العقرب - سلسلة تعرف - لقاء مع تايسون

العقرب - سلسلة تعرف - لقاء مع تايسون

مستمعينا هابي ويك ايند عليكم رجعنالكم تاني مع أقوى اللقاءات الحصرية مع كل الحيوانات اللي خلقها ربنا و مستمرين معاكم في النكش وراء كل الكائنات الحية والمنقرضة لمعرفة كل حاجة عنهم بغرض الفضول و المعرفة البحتة.
النهاردة هبقى مضطر أخاطر بنفسي تاني كالعادة عشان أجيب معلومات عن واحد من المخلوقات الفتاكة طبعا خدنا وقت عشان نعرف نقابله في حبسه الانفرادي معانا و معاكم العقرب تايسون.


-781,782,783…..
- اللهم صلي عالنبي صباح الخير يا فندم.
-805, 806…..
- صباح الخير يا أستاذ تايسون.
- أقعد يلا لما أخلص 1003 1004,....
- طب حضرتك بتعد لحد كام ضغط انا مش هاخد من وقتك أكتر من نص ساعة
- أخلص طيب و أنا شغال كده.
-عاش يا ريت تدي للناس لمحة صغيرة يعني تعريف بسيط عنك.
- أنا العقرب كائن من المفصليات زي العناكب و الكابوريا بس علي أفشخ شويه.
- علوضعك.
- متقاطعنيش تاني ماشي 😠 1109,1110 المهم بالنسبة للصفات الجسدية جسمي بيتكون من رأس و بطن و ذيل الرأس ديه بيبقي فيها كلاليب زي بتاعه الكابوريا و الجسم بيبقي فيه 8 رجول و أخيرا الذيل اللي بيتميز بوجود غدد سم وأبره لأغراض دفاعية و هجومية.
-علي كده أنت حاسه السمع أو الشم خارقتين عندك لأن عارف أن نظرك مش قد كده
- لا أنا مبسمعش ولا بشم أصلا أنا بعتمد علي شعيرات منتشره علي جسمي و رجلي بتحس بالذبذبات و تقولي موقع أو فريستي أو عدوي فين بالظبط 1189.
- واو علي كده أنت بتفترس أيه بقي؟!

- علي حسب النوع و الحجم اللي بيتراوح بين 2سم و لحد 20سم الأنواع الصغيرة بتاكل الحشرات زي النمل و الخنافس أما الأنواع الأكبر فممكن تاكل ضفادع سحالي عقارب تانية الجوع بيحكم اللي يجي في طريقنا يعني.


- بتاكلوا بعض من قلة الأكل يعني ليه عايشين في صحرا؟!
- أه عايشين في صحرا جبت التايهة أنت أحنا بنعيش في الأماكن الجافة و الحالة و بنبقي مستخبيين معظم الوقت من أشعة الشمس تحت أي صخرة أو في الجحور لحد مال الليل يجي و نطلع عشان نصطاد 1260,1261بس برضه بنعيش في الغابات الجافة و البيوت المهجورة أحنا بنقدر نتكيف مع أي بيئة تقريبا أي حته ناشفة و حر بنركن فيها.
- أسلوبك ايه في الصيد بقي يا عم النينجا البرشط أنت؟!
- عليك نور نينجا بزحف من ورا الفريسة و زو ألسعها بديلي أديها واحدة انجيكشن ممكن في اللدغة أفضي في الفريسة من2mm3 لحد 2cm3 سم تتشل أبتدي أفرتكها بمخالبي و أكلها صحة و هنا علي قلبي 1315
- أيه الشر المطلق اللي أنت فيه ده يا عم عقرب ثم أنت بتلعب 10000 ضغط أنا شايفك مكمل يعني

- أنا شايفك بتقر شكل عينك وحشة ياض
- يا عم اللهم لا حسد أحنا ديناصورات برضه أينعم مظنش أن فيه T.Rex غيري بيلعب ضغط لأنه وشه حيخيش في الأسفلت و حيسف تراب 
 هو بيلعب بس علوضعنا برضه يعني.
-فكرتني بالديناصورات تعرف أن العقارب عاصرت الديناصورات أحنا موجودين عالكوكب من 400 مليون سنة تقريبا كانت أيام حلوة و الله مكانش فيه البني أدمين و القرف بتاعهم ده
- ممكن نسيبنا من فقرة الذكريات ديه و تقول للمستمعين السم بتاعك بيعمل ايه و ايه تأثيره عالبني آدم

- الاصابة بلدغة العقرب ليها أربع درجات حسب نوع العقرب اللي لدغك و كمية السم اللي ضخها في جسمك و بتبدأ الاعراض من أول التهاب مكان اللدغ و الصعوبة في التنفس و بتوصل لتورم العنين و خروج رغاوي من الفم و الم شديد في الصدر و توقف الجهاز الدوري عن العمل و بالتالي الوفاة.
- نسأل الله العفو و العافية يخربيت اذاك يا جدع يعني طب يعني اي حد يلدغه عقرب بيموت?!
- لا طبعا فيه أكتر من 2000 نوع من العقارب و كلهم ساميين بس فيه انواع اخرها شوية سخونية و التهاب مكان القرص و يومين و تبقي كويس لو خدت المصل حسب مناعتك و حاجات بتقتل في خلال ساعات لو معملتش الاسعافات الاوليه و خدت المصل في أسرع وقت.
- طب ايه الأنواع المؤذية قوي 
-العقرب الأصفر ده يعتبر من أشد الأنواع سمية موجود في كل صحاري العالم تقريبا و مع ان حجمه ميتعداش 3سم الا ان لدغته لو متعاملتش معاها وقتي فممكن تقتل شخص بالغ خلال ساعات.1709,1710


- و الله انا فرهدتلك  طب انا كنت متخيل الاسود أسوء
- لا بالعكس الأسود و العربي سمهم أضعف بكتير ألا انهم ممكن يأذوا الأطفال او كبار السن.
- طب يعني هو واضح ان اللدغة مؤذية عمتا أعمل ايه انا بقي لو حد لدغة عقرب ايا كان نوعه
- بص يا سيدي مبدأيا تشيل أبره السم لانه بيسيبها في الجسم , تربط فوق مكان اللدغ بشريط عرضه 2سم و ترخيه كل شويه عشان السم مينتشرش و متحبسش الدم في نفس الوقت , تعمل كمادات باردة علي مكان اللدغ , حاول تخلي مكان الاصابه في مستوي القلب عشان تقلل من سرعة الدورة الدموية في المنطقة ديه , آخيرا لازم توصل لأقرب مكان فيه المصل بتاع سم العقرب و لو أنت الشخص المصاب و متواجد لوحدك بتحاول تتصل و تطلب المساعدة لأن حركتك حتخلي السم ينتشر في جسمك أكتر و ممكن تفقد الوعي و انت سايق لا قدر الله.
- اللهم قوي ايمانك يا تايسون امال انت من اني نوع?!
- انا نوعي عقرب الأمبراطور أكبر و اضخم العقارب في العالم.... أنت بتضحك ليه?!
- لا و الله أصل كان نفسي أقلش و أقولك أمبراطور و لا قطونيل بس شكلك غبي و مؤذي و أنا مش حمل سم.
- تا را لا لا 😒 , حلوة بس متقولهاش تاني بس لا متخافش بالرغم.أني ضخم بس سمي مش مؤذي و بعيش في المناطق الآستوائية في أفريقيا بس كنت جي مأمورية و أتقفشت عندكوا هنا.


- مصعبتش عليا علي فكرة
-1952,1953....
يا عم أهدي كده ثم انت حتسافر المستقبل لو كملنا عالعد  بالمعدل ده.
- طيب بالنسبة للجانب العطفي عندي معلومات أنك رومانسي فشخ و بتعرف ترقص كمان
- أحم ده حقيقي لما بلاقي أنثي برفع مخالبي في دعوة مني للرقص بتشبك مخالبها فيها و بنلف في دايرة و نطلع قدام و ورا زي الرقص السلو بالظبط لو كملت علي كده بتبقي ليلة زي الفل كله بيخرج منها مرضي.

- الأنثي بتبيض بعد قد ايه?!
- العقارب بتولد مش بتبيض و بتبقي حامل لمدة ممكن توصل لسنة أو اكتر و بتولد من 25 الي 100 عقرب.
- امال ايه حوار ان الام ضهرها بيتفتح نصين و صغارها بياكلوها.
- الله يخربيت الفيسبوك و سنينه لا يا عم العيال بتتولد و بتتشعبط علي ضهر امها عادي و بتفضل ترعاهم و تاكلهم 30 يوم و بعدين بيشقوا طريقهم لوحدهم في الدنيا 2017.

- لا نزلني هنا بقي الله يباركلك عشان مش طالبة مرمطة بس عندي سؤال آخير بيني و بينك متعرفش هما نقلوا الطريشة زنزانة كام.
- متفكرنيش بالسافلة ديه ده الواحد صحته باظت بسببها 
- باظت ايه يا عم دنتا لاعب اتنين مليون ضغط لحد دلوقت لو سمحت خرجني من المكان المتخلف ده انا باجي هنا بيجيلي أكتآب و علي فكرة أنت بتخم في العد يا تايسون .... خرجوني بسرعة ده مجنون.
و بكده تكون خلصة حلقتنا النهاردة الحمد لله من غير أي أصابات.كان معكم #AK_TRex مراسل #TRex_Magazine من عنبر المسجلين خطر بسجن وادي النطرون أنجوي يور ويك اند.
Written by: Amr Khaled -T.Rex
#AK_TRex

التعليقات
0 التعليقات