Halloween - سلسلة علي خفيف - الهالووين
أيه قصة الهالوين ده بقي؟
ليلة 31 أكتوبر من كل سنة هي ليلة الأحتفال بالهالويين و الموضوع بتمدد أصوله الي قبل الميلاد عند شعوب أوروبا و كان بيتزامن مع تغيير الفصول نهاية فصل الصيف و بداية فصل الشتاء و اللي كان قديما شائع أن ارواح الموتي بتيجي مع فصل الشتاء Winter is comming فكانوا بيعملوا مهرجان اسمه مهرجان Samhain و وفقا للأساطير اللي بتختلف من بلد لبلد بس تقدر تصنفهم لأسطورتين أساسيتين:
الأسطورة الأولي بتقول أن أحبابنا اللي ماتوا بييجوا يزورونا و بالتالي بيتم أعداد مائدة طعام فاخرة ترحيبا بأستقبالهم في اليوم ده بتضم أشهي و أطيب الأطعمة.
الأسطورة التانية أن الأرواح بتيجي مع رياح الشتاء و تطارد الأحياء بالنسبالهم الشتاء يعني موت لأن بيسبقه الخريف كل حاجة بتذبل و الشجر ورقة بيقع و بعدين في بعض الدول تبدأ الرياح و الجو العاصف سواد ومادة خام لكل قصص الرعب اللي ممكن تيجي في بالك.
ليه سموه عيد القديسين طيب؟
بيرجع تاريخها لعام 609 م لما اعلن البابا فريروري السادس عشر يوم 1 نوفمبر عيد كاثوليكي رسمي للأحتفال بأرواح القديسين و الشهداء و الرسل و المؤمنين بيجتمع الناس في ليلة 31 أكتوبر و يتلوا الصلوات ليهم عشان يرتاحوا في مرقدهم.
القرن ال18 ده كان بداية قصة التنكر في العيد ده لأن الأطفال كانوا بيتنكروا في ملابس القديسين و رجال الدين و يلفوا عالبيوت يجمعوا الحلوة و بعدين يروحوا الكنيسة يحتفلوا و يتلوا الصلوات
التنوع العرقي في الولايات المتحدة خلي الهالويين كوكتيل كل شعب جي بمرجعيته و ده بدأ الميكس اللي بنشوفه في الهالويين دلوقت بمعني الناس بتعمل وليمة عشان يرحبوا بالأموات بتوعهم و بيتلوا الصلوات للقديسين و بيتنكروا في اشكال مرعبة و بيولعوا نار لطرد الأرواح الشريرة فبقي كوكتيل أخر حاجة كل شعب جه بثقافته و كلهم مجتمعين أن الشتاء حالك و ملئ بالمهالك و بيجيب معاه الموت.
طب ايه علاقة قرع العسل بالهالويين؟
الأيرلندين من الناس اللي حطوا التتش بتاعهم عالهالويين و دخلوا حوار نحت أشكال مرعبة علي الخضراوات و بقوا يعملوا فوانيس بأشكال مرعبة من اليقتين لأنه كان رخيص و متوفر بكثرة في الولايات المتحدة بس هما ليه كانوا بيعملوا فوانيس من الخضراوات أصلا؟
"جاك البخيل" Jack-o'-latern أسطورة ايرلندية عن واحد بخيل سكير أسمه جاك كان الشيطان عايز يسرق روحه في ليلة الهالويين فطلب من الشيطان انه ياخد كاس اخير قبل ما يسرق روحه بس مكانش معاه فلوس حول الشيطان نفسه لكوين وبدل ما يشرب بيه جاك حبسه في محفظته اللي كانت بقفل علي شكل صليب و مرضيش يخرجه الا لما اتفق معاه يسيبوا يعيش سنة كمان مقابل انه يخرجه. خرج جاك عاش سنة رجعله الشيطان طلب منه طلب تاني انه يجيبله تفاحه من عالشجرة و اول ما الشيطان طلع عالشجره حفر جاك صليب عالشجرة و حبسه تاني واضح ان الشيطان اللي كان سكران مش جاك المهم المرادي اتفق معاه انه يسيبه يعيش 10 سنين قبل ما ياخد روحه بس جاك مات قبل العشر سنين ما تخلص و ياخد الشيطان روحه.جاك كان شخص سئ و بخيل فمتقبلش في الجنة و الشيطان مقبلوش في النار و فضل محبوس في الظلام بين الجنة و النار و شفقتا بيه عمله الشيطان فانوس من نبات لفت جواه شعلة عشان يعرف يمشي في الظلام في البين بين اللي هو بين الجنة و النار يعني حسب الأسطورة.و في كل هالويين بيظهر جاك بفانوسه و بيظهر عالأرض بفانوسه مع الأرواح اللي راجعه بيدور علي مكان يروحه عشان ينعم بالسلام.
من بدايات القرن العشرين تطورت ملابس الهالويين من ملابس القديسين لملابس مرعبة و حتي ملابس تنكرية بشخصيات الكوميكس زي ما قولنا ثقافات متعددة خلت الدنيا دخلت في بعضها و بقت بظرميت.
لو مش حتحتفل في حته ما ممكن تنزل فيلم رعب و تضلم أوضتك و حتبقي ليلة سودة عليك ان شاء الله حتخليك مش حتروح الهالوين ده هو اللي حيجيلك لحد عندك وده ترشيحنا لقايمة أفشخ افلام رعب.
The Conjuring 1,2
Insidious 1,2,3
2,3,4 Paranormal Activity
Dead Silence
Ouija 2016
و سواء كنت بتحتفل بالهالووين أو لا شايفه غلط حرام.... أو أيا كان رأيك أحنا تناولنا الموضوع من باب المعرفة مش أكتر ولو بتحتفل بيه يبقي أنجوي أند هابي هالوين.
كان معكم #AK_TRex مراسل #TRex_Magazine دايخ من الصبح في الشارع علي قطة سودة ميتة عشان أكمل ديكور الاحتفال مش لاقي.
Written by: Amr Khaled - T.Rex
#AK_TRex
#AK_TRex
0 التعليقات