الزلازل Earthquakes
الجزء الأول
موضوع سابق نشرناه هنا فى المجلة كان بيتكلم عن الزلزال الأكبر سنة 1964 فى تشيلي وكان مقياسه 9.5 ريختر وتم تعريف الزلزال فى وقتها بانه "حركة غير متوقعة لسطح الأرض نتيجة لتحرك طبقات سطح الأرض حركة نسبية علي بعض ونتيجة لكده بتتولد نقط تركيز عالي للاحتكاك تحت سطح الأرض تسمي Focus وبتنطلق الطاقة دي بشكل مفاجيء في صورة موجات اهتزازية". لو اتكلمنا بتفاصيل زيادة يبقي لازم نرجع لتكوين الكرة الأرضية المكونة من 4 طبقات: الطبقات بالترتيب داخليا من المركز"القلب الداخلي Inner Core، القلب الخارجي Outer Core، الغطاء Mantle و القشرة الأرضية Crust" زي الشكل التالي
سمك الطبقة الأولي وهي القشرة الأرضية حوالي 80 كيلومتر ومع الجزء الخارجي من الغطاء Mantle هنلاقي ان الاتنين دول بيكونوا مجموعة من الصفائح التكتونية Tectonic Plates وده معناه اننا نقدر نقسم القشرة الأرضية لمجموعة من الصفائح اللي متصلة ببعض فى نقط متعددة زي الشكل اللي تحت واللي بتمثل فيها الفواصل الحمراء نقط التلامس بين الصفائح الأرضية ومسميات الصفائح موجودة فى الصورة وبيتم تقسيمها 7 صفائح تكتونية رئيسية و بعد كده بيتم تقسيمها لصفائح أصغر وبالتالي فان نقط التلامس الكثيرة الموجودة بين الصفائح دي هي المصدر الرئيسي للزلازل لما بتتحرك الطبقات على بعض فى مناطق الفواصل والتلامس. بيتم تشبيه الفواصل بال Puzzle اللي بيتجمع مع بعضه بحدود واسمها Plate Boundaries
حركة الطبقات الأرضية علي بعضها بتتم علي خط تحرك اسمه Fault Line (الخط المائل بين كل طبقتين فى الصورة) والحركات اللى بتحصل بين الطبقات ممكن تبقي تحرك طبقة علي الثانية لفوق، لتحت، بشكل عرضي، بشكل دائري أو تحرك مركب من ال4 حركات دول مع بعض زي الشكل التالي.
حركة الطبقات علي بعض بيبقي تحرك غير سلس لان الطبقات دي عبارة عن صخور بارزة وغير ثابتة فى الشكل وبالتالي عند وجود حركة بين الطبقات فان فيه نقط بيتم فيها تعلق الصخور ببعضها وده بيخزن الطاقة فى نقط التعلق لحد ما تقدر الطبقات انها تتحرر من بعض وبالتالي بتنطلق الطاقة المخزنة فى نقط التركيز (Focus Point or Hypo-center) على شكل موجات فى
جميع الاتجاهات من نقطة التحرر وبتسبب الاهتزاز الأرضي أو الزلزال. النقطة الموجودة مباشرة فوق مركز الزلزال هي ال Epicenter ودي النقطة اللى بيبقي فيها التركيز الأعلي من شدة الزلزال والأكثر تعرضا للضرر مع زيادة شدة الزلزال.
شدة الزلزال بتعتمد على طول ال Fault وقدر حركة الصفائح عليه لكن عملية تحديد شدة الزلزال بشكل رقمي بتبقي غير ممكنة عن طريق ال Fault line وده بيتطلب انه يبقي فيه طريقة مختلفة لقياس شدة الزلزال. بالتالي تم اختراع جهاز ال Seismograph; هو ببساطة قاعدة مثبتة تماما على جسم صلب معلق عليها وزن بسوستة وطرف الوزن في نهايته قلم بيتحرك على عجلة بتلف زي الشكل اللي تحت. الحركة الاهتزازية للجهاز المتولدة نتيجة الهزة الأرضية بتقدر تحدد شدة الزلزال وبعده عن مركز استشعار الزلزال. الشكل الناتج من الSeismograph بيتسمي Seismogram وهو الشكل المعروف فى جميع الأوساط بمقياس ريختر وهو عالم أمريكي قام بتعريف شدة الزلزال بالأرقام المتداولة لمعرفة شدة الزلزال.
شكل القراءة المسجلة على مقياس ريختر يقدر يحدد لعلماء الزلازل (Seismologists) شدة الزلزال وبعده عن مركز قياس الزلازل. الزلازل على مقياس ريختر بقيمة أقل من 4 بيتم تعريفها كأنها Mini Earthquakes ومن 4 ل 5 ريختر فهي Light Earthquake، من 5 ل 5.9 ريختر هي Moderate Earthquake، من 6 ل 6.9 ريختر Strong Earthquake، من 7 ل 7.9 ريختر Major Earthquake ومن 8 لأعلي من 9 فبيتم تعريفها انه Great Earthquake زي زلزال فالديفيا.
زيادة شدة الزلزال على مقياس ريختر معناها انه احتمالية حدوثه زمنيا أو كل فترة أقل مع ارتفاع الرقم، مثلا الزلازل المتوسطة من 5 ل 5.9 ريختر بتحصل ما بين 1000 و 1500 زلزال كل سنة والزلازل الأقوي من 6 ل 6.9 ريختر بتحصل ما بين 100 و 150 مرة فى السنة. زلزال فالديفيا والزلازل المشابهة اللي حجمها أكبر من 9 ريختر من الطبيعي انها بتحصل ما بين كل 10 و 50 سنة ولو اعتبرنا ان أحد مواليد سنة 1940 مازال على قيد الحياة فهو شهد حرب عالمية اتوفي فيها 50 مليون انسان و شهد أكبر 5 زلازل فى التاريخ الحديث بداية من زلزال روسيا سنة 1952 بمقياس 9.1 ريختر وحتي الزلزال الأحدث سنة 2011 فى اليابان اللي كان بنفس الدرجة من الشدة على مقياس ريختر.
Written by : Mohamed Khaled
#Mohamedkh5
#TRex_Magazine
0 التعليقات