.

عرف العالم شجرة الكاكاو لأول مرة موثقة في حضارة المايا 400 ق.م ألا ان عثر مؤخرا علي ادله تثبت ان حضارة موكاي عرفوا مشروب الشوكولا قبلهم بكتير 1900 ق.م. كلمة كاكاو نفسها ترجمتها بلغة المايا تعني العصير المر أما شوكولا معناها الماء الحامض و ده لأنهم كانوا تاريخيا بياخدوها من الثمرة زي ما هي و يهرسوها و ياكلوها و اللب بتطور الزمن اثبتلهم ان مش ديه أفضل طريقة و طوروا منها شراب الشوكولا الدافئ هما و الأزتكيين بس كانوا بيشربوه بارد مع بعض الأضافات زي بتلات الزهور و الفلفل لحد بداية معرفة العالم بالشيكولاتة و اللي كانت علي يد المستكشف الأسباني فرناندو كورتيز 1915م و اللي دعاه واحد من حكام الأزتكيين لشرابه المفضلا و هو الشوكولا و اللي لقاه كورتيز و رجالته مر فحلوه بالسكر عشان ميرفضوش يشربوا مع الحاكم و يتحط عليهم وقتها وجدوا انه طعمه حلو و فيه فكرة فكرر كورتيز يرجع بشوية من الحبوب ديه لاسبانيا بعد ما لاحظ الأزكتيين بيعاملوها برعاية و أهتمام ازاي في أختيار الحبوب و تحضيرها قبل الشرب فتقريبا أستخسر قالك أخد حبة يمكن شحوا و يغلو بعد كده. الجميل ان الأزتيك مش بس كان عمدهم أله أسمه كيتزازكوتيل في معتقداتهم انه تم طرده من قبل الألهة لأنه فرط في سر الشيكولاتة للبشر و قالهم يستخدموه ازاي بأستخراجه لقلب شخص بشري كقربان كأشارة أن قلب الثمرة هو اللي بيستخدم. 

غالبا كورتيز شرب الشوكولا كلها لوحده و مقالش لحد عليها لأن دخول الكاكاو لأسبانيا كان بعد رجوع كولومبوس من بعثته الرابعة 1542م و كانت من ضمن محاصيل جابها من المكسيك مكانش يعرف العالم القديم عنها حاجة حتي أنهم أهملوها لأنهم معرفوش يحضروها أو يستخدموها أزاي حتي عام 1955م وقتها خرج من المخازن الملكية لسبب ما غير معروف و بدأ ينتشر بين الطبقة العليا للمجتمع الأسباني و كان حكر علي الأسبان ل100 سنة حجبوا فها سر الشوكولا عن العالم لحد ما فيه رهبان سربوا أمره للعامة كشراب مهدئ زي النبيذ.

خرج سر الشيكولاتة للعالم و كله بدأ يجود الأنجليز أكتشفوا ازاي يخلوها صلبة و تبقي بتتاكل بدل ما تتشرب وصلت سويسرا و بدأوا يضيفولها اللبن المكثف و يبدعوا ازاي يخلوا القوام ناعم بدرجات مختلفة و أضافات مختلفة لأجود حبيبات الشيكولاتة خليتهم يتبرعوا علي عرش أفخم انواع الشوكولاتة. أنتقلت زراعة أشجار الكاكاو لأقريقيا حتي أن بقي فيها أكبر 5 دول مصدرة لحبوب الكاكاو في العالم لتمتعها بنفس المناخ الأستوائي و علي رأسهم دولة كوتيفوار و اللي بتتصدر الأنتاج العالمي 1.5 مليون طن سنويا يليها غانا و نيجيريا و الكاميرون.

                                  

أنا عارف انت بتفكر في ايه انا ممكن بقي يبقي عندي شجرة شوكولاته و اقطف و اكل شوكولاته كل يوم؟
عشان تعمل كده لازم تعرف ان عملية تحضير الشوكولاته تشبه بشكل كبير تحضير القهوة مش معني انك عندك شجرة بن انك تقدر تشرب قهوة. شجرة الكاكاو بتزهر تقريبا من كل أجزائها حتي الجذع 32% من الزهور ديه بس بيتخصب و ينضج و ينتج ثمار بتحتوي في قلبها علي بذور الكاكاو و اللي بيتم أستخراجها و تجفيفها ثم تعبئتها في شولة و تتشحن لكل أنحاء العالم للتصنيع. المصنع بقي بياخد البذور المجففة ديه يفرزها و و يبدا ياخد الحبوب الجيدة يحطها في مكنة بتقشر اللب ده و بتستخلص من جواه مادة بتبقي عبارة عن بودرة الكاكاو و زبدة الكاكو و اللي بيتم فصلهم في مكنة تانية بتطلع قوالب كاكاو بتستخدم في المشروبات و الحلويات و زبدة الكاكاو و اللي بيتم أضافة مكونات تانية ليها حسب الرغبة عشان تبقي الشوكولاتة اللي نعرفها الفيديو ده بيوضح عملية التصنيع كلها.

بس التطوير موقفش علي الطعم الاوريجنال بعد الحرب العالمية الثانية حصل نقص شديد في امدادات حبوب الكاكاو لمصانع الشوكولاتة في أيطاليا لحد ما أقترح واحد أسمه ميشيل فيريرو اننا نعوض النقص ده بالبندق و نتج عن التجربة الخطرة ديه مادة مشعة محرمة دايتيا أسمها النوتيلا و اللي حتي بعد انتهاء الازمة فضلت مزاحمة المنتج الأصلي علي عرش المكيفات الحلال و اللي قربت تتباع بالجرام أصلا و فيه اشاعات ان حيتم تداولها في البورصة بعد ما غليت.

أيه تأثير الشوكولاته علي الجسم و ليه فعلا ممكن تشقلب مزاجك؟

 هل ليها فوايد علاجية تانية؟

طب ايه أضرارها عالجسم؟

ايه اللي بيفرق أنواع الشوكلاتة عن بعضها؟

و ايه هي أغلي و أجمل أنواع الشوكولاتة و ليه؟

ده اللي حنعرفة في الجزء التاني من قصة الشوكولاته.....

كان معكم#AK_TRex مراسل #TRex_Magazine  من داخل ممر العشق الممنوع بكارفور اعمل تاج للي حيجيبلك شوكلاته لعلك لست بخير.

Written by: Amr Khaled - T.Rex

#AK_TRex

#TRex_Magazine