الحلزون - Snail - سلسلة تعرف

الحلزون - Snail - سلسلة تعرف

أكيد صادفت الكائن ده لو ليك تعامل مع الزرع أو في حديقة قريبة منك و أكيد لفت أنتباهك سرعته الفائقة و قدرته علي المناورة الشبه معدومين.
النهاردة حنتكلم عن مخلوق بيصنف ضمن أقدم و أبطأ المخلوقات اللي عايشة علي ظهر كوكبنا و حنحاول ببساطة كالعادة نعرف كل حاجة عنه بيعيش فين بياكل ايه ايه السلوكيات اللي بيمارسها ككائن حي اللي بعضها حتتعجب أنها موجودة أصلا في اي كائن خلقه ربنا.

ايه هو الحلزون؟!
الحلزون كائن من البطن قدميات بمعني أنه عنده قدم واحدة بيمشي عن طريق انه يعملها أنقباض و أنبساط ده غير أنه بيفرز مادة لزجة بأستمرار بتسهلة حركته عالأرض كمان بتخليه يقدر يلزق في أي حاجة و بتحرك في وضع رأسي أو مقلوب حتي. القدم ديه بتقدر تخليه يتحرك بسرعة بتتراوح حسب حجمه اللي بيتدرج من 5مم ل 30 سم في بعض الأنواع و اللي بعد أستخدام التربو مبتعديش سرعته ال15سم/ثانية. أكبر أنواع الحلزونات هو الحلزون الأفريقي و اللي ممكن يوصل وزنه لكيلو وربع.

 بيتميز الحلزون بجسد رخوي و منحه ربنا تكون من كربونات الكالسيوم بيكون فوق ظهره التكون و اللي بيكون علي شكل صدفة حلزونية و ده سبب تسميته بالحلزون كائن حلزوني من الآخر يعني. فيه كائن شبه الحلزون بالظبط بس من غير قوقعة و ده بيبقي آسمه بزاقة مش حلزون. القوقعة ديه ليها أكتر من هدف غير حمايته من أعدائه الطبيعين ألا أنه بتوفرله الملجأ الأمن في حاله الجفاف و ديه خاصيه النجاة اللي طورها خلال ال500 مليون سنة اللي عاشهم علي كوكب الأرض أنه يقدر يفرز المادة اللزجة بتاعته و يقفل علي نفسه القوقعة و يقعد 4 شهور من غير أكل أو ميه في حالة ثبات لحد ما يخلص موسم الجفاف التقنية ديه بتساعده أنه يحتفظ علي السوائل داخل جسمه لأطول فترة ممكنة و بتساعده علي البقاء.و بمجرد ما بيحث ان فيه رطوبة تاني بيفرز مادة بتذيب الغلاف اللي عمله قبل كده و يرجع يمارس نشاطه.

الحلزون عنده 4 أطراف دقيقه في مقدمه رأسه 2 منهم عنيه و دول الطوال اللي فوق و اللي تحت ديه مجسات بيستخدمها للشم. و بالرغم ان نظره علي قده يا عيني ألا ان حاسة الشم القوية بتخليه يلاقي أكله بسهولة. الأكل بيتغذي عليه بواسطة 3 شفرات في فمه بيقدر يقطع بيهم الخضار و الفاكهة و النباتات الورقية.

الحلزون بيعيش فين؟
الحلزون بيعيش في المكان اللي فيه زرع لأنه بيتغذي علي الأوراق بشراهة حتي أنه بيعتبر أفه و ليها طرق للمكافحة لأن تواجده بكثره بيقضي علي محاصيل و بيضر الثمار و الشجر. بس الحلزون مبيتواجدش عالبر بس الحلزون كمان بيعيش في البحر و الأنهار و المحيطات بيتواجد في كل حته تقريبا بخصائص مختلفة تؤهله أنه يسكن الحته ديه. يعني حلزون البر عنده رئه بيتنفس بيها بينما حلزون البحر عنده خياشيم.

سلوك الحزون
الحلزون كائن ليلي بينشط دائما  بليل عشان يتغذي و يمارس حياته و تقريبا ده لأن كل المخلوقات تقريبا ممكن تاكله فالليل بيديله أفضليه لأن كده كده مش حيقدر يهرب من الطيور أو بقيه الحيوانات فبيخرج و معظمهم نايم جبان أوي :D.
الجبن ده مع تقنية الثبات بيخلوا الحلزون يقدر يعيش لحد 25 سنة و قدروا خلوه ينجو بنفسه طوال ال500 مليون سنة اللي فاتوا.

فوائد الحلزون
الحلزون هو مصدر غذاء لعدد كبير جدا من الحيوانات و الطيور ده لأنه غني بالبروتين و المواد الغذائية اللازمة ليهم.
 و زي ما وفر الحلزون مصدر غذاء لحيوانات كان دايما مصدر غذاء للأنسان بالذات في دول أسيا اللي بيستهلكوه بشراهة بسبب قيمته الغذائية اللي بتضاهي اللي موجودة في البيض و اللحوم ألا انها بتتمتع بأنها خفيفة زي لحوم الأسماك و مبتحتويش علي دهون أو مواد سامة ومضرة. غير توافرها بكثرة و قدرتها علي التكاثر كميات كبيرة.

قصة الحلزونة و الحلزون
كلنا فاكرين قصيدة الحلزونة اللي ألقاها عادل أمام في فيلم مرجان و علي رغم من قصة الحب المأساوية المجردة ألا أنها علميا عارية تماما عن الصحة و ده لأن ببساطة مفيش حاجة أسمها حلزونة لأن الحلزون كائن مخنث بمعني أنه ذكر و أنثي في نفس الوقت لأنه عنده الاعضاء التناسلية المذكرة و المؤنثة.
ألا أنه مبيتكاثرش ذاتيا أو بيلقح نفسه لا بيتكاثر جنسيا عادي او مش عادي يعني فردين بيتقابلوا بيتبادلوا المني يعني و بعد ما بتخلص العلاقه المريبه ديه و كل واحد يخصب التاني  بيفترقوا عشان يبيضوا في حفره رطبه و بيغطوا البيض لحد ما يوصل لمرحلة النضج.

سبحان الله فعلا كل الكائنات اللي حوالينا أيات بتعبر عن مدي عظمة الخالق عز و جل في تفردها بصفاتها و قدرتها علي التكيف و النجاة غير ان ليها فوائد و موجودة لسبب و بحساب.

كان معكم #AK_TRex مراسل #TRex_Magazine من موقع حادث وفاة الحلزون بميدان التحرير.
ميدان التحرير...

Written by: Amr Khaled - T.Rex
AK_TRex