الضباب - معلومات عن الشبورة

الضباب - مين طفي النور?!

من يومين تقريبا و أحنا في الفيلم ده بنصحي مبنشوفش حاجة قدامنا حرفيا غير سحابة دخان مش مخلياك تشوف 2 متر قدامك و في بعض مناطق مبتشوفش ايدك حرفيا.

مين طفي النور و سبب في ظاهرة أنعدام الرؤية ديه و اللي بنسميها الشبورة?!

الشبورة أو الضباب عبارة عن سحابة بس بروطة شوية ملحقتش تطلع فوق أتكونت في مستوي سطح الأرض. زي محنا عارفين ان السحاب بيتكون نتيجة تبخر المياه ايه اللي خلاها متطلعش فوق بقي زي باقي خلق ربنا من السحب ?

برودة سطح الأرض بسبب أنخفاض الحرارة أكنك مطلع أزازة مية من التلاجة البخار اللي في الهوا بيتكسف عليها و قتي حتي بنسميها أزازة مشبرة.

يبقي عشان يبقي عندي شبورة محتاج 3 مكونات مسطحات مائية

أرتفاع نسبة الرطوبة في الجو

و درجة حرارة منخفضة

ال3 حاجات دول متوفرين حاليا عندنا في مصر و مسببين في الظاهرة اللي أحنا فيها دلوقت ديه. 

طب انا كنت صاحي مكنش فيه شبورة و فجآة عالطريق مبقتش شايف حاجة ليه?

زي أي سحابة اللي بتتأثر بحركة الرياح الشبورة كمان بتتحرك مع اتجاه الرياح و بتمشي اكنك دخلت جوه سحابة و شوية و حتتحرك و يجيلك غيرها.

طب ايه اللي بيخلص الفيلم ده و الشبورة بتروح فين بعد كده?

الشبورة بتفضل مستمرة لحد ما الشمس تطلع و الارض تبدأ تسخن و البخار ده منه اللي أتكسف خلاص و رجع للأرض تاني و منه اللي حيطلع طبقات الجو العليا و يكون سحب بنت ناس فوق و منه اللي حيتبدد و ينتشر في الهوا اللي بنتنفسه عادي.

طب هو ايه أضرار الضباب?
طبعا شلل حركة المرور و الملاحة الجوية هم أول اضرار الضباب محدش شايف قدامه ولا عارف هو رايح فين ولا جي منين.

تاني حاجة الحوادث مهو محدش شايف حاجة و سلوكيات الناس في السواقة و الطرق السيئة في العادي أصلا ده بيسبب حوادث كتير للأسف و بيبقي خطأ شخص بيدفع تمنه ناس لو حد كان جي من عالمحور الصبح أكيد فاهم قصدي ايه.
مشكلة الضباب ده ان فيه نوع منه اسمه الضباب الدخاني و ده لان بخار الميه بيمتزج بادخنة المصانع
الأمر اللي بيخلي اي حد عنده مشاكل في الجهاز التنفسي ممكن يتعب جامد بسبب استنشاق الضباب بيعمل دماغ بخار و عوادم من الآخر بيحولوا رئتيه لشخليله.😖

يعني هو ملوش منافع يعني?
هو ربنا بيخلق حاجة هبائا كده برضه. الضباب مفيد جا في عمليه تنقيه الهواء من الملوثات و الجزيئات الدقيقة اللي موجودة في الجو اكنه بيغسل الهوا اللي بنتنفسه و بيفلتره
الضباب بيظبط معدل هبوط درجات الحرارة المنخفضة و بيحمي من موجات الصقيع اللي ممكن تموت النباتات و البشر علي حد سواء ووتخلينا نتكتك في مكاننا.
الضباب بيقلل من تكون الثلج في المناطق الجليديه لانه بييسحب جزء من الميه اللي بتكون التلج و بيرجعها تاني فمبتتكومش عالأرض و تخلي الثلوج ترتفع لنسب يصعب للأنسان انه يسيطر عليها.

أزاي أحمي نفسي من الضباب طيب?
تابع النشرة الجوية في الشتاء بأستمرار عشان تعرف لو فيه شبورة و تبقي مستعد ليها.
لو عرفت ان فيه شبورة أقفل شبابيك بيتك كويس لتجنب أستنشاق الضباب الدخاني و خلي بالك علي الأطفال بالذات.

لو تقدر تتحرك في غير معاد الشبورة حتي لو حتنزل بدري شوية قبل ما الشبورة توصلك يبقي أحسن.
لو مش حتعرف تتآخر علي شغلك او تروح بدري يبقي سوق براحة شغل انوارك فوجاتك أنتظارك و سيب مسافة كبيرة بينك و بين العربيات اللي حواليك و ركز عشان تقدر تتلافي آخطاء الغير لا قدر الله أما لو راكب ميكروباص أتشاهد و أمرك لله و أهم حاجة تسلك النية و ربنا يسترها علينا عليكم.

كان معكم عميد تي ريكس الضبع مراسل #TRex_Magazine من الأدارة العامة للمرور.

Written by: Amr Khaled

#AK_TRex

#الشبورة #الضباب #الشبورة_المائية