حرب الافيون الاولى (اول معارك المخدرات)

حرب الافيون الاولى (اول معارك المخدرات)

عمرك فكرت ان اصل كلمة "حشيش" هى كلمة عبرية اسمها "شيش" ودى معناها الفرحة والسعادة والظئططه, طيب مدام متعرفش تعالى اقولك بقى عن اكبر صناعة وهى المخدرات واللى محرمة ومجرمة دوليا الا فى بعض الدول يعنى.



بص يا سيدى اصلا المخدرات كفكرة  دى حاجة كدة من قديم الزمان موجودة يعنى مش حاجة جديدة , الناس بعد كدة عرفت كدة من النقوش اللى على المعابد فى كل الحضارات القديمة وبتاع, على سبيل المثال الهندوس كان عندهم اله (استغفر الله العظيم يعنى) هما بيعتبروه كدة مش من عندى المهم الاله العسل ده واحد اسمه شيفا يعنى نقدر نعتبره الديلر بتاعهم ده كان بيجبلهم زهرة القنب اللى هى اصل الحشيش بقى وكان بيقولهم اضرب يا معلم وكانوا بيسموه الرحيق الالهى, انما بقى الاغريق كان فيه نقوش لزهرة الخشخاش مرسومة على الجدران والكلام ده كان قبل الميلاد بقى بتاع 200 سنة او اكتر مش عارف بالظبط.


المهم بقى نبات القنب ده معناه باللاتينى يعنى الضوضاء او الدوشة , تخيل بقى اسمه فيه ضوضاء والحشيش يعنى سعادة وفرحة ده اسم يا جماعه بيبيع نفسه ده كان اول عملية ماركتينج فى التاريخ تقريبا والمنتج مكتوب له الانتشار من اول يوم.
وتطورت بقى صناعه اى حاجة تخللى الانسان فرحان وعايش فى دوشه وظئططة داخليه تطور رهيب جدا ,جعلت الصينيين من زمان اكتشفوا ان فيه حاجات اطعمه ومشروبات لما بنسيبها شوية تخمر كانوا فاكرنها بتبقى بايظة عشان ريحتها عامله زى الكحول بس تقريبا واحد صينى قال وجع البطن ولا دلقه واكل الاكل المتخمر ده وعمل دماغ فقالك اسكت يا جدع انت وهو انا اكتشفت حاجة وسموها خمرا عشان متخمره يعنى فكانوا بيخمروا ارز وشعير واى حاجة خلقها ربنا كانوا بيجربوا هتعمل دماغ  ولا لأ وتديهم نفس احساس الخشخاش والقنب وبعدها بدأوا يقلدوا الحضاره الغربية كانوا بيخمروا العنب الاحمر وبيستخدموه كنوع من انواع المواد المسكره والمذهبه للعقل وتدى احساس سعادة وفرحه برضو.
طيب الحضارات القديمة والشعوب الحلوة بتاعة زمان كانوا بيسموه مخفف الاحزان وجالب السعادة ورحيق الالهه كل الكلام ده ومش عايزهم يطوروا فى صناعته اكيد لأ مسكتوش طبعا.
يا راجل ده الهنود كانوا بيعتبروا الحشيش او القنب ده من اصل الهى عشان يعنى له تأثير السحر عليهم ووصفوه بانه احب الشراب للاله أندرا (اى كلام طبعا) مكسوفين يتقال عليهم انهم بيحششوا  ( بس ليه ما كل الحضارات بتضرب مخدرات عادى) وكان طبعا الحاجات دى بتستخدم فى الطقوس الدينيه بتاعتهم ونوع من انواع ال meditation الربانى من وجهة نظرهم .
طبعا سكان وسط اسيا هما كمان قالوا لازم نكتشف حاجة (محدش احسن من حد) فاكتشفوا الخشخاش اللى التطور بتاعه هو الافيون والمصريين القدماء برضوا بقى كانوا بيستخدموه عشان علاج الاوجاع والالم ( والله احنا كنا ناس محترمين برضو) والسومريين والبابليين والحضارات كلهاااااا كانت متمرغه فى المخدرات ومنهم اللى بيحبها عشان يعمل دماغ وكانوا ساعتها بالنسبه لهم مصدر سعادة ومنهم اللى كان بيستخدمها علاج (ولحد دلوقتى فيه ناس بتتعالج بالحاجات دى).



بغض النظر بقى عن التاريخ اللى اكيد مش هقوله كله بس الموضوع لما تطور وتفشى فى العالم وصل بصوره كبيره للايادى السيئه وبقى فيه انواع جديدة واشكال جديدة من الحاجات اللى بتخدر الانسان واصبحت فكرة المخدر هى فكرة غير مرتبطة بشيئ تتناوله عن طريق الفم .
المخدر هو اى حاجة تدخل جسم الانسان او تأثر على دماغ الانسان تخليه مغيب ومستمتع لالحاله الغير طبيعيه اللى هو فيها.

يا راجل ده سنة 1839 قامت حرب بين الصين وانجلترا اسمها حرب الافيون والله اسمها كدة وقعدت يجى تلات سنين عشان انجلترا كانت بتروج بوحشية للافيون فى الصين وبهدلوا بعض لحد فى النهايه اتهزمت الصين ووقعوا اتفاقيه سنة 1844 عشان يقننوا الموضوع ده ويبقى الواردات فى الموانئ من المخدرات يبقى عليها ضرائب وكدة بتاع خمسة فى الميه (اللى هو نضرب عادى بس الموضوع بفلوس مش بلوشى).



المهم اللى عايزك تعرفوا ان المخدرات كفكرة ممكن تكون بكلمه (واحد بيمرهم واحد بكلمتين ويضحك عليه)  وممكن تكون فى اكلة حلوة (ملوخية المصريين القدماء) واللى مش قدماء والله حتى, ممكن يكون افيون حشيش كوكايين,واخيرا بقى فيه مخدرات رقميه (يعنى ايه دى يا اخويا؟) يعنى فيه شوية موسيقى توصل بعض العلماء اللى انا معنديش فكرة عنهم انهم بيقولوا ان فيه نوع من انواع الموسيقى بطبقات معينه بتدخل الدماغ تعملها زى نوستالجيا وتخدرها وتمتعها ,فكرة المخدرات للاسف الطباع والنفوس البشرية مش عايزاها تنتهى لا وممكن يحاربوا عشان تستمر.


اخيرا تاريخ صناعة المخدرات وانواعه كبير جدا حبيت بس اديك كام معلومة وافهمك ان الحضارات القديمة كانوا برنسات فى نفسهم برضوا فمتفتكرش اننا الجيل اللى مقطع السمكة وديلها لااااا اجدادنا كانوا معلميييين.

Written by: Mohamed Qurany
#
Bin_Qurany
#
TRex_Magazine



التعليقات
1 التعليقات

1 التعليقات so far